Nadalus a Daga—Kasapulantay Dayta

Babaen ti koresponsal ti Agriingkayo! idiay Britania

AMMOYO kadi a dagiti tsuper iti taxi idiay London masapul a tungpalenda ti linteg a panangsalimetmet a nadalus iti taxida? Ti saan a panangaramid iti dayta mabalin nga agbanag iti pannakaparitda nga agtaray kadagiti kalkalsada iti siudad iti sumagmamano a tiempo. Uray pay no dakes ti kasasaad ti kalsada ken kaaduan a kotse ti kankanayon a narugit iti adu nga al-aldaw, ti taxi ti London ket nakadaldalus. Ti nasileng a rabaw ti taxi tignayenna ti panagpannakkel ken ragsak ti tsuper ken dagiti pasaherosna.

Umasping iti dayta, no ti pagtaengantayo, dagiti kawestayo, ken dagiti sanikuatayo ket nadalus, dayta pasayaatenna ti panagrikriknatayo. Mabalin nga agsagaba ti panagladingit ti maysa nga eskuela a lalaki a nakita ni nanangna a simrek iti balay ket nangibati iti pitak iti alpombra gapu iti narugit a botana!

Kinapudnona, ti nasayaat a salun-at agpannuray iti kasta unay iti personal a panagdaldalus. Ti bagitayo kasapulanna ti kankanayon a panangaywan ken panangdalus tapno ikkaten dagiti rugit a mabalin a pagtaudan iti sakit. Dagiti kompania iti negosio adut’ maganansiada iti panaglako kadagiti pagdalus, detergent, paglampaso, sabon, shampoo. ken pagdisimpekta nga usarentayo tapno dalusantayo ti bagbagitayo ken ti aglawlawtayo. Sigurado, kaaduan a tattao sipapanunotda iti pannakaspaul ti panagdalus. Ngem no agnanaedkayo iti maysa a siudad, ammoyo a saan a kastoy ti intero a kasasaad.

Peggad—Polusion

Dagiti agnanaed iti siudad pagaammoda unay ti polusion ken ti namulitan nga aglawlaw. Makitada daytoy kadagiti nakolekta a basura, kadagiti rugit a nabaybay-an nga awan arnasna kadagiti kalsada, ken kadagiti naalas a sursurat kadagiti diding dagiti patakder publiko. Maangotda dagitoy kadagiti makaeppes nga asuk gapu iti nakaro a trapiko ken ti nabangsit nga angep a nangsaplit kadagiti dadduma a siudad.

Nalabit dayta ti makagapu no apay nga adu kadagiti agnanaed iti siudad padasenda no dadduma ti mangbusbos iti tiempo iti probinsia. Tagiragsakenda ti mangpunno kadagiti barada iti nadalus nga angin, nalabit uminum pay iti nakalitlitnaw a danum manipud iti ubbog iti bantay. Daddumat’ mapan kadagiti igid ti baybay ket agrelaks iti darat wenno agpalamiis iti nasayaat a panagbatok iti baybay.

Nupay kasta, aguray bassit! Agur-uray met sadiay ti rugit ken ti polusion. ‘Kasano a kasta?’ mabalin nga imtuodenyo. ‘Nakadaldalus ti itsurana.’ Bueno, kitaentayo a naimbag dayta “nadalus” nga angin ken “nalitnaw” a danum.