Salsaludsod Dagiti Agbasbasa

Adda kadi pay namnama a mapagungarto ti maysa a natay a sikog?

Kadagidiay di pay pulos nakapadas iti saem ti mapukawan iti mayin-inaw nga anak, mabalin a dida unay maawatan ti rikna dagiti nakapadasen iti kasta. Napalalo ti ladingit ti dadduma a nagannak gapu iti kasta a pagteng iti biagda. Adda ina a naminlima a naalisan. Idi agangay, agyamyaman unay ta naaddaan ken nakapadakkel met laeng iti dua a nasalun-at nga annak a lallaki. Ngem kaskasdi a malagipna ti tunggal sikogna a pimmusay. Agingga a sibibiag, ammona latta no mano koman ti tawenda no sibibiagda. Adda kadi panggapuan dagiti kasta a Kristiano a manginanama a mapagungarto dagiti natay a sikogda?

Ti simple a sungbat iti dayta a saludsod ket saanmi nga ammo. Awan a pulos ti direkta nga ibaga ti Biblia a mapagungarto dagiti naregreg a sikog wenno dagiti nayanak a natay. Nupay kasta, naglaon ti Sao ti Dios kadagiti prinsipio a maitutop iti dayta a saludsod ken makaliwliwa uray kaskasano.

Usigentayo ti dua a mainaig a saludsod. Umuna, sigun iti panangmatmat ni Jehova, kaano a mangrugi ti biag ti maysa a tao​—apaman a mayinaw wenno apaman a maipasngay? Maikadua, kasano ti panangmatmat ni Jehova iti di pay naipasngay​—kas maysan nga indibidual wenno kas nagraragup laeng a selula ken tisyu iti aanakan ti maysa a babai? Mangipaay dagiti prinsipio ti Biblia kadagiti nalawag a sungbat kadagita a saludsod.

Ibatad ti Mosaiko a Linteg a ti biag ket mangrugi, saan nga iti pannakaipasngay, no di ket iti nasaksakbay nga amang. Kasano? Ipakaammona a ti tao a makapapatay iti sikog ket madusa iti ipapatay. Imutektekanyo daytoy a linteg: “Masapul nga itdem ti kararua iti kararua.”a (Ex. 21:22, 23) Gapuna, ti mayin-inaw ket sibibiagen ken maysan nga indibidual. Ti pannakaawat iti dayta a kinapudno ti nakatulongen iti minilion a Kristiano tapno liklikanda ti panagparegreg ta ibilangda dayta kas nadagsen a basol iti Dios.

Yantangay sibibiagen ti sikog, kasano kapateg ken Jehova dayta? Sigun iti linteg a nadakamat, mapapatay ti adulto no isu ti nakaigapuan ti ipapatay ti maysa a sikog. Nalawag ngarud a ti biag ti maysa a sikog ket nakapatpateg iti imatang ti Dios. Adu pay a teksto iti Biblia ti mangipalgak a ti sikog ket ibilang ni Jehova kas maysan nga indibidual. Kas pagarigan, napaltiingan ni Ari David a mangibaga ken Jehova: “Pinagtalinaednak a nalingedan iti tian ni inak. . . . Dagita matam nakitada uray pay ti maisiksikog a bagik, ket iti librom naisurat dagiti amin a pasetna, no maipapan iti al-aldaw idi a nabukelda.”​—Sal. 139:13-16; Job 31:14, 15.

Para ken Jehova, dagiti sikog ket addaanen kadagiti bukodda a galad ken mabalin nga addan dakkel a potensialda iti masanguanan. Idi a ni Rebecca nga asawa ni Isaac ket masikog iti singin, adda impadto ni Jehova maipapan iti dua nga agdangdangadang a lallaki iti aanakan ni Rebecca, ta nakitanan a nasaksakbay dagiti galadda a mangapektar iti adu a tattao.​—Gen. 25:22, 23; Roma 9:10-13.

Makapainteres met ti napasamak idi a maisiksikog pay laeng ni Juan a Mammautisar. Kuna ti salaysay ti Ebanghelio: “Idi mangngeg ni Elisabet ti kablaaw ni Maria, limmagto ti maladaga iti aanakanna; ket ni Elisabet napno iti nasantuan nga espiritu.” (Luc. 1:41) Iti panangdeskribirna iti dayta a pasamak, nagusar ni mangngagas a Lucas iti Griego a sao a mabalin a tumukoy iti man sikog wenno iti maladaga. Dayta met la a sao ti inusarna idi tinukoyna ni maladaga a Jesus a nakaidda iti kulluong.​—Luc. 2:12, 16; 18:15.

