Dagiti Tattao “Manipud Kadagiti Amin a Pagsasao” Mangmangngeganda ti Naimbag a Damag
“Sangapulo a lallaki manipud kadagiti amin a pagsasao ti [agkuna]: ‘Kumuyogkaminto kadakayo, ta nangngegmi a ti Dios adda kadakayo.’”—ZACARIAS 8:23.
1. Kasano nga impaay ni Jehova ti kasayaatan a tiempo ken kasasaad tapno mayussuat ti trabaho a panangasaba kadagiti nagduduma a pagsasao ken puli?
NAGSAYAAT la ketdi ti tiempo ken kasasaad. Aldaw idi dayta ti Pentecostes 33 K.P. Sumagmamano a lawas sakbayna, dagiti Judio ken proselita manipud iti di kumurang a 15 a rehion a sakup ti Imperio ti Roma nagaaripunoda idiay Jerusalem tapno rambakanda ti Paskua. Imbes a mariroda a kas iti napasamak iti nagkauna a Babel, iti dayta nga aldaw rinibu kadakuada ti silalawag a nakangngeg kadagiti ordinario a tattao a napnuan iti nasantuan nga espiritu a mangipakpakaammo iti naimbag a damag iti nagduduma a lenguahe a maus-usar iti masakupan ti imperio. (Aramid 2:1-12) Nagserbi dayta a pasamak kas tanda a naipasdeken ti kongregasion Kristiano ken nayussuat ti trabaho a panangasaba kadagiti nagduduma a pagsasao ken puli, ket nagtultuloy dayta agingga iti kaaldawantayo.
2. Kasano a ‘pinagmalanga’ dagiti adalan ni Jesus ti nagduduma a tattao nga agdengdengngeg kadakuada idi Pentecostes 33 K.P.?
2 Mabalin a makapagsao idi dagiti adalan ni Jesus iti kadawyan a Griego, ti lenguahe nga us-usaren ti kaaduan idi a panawen. Agsaoda met idi iti Hebreo, ti lenguahe a maar-aramat iti templo. Ngem idi aldaw ti Pentecostes, ‘pinagmalangada’ dagiti agdengdengngeg kadakuada babaen ti panagsaoda iti nagduduma a nakayanakan a lenguahe dagiti tattao. Ania ti resultana? Natukay ti puso dagiti agdengdengngeg gapu kadagiti agkakapateg a kinapudno a nangngegda iti pagsasao a nakayanakanda. Iti ngudo dayta nga aldaw, dimmanon iti nasurok a 3,000 ti bilang ti bassit a grupo dagiti adalan!―Aramid 2:37-42.
3, 4. Kasano a nagsaknap ti trabaho a panangasaba idi pimmanaw dagiti adalan manipud Jerusalem, Judea, ken Galilea?
3 Kalpasan dayta a nakalalagip a pagteng, nangrugi idiay Jerusalem ti agsasaruno a pannakaidadanes, ket “dagidiay naiwarawara nagsaknapda iti daga nga idekdeklarada ti naimbag a damag ti sao.” (Aramid 8:1-4) Kas pagarigan, mabasatayo iti Aramid kapitulo 8 ti maipapan ken ni Felipe, maysa nga ebanghelisador a nabatad a makapagsao iti Griego. Nangasaba ni Felipe kadagiti Samaritano. Kinasabaanna met ti maysa nga Etiope nga opisial a nangipangag iti mensahe maipapan ken Kristo.―Aramid 6:1-5; 8:5-13, 26-40; 21:8, 9.
4 Naipasango dagiti Kristiano iti dakkel a karit gapu ta sabali ti kultura ken pagsasao dagiti umili kadagiti lugar nga immakaranda nga adda iti ruar ti Jerusalem, Judea, ken Galilea. Mabalin a dagiti laeng Judio ti nakasabaan ti dadduma kadakuada. Ngem ipadamag ni adalan a Lucas: “Adda sumagmamano kadakuada a lallaki a taga Chipre ken Cirene nga immay idiay Antioquia ket rinugianda a kasao dagiti tattao a Griego ti pagsasaoda, nga idekdeklarada ti naimbag a damag ni Apo Jesus.”—Aramid 11:19-21.
