Manipud Bodega Nagbalin nga Estadium
Babaen ti koresponsal ti Agriingkayo! idiay España
MANIPUD tuktok ti turod agingga iti igid ti baybay, ti nadnadlaw a paset ti buya iti Galicia, makin-amianan a laud nga España, isu ti hórreo. Sumagmamano a homestead dagiti taga Galicia ti awanan ti maysa. Gagangay a naaramid iti granito wenno kayo ken nadumaduma ti pannakaarkosna iti krus, ti hórreo mabalin a nalaka laeng a mapagkamalian a tanem ti pamilia.
Ti panggepna, nupay kasta, ket nakurkurapay pay. Daytat’ maysa a bassit a bodega, wenno sarusar, a mausar a pagidulinan iti mais, patatas, ken dadduma nga apit a namaga bayat dagiti nabasa a bulbulan iti kalam-ekna. Ti kasla uong nga adigi a nakaisaadanna agserbi a mangallilaw kadagiti utot, a pagay-ayatda ti mangan iti apit.
Ngem 30 a tawenen a napalabas, maysa a partikular a hórreo iti maysa a bassit a bario iti Xeoane ti naikkatan iti krus. (Kitaenyo ti ladawan iti ngato.) Daytoy a bassit a sarusar—a 10 metros kuadrado laeng—ti nagserbi nga immuna a nalimed a paggigimongan dagiti Saksi ni Jehova idiay Galicia. Addada 23 a Saksi nga aglilinnetlet iti daytoy bassit a lugar, a sumangpetda ken pumanawda no nasipngeten tapno maliklikanda ti maaresto idi tiempo ti kinadiktador ni Franco.
Itan, agarup dua a dekadan ti napalabas nanipud idi naikkan dagiti Saksi ni Jehova iti wayawaya ti relihion idiay España. Nabiit pay, dagiti Saksi idiay Galicia inaramidda ti tinawen a kumbension distritoda. Kinuna ti maysa a diario iti lugar, ti La Voz de Galicia:
“No kasano a dagiti immuna a Kristiano nagtitiponda kadagiti katakumba tapno aramidenda dagiti seremoniada, nga iparit dagiti autoridad, kasta met dagiti Saksi ni Jehova idiay Galicia, idi ’50’s, inusarda ti maysa a hórreo. . . . Itan addan 4,000 a [Saksi] kadagiti uppat a probinsia ti Galicia. . . . Itatta, dagiti paggigimonganda—ti estadium a pagay-ayaman a kukua ti munisipio—ket nalawlawan.” Pudno a daytat’ naiduma unay iti nanumo a hórreo! Ket itan, iti intero nga España, addan agarup 80,000 a Saksi iti nasurok a sangaribo a kongregasion!
[Ladawan iti panid 24]
Dakkel a kumbension iti football stadium idiay Barcelona