Ti Ammo ti Di Pay Naipasngay nga Ubing
TI NABIIT pay a panagsirarak patalgedanna a ti di pay naipasngay a sikog ket maapektaran iti kasta unay saan laeng a babaen iti taraon ti inana, dagiti droga a mabalin nga usarenna, wenno no isut’ agsigarilio wenno saan. Ti sikog mangngegna met ti dengdenggen ti inana ket nalawag a maapektaran.
Tapno iyilustrar: Ti direktor iti musika iti Hamilton Philharmonic Orchestra idiay Ontario, Canada, impadamagna nga idi isut’ ubing pay, pinulpullo a nadumaduma a musika a sansanayenna ti kasla pamiliar kenkuana, nupay no saanna pay a nangnangngegan ida idi. Kankanayon a ti pasetna a cello ti nakaskasdaaw ti kinapamiliarna. Imbagana iti inana, maysa a propesional a managtokar iti cello, maipapan itoy. Idi nagsaludsod ken nanangna, imbagana kenkuana dagiti nagnagan dagiti kankanta a sansanayenna, nasolbaren ti misterio. Idi isut’ masikog kenkuana, inlawlawagna, dagitoy dagiti piesa a sansanayenna!
Itan, sigun iti kolumnista iti pagiwarnak a ni Erma Bombeck, maysa a pagiwarnak iti medisina a Briton ti nangipadamag ti maysa a parikut nga awagan ti pagiwarnak a “pannakaadikto ti sikog kadagiti drama ti radio ken telebision.” Dagiti di pay naipasngay agbalbalindan nga adikto kadagiti drama ti radio ken telebision a dengdenggen dagiti innada. “Tarigagayak a naammuak koma daytoy idi sikogko pay laeng dagiti annakko,” kuna ni Bombeck. “Kankanayon koman a binuybuyak ti ‘The Waltons,’” maysa a makagunggona a programa ti telebision a naipabuya sumagmamano a tawenen ti napalabas. Innayonna pay: “Awan duadua nga addaantayo kadagiti annak nga agtarigagay a matebbengan iti edad a 2, maki-“date” iti edad a 9 ken makagun-od iti bukodda nga apartment iti edad a 13.”