Panangallilaw iti Siensia—Mangaramid Paulo ti Damdamag
Ti pakasarsaritaan dagiti sientista kas kankanayon a napasnek iti kinapudno ket namulitan, kas ipakita dagitoy a paulo dagiti damdamag.
“Pagalagadan iti Siensia”
“Kumarkaro ti panagdadangadang idiay Kamara dagiti Diputado iti E.U. gapu iti panangallilaw, dakes a kababalin, ken ti panagsuppiat iti paginteresan iti siensia.”—Science, Hulio 7, 1989.
“Agkusit Aya dagiti Sientista?”
“Kalpasan daytoy immuna a panagsaludsod daytoy komite iti [kamara] maipapan itoy a tema, adda ngarud ti kumarkaro a rason ti komite a mamati a makitkitatayo laeng ti murdong ti daksanggasat, napeggad, ken napateg a bloke ti hielo.”—Brodkas ti NOVA iti PBS (Public Broadcasting Service) idi Oktubre 25, 1988.
“Dua a Baro a Panagadal ti Mangimtuod no Apay nga Agkusit dagiti Sientista”
“Daytat’ saludsod nga awan dakes a panggepna: kasanot’ panagtignay dagiti sientista no awan ti mangsipsiput? Ngem daytoy pinataudna ti manggargari a sungbat: saan unay a naimbag, kuna ti maysa a pagiwarnak itoy a bulan iti Briton a pagiwarnak a Nature.”—Newsweek, Pebrero 2, 1987.
“Maysa a Nasion dagiti Ulbod? Palsipikaduen dagiti Sientista ti Panagsirarak”
“Maysa a panagadal a naipablaak idi napan a bulan inakusarna dagiti 47 a sientista kadagiti eskuelaan ti medisina idiay Harvard ken Emory University iti panangpataudda kadagiti makaallilaw a papeles.”—U.S.News & World Report, Pebrero 23, 1987.
“Makita ti NIH ti Panagkopia iti ‘Vision Paper’”
“Kuna ti grupo nga innala ti managsirarak dagiti impormasion a rinepasona manipud iti kapatadanna ket inusarna iti mismo a trabahona; . . . ti NIH [National Institutes of Health] irekomendarna ti pannakausig iti pananglapped.”—Science, Hulio 14, 1989.
“‘Nalulok a Kababalin’ Pataudennat’ Panangallilaw idiay Laboratorio”
“Dagiti biomedikal a sientista idiay America mangar-aramidda iti di nasayaat ken no dadduma makaallilaw a panagsirarak iti panangikagumaan a mangipablaak ti ad-adu a papeles ket makasapul iti ad-adu a kuarta.”—New Scientist, Pebrero 25, 1989.
“Pabassiten dagiti Managsirarak ti Pamay-an ti Panangallilaw”
“Ti sientipiko a panangallilaw ken di panagannad kadagiti managsirarak mabalin a nasaknap, impakdaar ti maysa a panagadal idi napalabas a bilang iti Nature.”—New Scientist, Enero 22, 1987.
“Nagikkat ti Managsirarak a Naakusar a Nagkopia”
“Maysa a biokemiko a naakusar a nangkopia iti maysa a report iti National Academy of Sciences maipaay iti libro maipapan iti nutrition ken cancer ti nagikkat iti saadna idiay Cleveland Clinic Foundation.”—Science, Setiembre 4, 1987.
“Ti Pildoras: Palsipikado dagiti Panangsubok ti Propesor Maipaay iti Kinatalgedna”
“Ti panangallilawna nangikabil iti panagduadua maipapan iti kinatalged dagiti panangsubok kadagiti pildoras a tomtomaren dagiti nasurok pay a 2 m[ilion] a babbai idiay Britania ken 10 m[ilion] iti sangalubongan.”—The Sunday Times, Setiembre 28, 1986.
Nagikkat ti Nangatot’ Saadna a Managsirarak Gaput’ Pannakaibabain”
“Isut’ nagikkat idi napan a lawas kalpasan ti pannakasarak ti managsaludsod a komite kenkuana a nakabasol iti sientipiko a panangallilaw.”—New Scientist, Nobiembre 12, 1988.”
“Ti NIMH Nakasarak iti Kaso iti ‘Dakes Unay a Kababalin’”
“Maysa a nakaskasdaaw a nabayagen, nakalawlawag a dakes ken inggagara a kaso iti sientipiko a panangallilaw sigun iti balabala ti report iti maysa nga imbestigasion nga inaramid ti National Institute of Mental Health.”—Science, Marso 27, 1987.
“Ti ‘Panangallilaw’ iti Panagsirarak Mangikabil ti Sabidong iti Ivy League”
“Maysa a nalatak a sikiatrista a taga Boston ti nagikkat kas pangulo iti mental nga ospital a nainaig iti Harvard University, a simmaruno iti pammabasol a panagkopia.”—New Scientist, Disiembre 10, 1988.
“Ti Kaso iti ‘Di Umisot’ Nakaikabilanna’ a Tedtedda”
“Maysa a nalatak nga Australiano a sientista nasukimatnan ti duapulo-tawen a sursurat maipapan iti geolohia ti kadaanan a Himalaya ket kunaenna a mabalin a dayta ti kadadakkelan a paleontolohikal a panangallilaw iti isuamin a tiempo.”—Science, Abril 21, 1989.
“Itan dagiti Pagiwarnaken ti Mabatbatikos”
“[Isut’ agsasao] nangnangruna maipapan iti kasta unay a kinakapuy ti panangtaming dagiti adu a pagiwarnak iti [siensia] kadagiti sientipiko a panangallilaw. . . . Dayta met laeng a mensahe a naipatulod idi kadagiti dadduma a miembro iti sientipiko a komunidad ket maiturturongen kadagiti pagiwarnak: dalusanyo dagiti ar-aramidyo wenno makitayonto ti pannakibiang dagiti managaramid-linteg iti dayta.”—The AAAS Observer, Hulio 7, 1989.