Biag—Sagut nga Ipatpateg
IDI inted ni Jehova a Dios ti pribilehio nga agipasngay kadagiti annak iti natauan a pamilia, anian a sagut dayta! Dumtengto ti maysa a nagpintas nga ubing a sakruyen dagiti agur-uray a takkiag dagiti naragsak nga agassawa a mangay-ayat iti maysa ken maysa ken sisasagana a mangipateg ken mangaywan iti bassit a bunga ti panagasawada. Agrag-o ti pamilia bayat a tumanor a sibibiag ti ubing.
Ngem ti basol da Adan ken Eva nakalkaldaang dagiti nagbanaganna kadagiti annak a naipasngay iti natauan a rasa. Kas banag ti basol, nailunod ti immuna nga inatayo a napakuyogan ti rigat ken pisikal nga ut-ot bayat nga impasngayna dagiti annakna. Ket ti managbasol nga aglawlaw a nakaipasngayan dagiti annakda pinagbalinna a nagdakkelan a karit ti panagipasngay kadagiti annak. Gapuna, iti nakarikrikut a lubong ita, di pakasdaawan a ti pannakainaw ti maysa nga ubing ket masansan a saan a pagrag-oan. Kaskasdi, aniat’ panangmatmat ti Namarsua iti di pay naipasngay? Nagbaliw kadin ti panangmatmat ti Namarsua iti dayta a maitunos iti agbaliwbaliw a moralidad? Talaga a saan. Ti panangmatmat ken pannakaseknanna kadagiti di pay naipasngay nga annak iti lubong di agbalbaliw.
Nalawag nga ibaga ti Kasuratan nga iti uneg ti ina adda tumantanor a naisangsangayan a tao. Mangrugi ti biag iti pannakainaw. Ti pannakaipasngay ditoy lubong ipalgakna laeng iti tao ti ubing a nakitan ti Dios. Saritaen ni Ezequiel ti “tunggal ubing a manglukat iti aanakan.” (Ezequiel 20:26) Deskribiren ni Job “dagiti ruangan ti tian ni inak,” ket awaganna dagiti alis kas “kadagiti maladaga a di nakakita iti lawag uray kaano.”—Job 3:10, 16.
Paliiwenyo ti kasta unay a panangipateg ni Jehova a Dios iti nagbassitan a biag bayat a dumakkel iti matris. Kinunana ken Jeremias: “Kasakbayan ti panangbukelko kenka iti tian nabigbigankan, ket idi kasanguanan ti pannakaipasngaymo sinantipikarka.” (Jeremias 1:5) Kinuna ni David: “Ti langak saan a nailinged kenka idi nabukelak a sililimed, ket naaramidak a naisangsangayan kadagiti kaungan toy daga. Dagiti matam nakitada daydi bagik a di pay nabukel.” (Salmo 139:15, 16) Inawagan ni Job ti Dios a “Daydiay nangaramid kaniak iti tian,” a “nangisagana kadatayo iti aanakan.”—Job 31:15.
Ngem ania ngay ti pakaseknan ti Dios iti maup-upay nga agpadpadaan nga ina a di mangayat iti ubing? Kadagiti amin a persona, mabigbig ti Namarsua ti nadagsen a rebbengen ti panagbalin a nagannak. No ti agpadpadaan nga ina, nupay narikut ti kasasaadna, pilienna a biagen ti ubing gapu iti panagraemna kadagiti nadiosan nga annongen, dinanto aya bendisionan ti pangngeddengna? Ti maysa a naganak mabalin ken rumbeng nga ikararagna ti tulongna iti panangpadakkel iti naragsak nga ubing. Kadagiti pinanid ti Saona, inteden ti Dios ti kasayaatan a balakad a magun-odan maipapan iti panangpadakkel kadagiti annak. Ti panangiyaplikar kadagiti prinsipio ti Biblia iti biag ti pamilia mangyegto kadagiti makaay-ayo a resulta. Ti rag-o ken dagiti gunggona iti panangpadakkel kadagiti nadiosan nga annak ringbawanna dagiti aniaman a sakripisio a napasaran, kas paneknekan ti asinoman a maragsakan a naganak.
Naiduma kadi ti panangmatmat ni Jehova no ti ubing ket timmanor gapu iti pannakarames wenno relasion nga incesto? Nupay dakes nga aramid dayta a maibusor iti ina, saan a mapabasol ti ubing. Ti panangipatingga iti biagna subadanna laeng ti kinaranggas iti sabali a kinaranggas. Pudno a mabigbig ni Jehova ti panagdanag dagita a biktima ket mabalinna a tulongan ti ina ken ti ubing a mangsaranget iti nagbanagan ti [krimen] iti natimbeng a pamay-an.
Ania ngay no ibaga ti doktor iti masikog a ti panangisikogna iti anakna agingga a maipasngay pagpeggadenna ti biagna? Kinuna ni Dr. Alan Guttmacher: “Itatta mabalinen a makalasat a sibibiag ti dandani amin nga agpasngay, malaksid no agsagaba iti makapapatay a sakit a kas iti kanser wenno leukemia, ket no kasta, uray ti aborsion dina met pagpauten, wenno ispalen ti biag.” Kuna ti The Encyclopedia Americana: “Yantangay sitatalged a mailasat ti kaaduan a babbai iti panagsikog nupay adda nakaro a sakitda, mammano a maaramid ti aborsion a mangsalaknib iti salun-at ti ina. Kaaduan nga aborsion ti makalikaguman tapno liklikan ti maaddaan iti anak.” Gapuna mammano dagita a kasasaad. Nupay kasta, no mapasamak dayta iti panawen ti panagpasngay, ngarud dagiti nagannak ikeddengda no pilienda ti biag ti ina wenno ti biag ti anak. Daytat’ pangngeddengda.
Nakaskasdaaw kadi ti panangikabil ti Namarsua iti biag kadagiti nalawag a pagalagadan iti panangusar kadagiti pannakabalintayo nga agpaadu? Iti imatangna, basol ti panangpatanor iti biag a di panggep nga aywanan, a kas met ti panangkettel iti biag ket basol.
Ket sigurado nga agtultuloy ti supiat no umiso wenno dakes ti aborsion agingga iti panungpalan daytoy a sistema. Ngem awan a pulos ti parikut iti Namarsua ti biag, ni Jehova a Dios, agraman dagidiay mangipateg kadagiti lintegna. Napateg ti biag—maysa a sagut a rumbeng nga aywanan ken ipateg manipud pay iti punganay dayta.