Manipud Managbasatayo

Mapagsasawan Tarigagayak nga amin koma nga agtutubo a kas kaniak maapresiarda ti panangiyaplikar kadagiti singasing a naited iti artikulo maipapan iti mapagsasawan. (Hunio 8, 1989) Babaen ti panangiyaplikar kadagiti naited sadiay a prinsipio iti Biblia, addaanakon iti nasayaat a relasion kadagiti di mamati a dadakkelko.

S. C., Italia

Kuto Pinilik ti “Kuto” kas ti tema maipaay iti reportko iti eskuelaan ket imbasarko dayta iti artikuloyo. (Agosto 22, 1989) Sumagmamano nga aldaw kalpasanna, nasarakan nga adda kuto iti maysa nga eskuela iti eskuelaanmi. Kaaduan kadagiti kaeskuelaak ti sititibker a mamati a ti kuto ket masarakan laeng kadagiti narugit a tattao. (Kasta met ti pagarupko agingga a nabasak dayta nga artikulo.) Gapuna binasa ti mannursurok ti reportko ket inikkatna ti di umiso a pannakaawatda.

Y. N., Japan

Astrolohia Pulos a diak idi naginteres iti astrolohia ket ngarud kasla diak kayat a basaen ti bilang ti Agriingkayo! maipapan iti dayta a tema. (Nobiembre 22, 1989) Ngem idi rinugiak a binasa dayta, makitak no anian a panangawis daytoy a sinasatanas a panagpampanunot iti adu a paset ti sangatauan. Naragsakanak iti nakalawlawag a panagrason ken nariknak ti pudno a panangapresiar iti pannakaawatko iti dayta.

J. A., New Zealand

Lana Ti artikulo a “Lana a Madadaan nga Usaren—Nalabit!” (Nobiembre 22, 1989) ket makapainteres unay ken aduan ti impormasion. Nangnangruna a magustuak ti panangisuratyo iti dayta manipud iti panangmatmat iti sangkatedted a lana. Nalaka laeng a maawatan ket direkta iti punto!

J. W., Estados Unidos

Suppiat iti Dara Nabasak ti artikulo a “Pinadas dagiti Doktor nga Ipanaw ti Anakmi” ket makasangitak pay iti ragsak gapu kadagiti Deskins ken ti anakda a babai [a nakalisi iti pannakaipilit ti dara kenkuana]. (Oktubre 22, 1989) Ti anakko a babai, ni Dana, nagsagaba iti nakaro a pannakasinit ket masapul a maospital. Rimsua ti parikut maipapan iti dara. Nupay kasta unay ti panangikagumaanko nga agkedked iti dara, naipilit ti dara ken ni Dana. Itan pudno a maseknanakon no kasanot’ rikna dagiti Deskins bayat ti pannakasuotda. Makomendaranda iti pammatida ken ni Jehova a Dios.

D. C., Estados Unidos

Nasarakanna ti “Agriingkayo!” Agur-urayak ti pasetko iti maysa a barberia idi nakitak ti maysa a magasin a pangpalabasan ti tiempo. Sakbay a mabigbigko dayta, nabusboskon ti sumagmamano a minutos a mangbasbasa iti magasin a maawagan Agriingkayo! Pudno a nasdaawak a nangipasnek iti bagik kadagiti makagargari a kinapintas ti mensahe a linaon dagiti nagduduma nga artikulona.

H. P. C., Brazil

Naisangsangayan a Kasapulan Agyamanak iti kasta unay iti artikulo maipapan kadagiti addaan lapped. (Agosto 22, 1989) Addaankami iti maysa nga anak a babai nga adda iti wheelchair, ket busbosenna ti adu a tiempo iti panagsagana maipaay kadagiti Nakristianuan a gimgimong ken ti sumrek ken rummuar iti kotse bayat iti panagministerio kadagiti ruruangan. Makagtengkami iti gimong iti umiso a tiempo ket tagiragsakenmi unay dagiti naespirituan a taraon, ngem awan ti pudno a makaammo no kasano ti panangikagumaanmi a makagteng sadiay. Ni Jehova ti mangpabileg kadakami; no saan, dikam maaramid ti kasta.

S. A., Estados Unidos