Ti Nalabaga nga Enkantador a Naragsak ti Kansionna

Riniingnakay kadin ti nalabaga nga enkantador a naragsak ti kansionna? No agnanaedkay idiay Norte America, daytat’ naragsak a mangguped iti turogyo ngamin maysa kadagiti kapopularan a billit a kumakansion—ti cardinal—dita a paset ti lubong ti pagumokanna. Ti kalakian a cardinal bednganna ti teritoriana babaen iti nasinggit a sagawisiwna. Ket anian ti gagetna ken laingna nga agkansion! “Maysa a kalakian a cardinal nakarekord nga addaan 28 a kansion a buklen ti nagduduma a kombinasion dagiti silaba,” kuna ti The International Wildlife Encyclopedia.

Daytoy nagpintas a billit ket agarup 20 cm ti kaatiddogna, a nakalupkopan iti natayengteng a nalabaga a dutdot nga adda naminar a nangisit a “babero” a nanglikmut iti sippitna. Ngem, ti dutdot ti babai kasla nagkupas a kayumanggi. Ti babai naibilang kadagiti sumagmamano la a puli dagiti makakanta a babbai.

Sadino man ti pagnanaedanyo, inton makangngegkayo iti nakaay-ayat a kansion ti billit, agyamankay iti nailangitan a Namarsua kadakayo gaput’ naisangsangayan a sirib ken abilidadna. Dagiti billit a kumakansion maysada kadagiti insagutna a pakaawisan ken pakaragsakan.—Salmo 148:7-10.