Awan Kuarta Para Kadagiti Bulsek

Walopulo porsiento kadagiti bulsek iti lubong ti agnanaed kadagiti rumangrang-ay a pagilian. Ti kaaduanna ket adda iti Makin-abagatan a daya nga Asia. Addada, maysa iti tunggal 25 a tattao a bulsek wenno dandani bulsek, ipadamag ti WHO (World Health Organization). Ania dagiti kangrunaan a makagapu? Di nasayaat a pannakataraon ken impeksion a resulta iti nakapuy a panagdaldalus.

Sigun iti magasin a Dutch nga Internationale Samenwerking, kunaen ti WHO nga iti dua bilion a doliar iti E.U. iti tinawen, mabalin a maibanagnan iti epektibo a kampania a maibusor iti kinabulsek kadagiti rumangrang-ay a pagilian. Nupay daytoy a gatad ket basbassit ngem ti gasgastuen dagiti gobierno iti lubong maipaay iti namilitaran a panggep iti maymaysa nga aldaw, kunaen ti WHO a dayta dina mabalin a magun-odan dagiti kasapulan a pundo.

Gapuna, agsipud ta kurang ti umdas a gastuen, ti laeng maaramidanna ita isu ti panangpadas a lapdan iti kinabulsek babaen iti panangiwaras kadagiti kapsula a bitamina A kadagiti ubbing. Agarup 400,000 nga ubbing idiay India, Indonesia, Bangladesh, ken ti Filipinas ti agsagaba manipud iti sakit ti mata a patauden ti kurang a bitamina A. Ngem nalidem ti padto ti WHO nga, iti agdama nga iyaaduna, ti lubong maaddaanton ti 84 milion a bulsek ken dandani bulsek inton tawen 2000.