Manipud Managbasatayo

Epekto iti Gubat Naragsakanak idi inugakko ti Oktubre 8, 1989, a bilang. Sadiay iti uneg ti akkub isu ti ladawan ti asawak idi isut’ adda iti U.S. Marines idi 1944. Nupay no ti ladawan ket naipablaak agarup 45 a tawenen a napalabas, pulos a dikam mailasin no sadino ti nakaalaanna. Dagiti kapsion ti nangilawlawag itoy kadakami. Binasa ti asawak dagiti artikulo ket kinunana nga umiso unay dagitoy. Iti pannakaammok, daytoy ti damdamo unay a panagbasak iti Agriingkayo!

H. S., Estados Unidos

Naibelleng a Lana Kas maysa nga aglaklako iti taraon manipud iti baybay, inapresiarko ti artikulo iti Setiembre 22, 1989, a bilang maipapan iti pannakaibelleng ti lana idiay Alaska. Pudno a dayta inapektaranna ti biag dagiti tattao nga agbibiag sadiay, agraman ti aglawlawda. Pudno a masapultayo ti panangiturong manipud iti Namarsuatayo tapno iturongna dagiti addangtayo. Ngem no maipapan kadagiti taraon idiay Alaska, ditay agamak a gumatang kadagita a produkto, ta adda maar-aramiden a naan-anay a programa iti panangsukimat.

A. C., Estados Unidos

Masanguanan a Papatien Pudno a naragsakanak iti salaysay nga insurat ti maysa a 16-años nga ubing a babai maipapan iti masanguanan. (Oktubre 22, 1989) Nangnangruna a nagustuak ti berso nga inadawna: “Dua a lallaki ti timman-aw iti rehas ti pagbaludan, ti maysa nakakita iti kapitakan, ti sabali nakakita kadagiti bituen.” Daytat’ epektibo unay a pangirugian iti pannakisarita iti Biblia.

D. B., Canada

Kas maysa a tin-edyer, maawisak a naimbag ta daytoy nga ubing a babai inserrekna ti salaysayna iti maysa a salisal. Daytat’ pakaidayawan ti pammatina ken ti ayatna iti Namarsuana. Ti salaysayna nangipinta iti nagpintas a ladawan iti masanguanan dagidiay nga agpannuray ken Jehova a Dios.

S. G., Estados Unidos

Naisangsangayan a Kasapulan Ti artikuloyo (Agosto 22, 1989) dinakamatna ti panagbasa babaen iti bibig. Saan nga amin a tuleng a tattao mabasada ti bibig, nupay kasta. Ti gagangay a tuleng a tao maawatanna laeng ti 30 porsiento, ket ti dadduma pugpugto laeng. (Padasenyo ti agbuya iti TV nga awan ti timekna, ket makitayo a saan a nalaka.) Dagiti tattao masansan a pilitendatayo a mangbasa iti bibig imbes nga isuratda iti papel para kadakami. Wenno isaoda iti lapayagmi wenno agsao iti napigsa wenno iriaw pay. Daytoy saan met nga epektibo. Masaktankami iti kasta unay no makangngegkami kadagiti tattao a mangtrato kadakami a kasla natiltil ti isipna.

F. B., Estados Unidos

Dagitoy a pammalagip ket maapresiar. Ti panangbasa iti bibig ket nadakamat laeng kas pamusposan dagiti indibidual a nagbalin a tuleng iti maudin a paset ti panagbiagda ken masarakanda a ti panagsuro iti pagsasao a senias narigat unay. Dikam kayat a sawen nga amin dagiti tuleng a tattao ket makabasa iti bibig.—ED.

Nasukir nga Annak Kayatko ti agyaman kadakayo maipaay iti artikulo nga “Agimtuod dagiti Agtutubo . . . Kasano a Maaramidda Dayta Kaniak?” (Nobiembre 8, 1989) Ti kabsatko a babai nailaksid iti kongregasion Kristiano dua a tawenen ti napalabas, ket adu kadagiti kapanunotan a nairuar iti artikulo deskribirenna ti rikriknak. Iti dayta a tiempo kasla saan a malasatan ti pamiliami daytoy a dakes a kapadasan, ngem nalasatanmi. Ket nabaelanmi ti nangipakita iti kinasungdo ken Jehova ken iti organisasionna.

K. L., Estados Unidos

Panangtaginayon kadagiti Gagayyem Ti artikulo nga “Agimtuod dagiti Agtutubo . . . Apay Nakarigrigat ti Mangtaginayon kadagiti Gagayyem?” (Setiembre 22, 1989) ti nangipabigbig kaniak no ania dagiti nanglemmes iti pannakigayyem. Agimonak no dagiti dadduma makisaoda iti dadduma kadagiti gagayyemko! Itan mangar-aramidakon kadagiti panagbalbaliw. Inanamaek a daytoy a napateg a paset saan a pulos a maikkat itoy a magasin.

G. Z., Brazil