Panangurnong Kadagiti Tattao Manipud iti Amin a Pagsasao
1 Matungtungpal ti Sao ti Dios! Ti pudno a panagdayaw ket ab-abrasaen dagiti tattao “manipud kadagiti amin a pagsasao ti nasnasion.” (Zac. 8:23) Kasano a tultulongan dagiti Saksi ni Jehova dagiti tattao manipud iti amin a ‘tribu, ili, ken pagsasao’ a maaddaan iti nadalus a takder iti imatang ni Jehova, buyogen ti namnama a makalasat iti “dakkel a rigat”?—Apoc. 7:9, 14.
2 Agtignay ti Organisasion ti Dios: Inyurnos ti Bagi a Manarawidwid a maipablaak dagiti literatura ti Biblia iti agarup 380 a pagsasao tapno dagiti tattao iti amin a paset ti daga silalawag a maawatanda ti kinapateg ti naimbag a damag. Dakkel a trabaho ti panangisagana ken panangipablaak iti literatura iti nakaad-adu a pagsasao. Ramanenna ti panangbukel kadagiti grupo dagiti kualipikado a manangipatarus ken panangipaay kadakuada iti tulong a masapulda iti panangipatarus iti literaturatayo kadagitoy amin a pagsasao, agraman ti panangimprenta ken panangipatulod iti material. Ngem ti kangrunaan ket ti paset dagiti indibidual nga agibumbunannag iti Pagarian, a mangidanon kadagiti tattao iti mangted-biag a mensahe ti Biblia.
3 Panangawat iti Karit: Iti adu a lugar, adu dagiti masarakan ita a tattao a ganggannaet ti pagsasaoda. Tapno maidanon ti naimbag a damag kadagitoy a tattao, umad-adu dagiti adipen ti Dios a mangikagkagumaan nga agsursuro iti Tsino, Ruso, Espanõl, wenno dadduma pay a pagsasao a maar-aramat iti lugarda. Adda met dagiti agad-adal iti Sign Language. Idiay laengen Estados Unidos, adda agarup 2,900 a kongregasion ken 240 a grupo a mangaskasaba babaen ti 38 a pagsasao malaksid iti Ingles. Dagiti dadduma a tattao a saan a nakangkangngeg iti maipapan ken Jehova wenno awan ammoda maipapan iti Biblia ket ipangpangagda ti kinapudno a masarakan iti Sao ti Dios.—Roma 15:21.
4 Maikagumaantayo kadi nga ad-adda nga ipakaammo ti naimbag a damag kadagiti tattao iti teritoriatayo a sabali ti kulturada? (Col. 1:25) Adu a kongregasion ti mangaskasaba iti komunidad dagiti ganggannaet. Dagiti agibumbunannag sursuruenda nga umuna ti pagsasao tapno makaipaayda iti simple a presentasion, kas iti: “Komusta. Adda naimbag nga ipadamagmi kenka. [Kalpasanna, mangitukon iti tract wenno broshur iti dayta a pagsasao.] Sige, mapankamin.” Pudno a bembendisionan ni Jehova ti kasta a bassit a panangirugi!
5 Ti mensahe ti Pagarian ket makaay-ayo kadagiti tattao iti amin a kasasaad ken pagsasao. Gundawayantayo nga iranud dayta kadakuada.