Panangikaskasaba ti Naimbag a Damag iti Adu a Pagsasao
IDI inted ni Jesus ti pagilasinan a mangtanda iti maudi nga al-aldaw, maysa kadagiti pasetna isu ti sangalubongan a panangikasaba iti naimbag a damag iti Pagarian. (Mateo 24:14) Tapno maawatan no apay a ti sangalubongan a panangikasaba kadagiti amin a nasion iti adu a pagsasao di napasamak sakbay daytoy a kaputotan, ken no apay a mapasamak ken mapaspasamaken, masapul nga agsublitayo iti historia. Kas itudo ti diksionario a Webster, saan nga agingga idi maika-15 a siglo, a nasurok a 500 a tawenen a napalabas, a ni Gutenberg nagbalin nga imbentor iti panagimprenta manipud iti mayakar-akar a tipo. Manipud itoy a pangrugian, pinataud ti tao ti pamay-an a mangpataud iti adu a naiyimprenta a panid a maiwaras.
Nasayaat a lagipen a sakbay ti pannakaimbento ti pagimprenta, mammano ti Biblia, ta masapul a makopia dayta babaen iti ima. Makabannog ken nangina ti panangkopia babaen iti ima. Ti pannakaimbento ti maiyakar-akar a tipo ken ti pagimprenta ket maysa a nagdakkelan a rinang-ayan a mamagbalin a posible ti panangimprenta iti Biblia ken dagiti naibatay-Biblia a literatura iti amin a pagsasao.
Nanipud 1914 adda ti kasta unay a panagrang-ay iti panagimprenta ken panagipablaak, a kamaudiananna ti offset press ti mangar-aramid iti kaaduan a trabaho a dati a maar-aramid kadagiti makina a letterpress.
Kadagiti nabiit pay a tawtawen, ti pannakaimbento iti kompiuter pinapartakna pay daytoy a pamay-an. Dagiti karakter, tuldek, ken dadduma a ladawan mabalin a maaramid, masukimat iti kompiuter, ket magun-odan a giddato nga usaren babaen iti panangitalmeg laeng ti maysa a key iti keyboard ti kompiuter. Daytoy pinalakana ti panangipablaak kadagiti material a maipaay kadagiti tattao iti amin a pagsasao iti aglawlaw ti lubong.
Idi 1979 rinugian ti Watchtower Society ti proyekto a maawagan MEPS. Ti MEPS ket napaababa a nagan iti “Multilanguage Electronic Phototypesetting System.” Dagiti kompania a komersial agar-aramidda kadagiti kompiuter a maipaay laeng kadagiti napili a pagsasao a mabalin a pakaganansiaanda iti puonanda. Naiduma ti komision ti Sosiedad. Kuna ti Biblia a masapul a maiwaragawag ti naimbag a damag “iti isuamin a nasion ken tribo ken pagsasao ken tattao.”—Apocalipsis 14:6.
Babaen kadagiti adu kadagiti 93 a sangay iti Sosiedad iti amin a paset ti daga, naaramid ti panagsukimat kadagiti kasasaad ti pagsasao. Maysa a listaan dagiti amin a karakter ken tuldek a kasapulan iti panagiprenta kadagiti literatura kadagiti pagsasao a saklawen ti tunggal sanga ti masapul a mapataud. Kasapulan met dagiti paglintegan iti pannakabingay iti sao maipaay iti tunggal pagsasao. Tunggal karakter ken accent masapul a maaramid, masukimat ti kompiuter, ken maisagana. Daytoy ramanenna ti adu a tawtawen a napasnek a trabaho. Ti resulta ket ti mensahe iti Pagarian mabalinen nga iprenta iti ad-adu a pagsasao ngem idi, ket ti bilangda agtultuloy ti iyaaduna.
Iti pangrugian ti Sosiedad diniseniona ken imbangonna ti bukodna a hardware, ken software ti kompiuter. Dagiti Saksi ni Jehova manipud iti isuamin a lubong immayda timmulong itoy a proyekto. Daytoy ket panagsisinnukat iti paglaingan agraman pammaregta. (Roma 1:12) Daytat’ kasla maysa a pannakabaliktad iti napasamak iti Torre iti Babel. Kalpasan ti naisangsangayan a pannakasanay, ti alikamen, agraman dagiti nasigo a trabahador, naipatulodda kadagiti sanga iti isuamin a lubong. Ti resulta isut’ maysa a nagsayaatan a sistema iti panagipablaak a nausar iti nasurok a sangagasut a dagdaga ken isla iti baybay, a nakabalan a naimbag a mangpataud kadagiti publikasion iti Sosiedad iti agarup 200 a pagsasao.
Kadagitoy naipadto a maudi nga al-aldaw, ti naimbag a damag iti Pagarian ti Dios pudno a maikaskasaban iti amin a nasion ken iti adu a pagsasao.