Parke Nasional ti Yosemite—100 ti Edadnan

TI BASTA panagbiahe a sumrek iti kabambantayan manipud Merced, California, E.U.A., dandani dinakay isagana iti makakayaw a mabuya a mangkablaaw kadakayo no rummuarkayon iti usok iti haywey. Dagus a masdaawkayo iti nakadakdakkel a Ginget ti Yosemite, nga addaan kadagiti nagdadakkelan a di agpapada ti katayagna a bambantay a tumangkayag iti ngatuen ti tukok ti ginget, a dayta a mismo ket 1,200 metros iti ngatuen iti patas ti baybay. Iti kannigid, ti El Capitan tumakder iti 1,100 metros; iti kannawan daytat’ aduan palma a dissuor ti Bridalveil, agraman ti 190 metros a dissuorna; iti adayot’ bassit iti kannawan isut’ dakkel a bato a kasla Half Dome, a tumayag iti 2,698 metros. Kellat unay daytoy a buya ken makakayaw. Maipalagip dagiti sasao: “Ti Bato [ni Jehova], naan-anay dagiti aramidna.”—Deuteronomio 32:4.

Minilion a tattao manipud iti isuamin a lubong ti nangtagiragsaken iti kinapintas ken kinatan-ok ti Parke Nasional ti Yosemite nanipud idi indeklara ti U.S. Congress a kasta idi 1890. Nasapsapa pay idi 1864, ti Ginget ti Yosemite inteden ti Kongreso iti California a kas parke publiko. Itan, iti kaaduanna, ti Yosemite mapmapnon kadagiti tattao. Ngem no sapsapulenyo ti panagwaywayas, mabalin a situturedkayo a mapan iti High Sierra ket kitaenyo ti intero a buya manipud iti panangmatmat ti maysa nga agila.