Mabisin-Damag a Siglo
DAGITI tattao kankanayon a kayatda a madamag dagiti maar-aramid a bambanag iti aglawlawda. Kayatda ti mapakaammuan a dagus iti aniaman a naisangsangayan a banag a mapasamak. Maysa a nalatak a mensahero ket mannakigubat nga idi 490 K.K.P. tinarayna ti agarup 40 kilometros a nagturong idiay Atenas tapno iyanunsiona ti pannakaabak dagiti buyot ti Persia. Isut’ makuna a natay idi simmangpet kalpasan ti panangiyanunsiona ti panagballigi idiay Marathon.
Itatta, agarup 600 milion a telebision ken 1.4 bilion a radio ti mangiyeg kadagiti damag a mapaspasamak iti sumagmamano laeng nga oras wenno uray pay sumagmamano laeng a minutos sakbayna kadagiti pagtaengan iti sangalubongan. Dadduma a paspasamak ti makita pay a mismo, bayat a mapaspasamakda. Ket adu a ginasut a milion a diario, agraman dagiti pinullo a milion a magasin, ti maiprenta iti inaldaw kadagiti pinullo a pagsasao tapno penneken ti mabisin-damag a lubong.
Ti imbento ni Johannes Gutenberg nakurkurang ngem 550 a tawtawenen ti napalabas a pagimprentaan nga addaan kadagiti mayakar-akar a tipo ti namagbalin a naparpartak ti panagsaknap dagiti naiprenta a damdamag. Dagiti immuna a baro a diario, nupay kasta, ket limitado ti sirkulasionda, ket gapu iti kinanginada, masansan a dagiti laeng babaknang ti makabael kadakuada.
Di nagbayag nagbalinen nga isyu ti wayawaya nga agiprenta. Ti Gazette ni Renaudot, kas pangarigan, ket naipablaak idi maika-17 a siglo nga inanamongan ti ari ti Francia, ket kaaduan kadagiti damag a naiprenta ti iturturong ti gobierno. Sumagmamano a mannurat idi a tiempo ti natured a mangbusor kadagiti autoridad iti pagilianda.
Ti Panagsapul iti Damag Itatta
Ti panagngudot’ maika-19 a siglo inyegna ti yaadu dagiti pagiwarnakan, nangnangruna gaput’ makina a pagimprenta ken ti nakaad-adu a sirkulasion iti inaldaw a diario, nangnangruna idiay Europa ken Norte America.
Di nagbayag dagiti baro a pamay-an, nangnangruna ti radio, maus-usaren a mangisaknap iti damag iti sabali a daga. Idi 1917, kas pangarigan, bayat ti Rebolusion a Russo, ti transmitter iti radio iti bilog nga Aurora ti nangtignay kadagiti umili iti Petrograd (itan Leningrad) nga umalsa.
Bayat ti Gubat Sangalubongan II, ti radio nagbalin a nakabilbileg nga instrumento maipaay iti propaganda, nangnangruna maipaay iti Nazi nga Alemania. Bayat dayta a gubat ti BBC (British Broadcasting Corporation) idiay London impadamagna met dagiti damag iti Aliado iti dakkel a paset iti Europa ken iti lubong.
Nupay no ti telebision ket maeks-eksperimenton sakbay ti Gubat Sangalubongan II, pinabannayat ti gubat ti irarang-ayna. Nupay kasta, rimmang-ayen dayta kas mangiyallatiw iti damdamag. Itatta, ti programa ti telebision maipapan kadagiti damdamag ket buybuyaenen dagiti ginasut a milion.
Iti nabiit pay a dekada rinugianen ti pagiwarnak ti nangpataud kadagiti adu a naisangsangayan a publikasion. Kalpasan iti Gubat Sangalubongan II, naipablaak dagiti linawas a magasin a nangusig kadagiti damag. Dagiti magasin a mangawis kadagiti agtutubo, babbai, tattao a retirado, dagiti managay-ayam, ken dagiti trabahador iti nagduduma a trabaho, uray din dakamaten dagiti linawas a pagrepasuan kadagiti linawas a programa ti telebision, tagtagiragsakenda ti adu a mapaglakuan. Idiay Francia, kas pangarigan, agarup 200 a magasin dagiti damdamag ti agparang iti tinawen.
Damdamag iti Masanguanan
Ita mabalinen a magun-odan dagiti pagipempenan kadagiti impormasion babaen kadagiti terminal iti video babaen kadagiti kawing iti telekomunikasion. Dagiti kable ken dagiti sistema ti satelait mangipaaydan kadagiti channel ti telebision (kas iti Estados Unidos) a mangipaay kadagiti damag iti rabii ken aldaw, ket ipadto dagiti dadduma a ti masanguanan iyegnanto ti ad-adu pay iti internasional a kasaknap. Gapuna, ti maika-20 a siglo siuumiso a maawagan iti mabisin-damag a siglo. Ngem kanayon kadi a mapagtalkan ti damag? Ti kadi kinanadumaduma dagiti serbisio iti panangipadamag ipanamnamada ti napudno, awan kilkilinganna a damag?
[Ladawan iti panid 4]
Ti pannakaimbento ni Guttenberg iti pagimprentaan nga addaan kadagiti mayakar-akar a tipo ket dakkel nga addang iti panangisaknap iti damdamag ken kapanunotan