Ti Mensahe ti Di Mangidumduma a Dios Agpaay iti Isuamin
5. Kasano a ti naimbag a damag paneknekanna a di mangidumduma ni Jehova?
5 Ti kasta a panagrang-ay ket maitunos iti galad ti Dios; saan a manangidumduma. Kalpasan nga inatur ni Jehova ti panangmatmat ni apostol Pedro kadagiti Gentil, siyayaman a kinunana: “Iti kinapudnona makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35; Salmo 145:9) Idi a ni apostol Pablo, a sigud a mangidaddadanes kadagiti Kristiano, indeklarana a ‘pagayatan ti Dios a maisalakan koma dagiti amin a kita ti tattao,’ pinasingkedanna a saan a mangidumduma ti Dios. (1 Timoteo 2:4) Nalawag a saan a mangidumduma ti Namarsua yantangay linuktanna ti namnama ti Pagarian kadagiti tattao aniaman ti sekso, rasa, puli, wenno pagsasaoda.
6, 7. Aniada a padto ti Biblia ti nangipakpakauna iti pannakaisaknap ti naimbag a damag iti nagduduma a pagsasao ken nasion?
6 Sinigsiglo sakbayna, naipadton daytoy a sangalubongan a panagrang-ay. Sigun iti padto ni Daniel, “adda naited [ken ni Jesus] a panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo.” (Daniel 7:14) Matungtungpal dayta a padto ti Biblia kas paneknekan ti pannakaipablaak daytoy a magasin iti 151 a lenguahe ken pannakaiwarasna iti sangalubongan isu a mabasayo ti maipapan iti Pagarian ni Jehova.
7 Impakpakauna ti Biblia ti maysa a panawen inton dagiti tattao iti nagduduma a pagsasao mangngegda ti mangted-biag a mensahe. Iti panangiladawanna no kasano a ti adu ket mayadani iti pudno a panagdayaw, impadto ni Zacarias: “Mapasamakto kadagidiay nga aldaw a sangapulo a lallaki manipud kadagiti amin a pagsasao ti nasnasion kumpetdanto, wen, pudno a kumpetdanto iti pandiling ti maysa a lalaki a Judio, a kunkunada: ‘Kumuyogkaminto kadakayo, ta nangngegmi a ti Dios adda kadakayo.’” (Zacarias 8:23; Galacia 6:16) Iti met panangisalaysayna iti nasirmatana, kinuna ni apostol Juan: “Adtoy! maysa a dakkel a bunggoy, nga awan ti tao a nakabael a mangbilang, manipud kadagiti amin a nasion ken kadagiti tribu ken kadagiti ili ken kadagiti pagsasao, a sitatakderda iti sanguanan ti trono ken iti sanguanan ti Kordero.” (Apocalipsis 7:9) Nakitatayo no kasano a natungpal dagiti kasta a padto!
Panangdanon iti Amin a Kita ti Tattao
8. Iti kaaldawantayo, apay a kasapulan a mangaramidtayo iti panagbalbaliw mainaig iti trabahotayo a panangasaba?
8 Umad-adu ita ti umak-akar kadagiti sabali a pagilian gapu iti globalisasion. Umariwekwek a tattao manipud kadagiti lugar a narigat ti biag ken adda panaggugubat ti nagkamang kadagiti pagilian a nasalsaliwanwan ti panagbiag. Iti adu a pagilian, timmaud ti dadakkel a komunidad dagiti ganggannaet nga imigrante ken nagbakuit. Kas pagarigan, idiay Finland adda nasurok a 120 a pagsasao; idiay Australia adda nasurok a 200 a pagsasao. Iti maysa laeng a siudad iti Estados Unidos―ti San Diego―nasurok a 100 a pagsasao ti mangmangngegan!
