Sungbat ti Managbasa iti Artikulo ti “Agriingkayo!”

Panangibtur iti “DOWN’S SYNDROME”

T1 BILANG nga Agosto 8, 1989, iti magasin nga Agriingkayo! naglaon iti maysa nga artikulo maipapan iti ubing a babai a managan Suzy a naipasngay nga addaan Down’s syndrome. Ti artikulo dineskribirna ti dakkel nga ayat, panangikagumaan, ken anus nga impakita dagiti dadakkel ni Suzy, kabsatna a babai, kabsatna a lalaki kenkuana. Iti panangsungbatna iti dayta nga artikulo, maysa a babai idiay Spokane, Washington, ti nagsurat iti sumaganad a surat iti Agriingkayo!:

“Kalpasan ti panangbasak iti Agosto 8 nga Agriingkayo!, masapul nga agsuratak kadakayo. Kayatko ti agyaman kadakayo iti panangipablaakyo ti artikulo maipapan ken bassit a Suzy. Nakaskasdaaw a rikna ti adda kaniak ta maysaak a ‘naganak’ iti ‘maladaga’ nga inak, gapuna mariknak ti pannakipadak iti ina ni Suzy. Kayatko nga ipakaammo kadakayo ti sabali pay kadagiti adu a bambanag a sangsanguentayo itatta, ket anian ti pannakaparegtak babaen iti trabaho nga ar-aramidenyo a panangtulong kadakami nga agballigi.

“Maasianak unay ken bassit a Suzy nga addaan iti Down’s syndrome ta nagsangitak. Addaanak iti kasta unay nga empatia kadagita nga annak ken nagannak, ta sumagmamano dagiti am-ammokon. Bayat ti panangbasak maipapan iti rigat ni Suzy iti panagbiag, nagladingitak gapu ken nanangko. Siak a mismo ket baketakon nga agedaden iti 70’s, ket nakitak ti panagbiag ni nanangko a nagbalbaliwen nga interamente.

“Isut’ malaglagipko idi damo kas napintas, manangipateg, managayat, ken nakaparparagsit nga agtutubo. Itan isut’ addan kadagiti edad a 90’s. Manipud iti agsasaruno nga istrok, naimatangak ti panagkapuyna iti pisikal a nakaay-ay-ayen ti panagkubbona, ngem agan-andar pay laeng a normal dagiti napapateg nga organo ti bagina.

“Ti damo a nakaro a pannakaistrokna ket nagtungpal iti dina pannakabael a mangisurat iti tsekena, mangaramid iti listaan dagiti groseriana, kdp. Iti uneg ti makatawen, daytoy a kasasaad kimmaro pay a nagtungpal iti din pannakabael a mangipapudot uray pay ti bassit laeng a merienda wenno sangkabassit a taraon.

“Makatawen laeng ken kagudua, ti sabali pay a nakaro nga istrok ti saanen a nangpapagna kenkuana, nangikkat iti kinasigona, ken ti panagsaona, ket dinan malapdan ti panagisbona ken ti panagiblengna. Nakagtengen iti kasasaad a kasla maikadua a ‘panagubing’ iti panagbiag, ket nakitak a nagbalin a kasta. Isut’ masapul a subuen, malampinan, ken maibagkat manipud iti kama a maipan iti wheelchair.

“Saan a mabaelan ni nanang ti makisao kadakami a mangibaga ti pampanunotenna, marikriknana, no ania ti kayatna wenno tarigagayanna. Ngem nasursuromi ti makisao kenkuana babaen iti mata, isem, ken lulua! Literal nga agraniag ti rupana no makaibagaak kenkuana ti maysa a banag a makapainteres a nangngegak idiay Kingdom Hall dagiti Saksi ni Jehova a tabtabunuak, wenno adda dadduma nga adda sadiay a mangipatulod ti damag kenkuana, wenno nalabit maysa a banag a makapainteres a nabasak iti Agriingkayo! wenno Ti Pagwanawanan.

“No panawak, gagangay nga aglua, ket naannad a bisongenna ti pingpingko iti panagpakada. Nupay kasta, no kalpasan ti panagbisita kunaek, ‘Mama, alas sieten, ket mapanakon makigimong idiay Kingdom Hall,’ isut’ agisem ket agtung-ed, ‘wen,’ ket agekannak iti kasta unay. Kalpasanna buyaennakon a mapan iti ruangan ket siisem a garawenna dagiti ramramayna iti panagpakada kas ti pamay-an nga insuro dagiti appona kenkuana.

“Dandani dumtengen ti bisperas ti Todos los Santos idi simrek iti sentro a pagpaungaran. Isut’ nagtengak iti kuarto a paglinglingayan idi bimmisitaak iti maysa nga aldaw. Naingato dagiti wheelchair, uppat iti tunggal atiddog a lamisaan, ket naiwaras kadakuada dagiti amin a material a kasapulan a mangaramid kadagiti bambanag nga usaren iti bisperas ti Todos los Santos. Adda sadiay ni Mama a nakatugaw a ti rupana ket kasla ubing nga uppat ti tawenna a di makasao a kunkunana: ‘Diak kayat nga aramiden dayta, ket diak aramiden dayta!’