No kasta, ikkannatayo kadi ti Biblia iti pangibasaran a nagduma ti sikog ken daydiay naipasngayen a maladaga? Agminar a saan. Ket mayataday dayta kadagiti naammuanen ti moderno a siensia. Kas pagarigan, naammuan dagiti managsirarak a ti sikog ket makadlaw ken addan reaksionna kadagiti mapaspasamak iti ruar ti aanakan ti inana. Gapuna, natural laeng a suminged ti maysa a masikog iti isiksikogna.

Agduduma ti kapaut ti pannakaisikog dagiti maladaga. Usigenyo daytoy a pagarigan: Adda ina a mangipasngay iti kurang ti bulanna a maladaga, a matay kalpasan ti sumagmamano nga aldaw. Adda met sabali nga ina a kompleto a siam a bulan ti sikogna ngem matay dayta sakbay la unay a maipasngay. Mainanama kadi ti umuna nga ina a mapagungarto ti anakna gapu laeng ta naipasngay dayta, nupay kurang a siam a bulan, idinto ta ti maikadua nga ina ket dina mainanama ti kasta?

Kas panggupgop, nalawag ngarud nga isursuro ti Biblia a ti biag ket mangrugi iti pannakayinaw. Para ken Jehova, ti sikog ket maysan a napateg nga indibidual. Gapu kadagita a kinapudno iti Biblia, nalabit patien ti dadduma a saan a nainkalintegan ti panangibaga a din manamnama a mapagungar ti maysa a sikog a natay iti aanakan ti ina. Kinapudnona, nalabit patienda a ti kasta nga argumento dadaelenna ti Nainkasuratan a panangmatmattayo iti aborsion a nangnangruna a naibasar kadagita met laeng a kinapudno.

Iti napalpalabas, adda sumagmamano a mamagpanunot a saludsod a nausig iti daytoy a magasin a kasla mamagduadua iti posibilidad a mapagungar dagiti sikog a natay sakbay a maipasngayda. Kas pagarigan, mangikabilto kadi manen ti Dios iti biag a maituloy a mayinaw iti aanakan ti maysa a babai idiay Paraiso? Nupay kasta, kalpasan ti napasnek a panagadal, panagutob, ken panagkararag, naamiris ti Bagi a Manarawidwid a dagiti nailawlawagen iti napalabas ket talaga a saan a mayataday iti namnama a panagungar. Kinuna ni Jesus: “Amin a bambanag mabalin iti Dios.” (Mar. 10:27) Ti mismo a situasion ni Jesus ti pakakitaan iti kinapudno dayta a teksto; manipud langit, ti biagna ket nayakar iti aanakan ti maysa nga agkabannuag a birhen​—banag nga imposible unay iti panangmatmat ti tao.

Kaipapanan kadi amin dayta nga isursuro ti Biblia a dagiti annak a natay sakbay a maipasngayda ket mapagungarto? Kayatmi nga ipaganetget a saan a direkta a sungbatan ti Biblia dayta a saludsod, isu nga awan ti pangibasaran dagiti tattao nga agbalin a dogmatiko iti daytoy a banag. Mabalin a mangpataud latta daytoy a topiko iti nakaad-adu ken agduduma a saludsod. Ti ngarud kasayaatan ket ditay mamugpugto. Daytoy ti masiertotayo: Ni Jehova a Dios a naruay iti naayat a kinamanangngaasi ken kinaimbag ti makaammon iti dayta a banag. (Sal. 86:15) Sigurado a naimpusuan a kayatna a pukawen dagiti epekto ti ipapatay babaen ti panagungar. (Job 14:14, 15) Makapagtalektayo a kanayon nga umiso ti ar-aramidenna. Pukawennanto ti adu a saem a napasarantayo iti agdama a dakes a sistema ti bambanag ken siaayat nga iwanwanna ti Anakna a ‘mangdadael kadagiti aramid ti Diablo.’​—1 Juan 3:8.

[Footnote]

[Ladawan iti panid 13]

Pukawento ni Jehova ti amin a nasaem a kapadasan ti sangatauan