“Napanak iti likudanna ket kinunak: ‘Hello, Mama,’ ket idi nagdumogak ket inagkak ti pingpingna, pimgaakak (tapno ilingedko dagiti luak) ket inyarasaasko iti lapayagna: ‘Inyegdaka ditoy tapno pagaramidendaka kadagiti bambanag maipaay iti bisperas ti Todos los Santos.’ Idi tinaliawnak, nagrimat iti nakapilpilia a rimat dagiti matana, a nakaisem. Kalpasanna pinagrupangetna ti rupana iti ebkas a naan-anay a pananggura! Ket kasta ti mapasamak tunggal dumteng ti piesta. Dina patien dagita a piesta, nga addaan ti pagano a nalikudan, ket adda ditoy, a limitado ti kabaelanna, a mangsalsalimetmet iti pammatina.

“Walo a bulanen ti napalabas, sabali manen a nakaro nga istrok ti napasamak, isu a nangikabil kenkuana iti coma ket nangrugin a nagserra ti bekkelna. Ngem, amin dagiti nasken nga organona nasayaatda. Kalpasan ti lima nga aldaw, di makapapati dagiti doktor iti nagbalbaliwanna. Idi damo, dina mabigbig ti asinoman kadakami. Ngem itan, no dadduma, mariknana ti agekmi. Naanad nga aprosanmi ket idekketmi dagiti bibigna kadagiti pingpingmi.

“Kadagitoy napalabas a walo a bulan ni nanangko nagbalinen a kas maysa a kappasngay nga ubing, nga agbibiag ken agang-anges ngem di makapagbiag a bukodna. No dadduma ti ubing dina kayat ti mangan, ngem kaguduat’ oras kalpasanna, babaen iti sangitna, ipakaammona a mabisin wenno kasapulanna ti panangasikaso. Awan ti pamay-an ti panangipakaammo ni nanang no ania ti kayatna wenno kasapulanna. Dagiti nars ken dagiti miembro ti pamilia masapul a sursuruenda no apay a no dadduma molmolanna ti taraonna iti nakabaybayag ngem dina alimonen. Babaen ti tulong ti doktor, naammuanmi a mabalin a ti makagapu ket ur-urayenna ti panagtig-abna, gapu ta iti pannakaparalisado a sagsagabaenna, no dadduma saan nga aggunay dagiti piskelna. No agapura ket agalimon sakbay a sumayaat ti riknana, isut’ maltutan.

“Iti panangipaay iti naimbag a panangaywan iti maladaga (maysa a kas ken Suzy wenno ni nanangko) ti maysa masapul a sursuruanna ti bagina. Anian a naggasat ni Suzy ta addaan nadungngo ken managayat a pamilia! Nariknami a nagundawayankami ta pinadakkeldakami dagiti nagannak a tinagiragsakmi. Idi dumakdakkelkam pay, mangibasa ni Mama kadagiti artikulo kadakami manipud kadagiti publikasion iti Watch Tower maipapan iti kinasalun-at ken kasta met kadagiti adu a dadduma a tema a paginteresan ti pamilia. Pinaregtanak a mangusar iti kasta nga impormasion iti panangisurat kadagiti themes ken mangipaay kadagiti palawag idiay eskuelaan.

“Gapuna dakami nga annak itan ti naganak, ket ni Nanang ti ubing. Apay a nagsangitak idi nabasak ti maipapan ken Suzy? Apay a nalagipko ti baketen nga inak a mainaig ken ni bassit a Suzy? Pagarupek gapu ta malagipko ti kinasinged ken nanangko. Kasta met, mariknak ti kellaat a nakaro a panagayat ken panangapresiar iti nailangitan nga Amatayo, ni Jehova a Dios, isu a babaen iti ayatna kadatayo amin nangaramid iti probision a dumtengto ti aldaw a ti nakaay-ayat a bassit a Suzy ken ti nanangmi, iti maysa a paraiso a daga iti baro a lubong ti Dios, agbalindanto a perpekto kas ti pinanggepna a pagbalinan ti sangatauan.—Mateo 6:9, 10; Apocalipsis 21:4, 5.

“Inanamaek a dumtengto ti aldaw, iti umay a Paraiso, dagiti dua a pamiliami makapagtitiponto ken makikaduanto kadagiti dadduma a kas kadakami. Nalabit mabalin a makaluakaminton iti ragsak, agraman adu a rag-o ken panagkatawa, nga agyamyaman ken agdaydayaw iti Namarsuatayo, ni Jehova, ken ti Anakna, ni Jesu-Kristo, ti Mannubbottayo.”—Naipatulod.