9. Ania ti rumbeng a panangmatmattayo iti kaadda dagiti ganggannaet a tattao iti teritoriatayo?
9 Kas Kristiano, matmatantayo kadi a bangen iti ministeriotayo dagiti tattao a ganggannaet ti pagsasaoda? Saan a pulos! Imbes ketdi, matmatantayo dayta kas maysa a gundaway tapno ad-adu ti makasabaantayo―‘taltalon a pimmuraw maipaay iti pannakaani.’ (Juan 4:35) Ikagumaantayo nga ipaay dagiti kasapulan dagiti tattao a maseknan kadagiti naespirituan a kasapulanda, aniaman ti nasion wenno pagsasaoda. (Mateo 5:3) Kas resultana, iti kada tawen agbalbalin nga adalan ni Kristo ti umad-adu a bilang dagiti tattao manipud iti ‘tunggal pagsasao.’ (Apocalipsis 14:6) Kas pagarigan, agingga idi Agosto 2004, agarup 40 a pagsasao ti maar-aramat iti panangasaba idiay Alemania. Maikaskasaba met ti naimbag a damag idiay Australia iti dandani 30 a pagsasao, idinto ta 18 a pagsasao ti maar-aramat sangapulo laeng a tawen ti napalabas. Idiay Grecia, mangaskasaba dagiti Saksi ni Jehova iti dandani 20 a pagsasao. Iti sangalubongan, agarup 80 porsiento kadagiti Saksi ni Jehova ti makapagsao iti lenguahe malaksid iti Ingles, ti kasaknapan a lenguahe iti intero a lubong.
10. Ania ti paset ti tunggal agibumbunannag no maipapan iti panangaramid iti ad-adalan kadagiti tattao iti “amin a nasion”?
10 Talaga a maitungtungpal ti bilin ni Jesus a ‘mangaramid iti ad-adalan kadagiti tattao iti amin a nasion’! (Mateo 28:19) Gapu ta magagaranda a mangitungpal iti dayta a bilin, aktibo dagiti Saksi ni Jehova iti 235 a dagdaga, a mangiwarwarasda kadagiti literatura iti nasurok nga 400 a pagsasao. Nupay ipapaay ti organisasion ni Jehova ti material a kasapulan tapno madanon dagiti tattao, dagiti indibidual nga agibumbunannag iti Pagarian ti addaan iti obligasion a mangipakaammo iti mensahe ti Biblia kadagiti “amin a kita ti tattao” iti lenguahe a nalakada a maawatan. (Juan 1:7) Babaen daytoy a sangsangkamaysa a panagregget, minilion a tattao manipud iti nagduduma a pagsasao ti magunggonaan iti naimbag a damag. (Roma 10:14, 15) Wen, napateg ti paset ti tunggal maysa kadatayo!
Panangsaranget iti Karit
11, 12. (a) Aniada a karit ti nasken a sarangtentayo, ken kasano a tumulong ti nasantuan nga espiritu? (b) Apay a masansan a makatulong no kasabaantayo dagiti tattao iti bukodda a pagsasao?
11 Adu ita nga agibumbunannag iti Pagarian ti agtarigagay a makasursuro iti sabali a lenguahe, ngem saan a milagro nga ipaay ti espiritu ti Dios ti abilidad nga agsao iti sabali a lenguahe. (1 Corinto 13:8) Agkalikagum iti dakkel a panagregget ti panagsursuro iti baro a lenguahe. Uray dagidiay makapagsao iti maikadua a lenguahe nalabit a kasapulan nga ibagayda ti panagpampanunot ken pamay-anda tapno mapagbalinda a makaay-ayo ti mensahe ti Biblia kadagidiay mangar-aramat iti dayta a lenguahe ngem naiduma ti nalikudan ken kulturada. Maysa pay, masansan a managbabain dagiti baro nga imigrante; kasapulan ti panagregget tapno matarusan ti panagpampanunotda.
12 Nupay kasta, agtigtignay ti nasantuan nga espiritu kadagiti adipen ni Jehova tapno matulonganda dagiti tattao a sabali ti pagsasaoda. (Lucas 11:13) Imbes a milagro nga ipaayna ti abilidad a makapagsao iti sabali a lenguahe, maparayray ti espiritu ti Dios ti tarigagaytayo a makisarita kadagiti tattao a ganggannaet ti pagsasaoda. (Salmo 143:10) Mabalin a maawatan dagiti tattao ti mensahe ti Biblia uray no ikasaba wenno isurotayo dayta kadakuada iti saanda a lenguahe. Ngem tapno matukaytayo ti puso dagiti agdengdengngeg, nasaysayaat nga usarentayo ti bukodda a pagsasao―ti lenguahe a maawatan ti rikna, motibo, ken namnamada.―Lucas 24:32.
13, 14. (a) Ania ti mangtigtignay kadagiti dadduma a tumulong iti teritoria a ganggannaet ti pagsasaona? (b) Kasano a maiparparangarang ita ti espiritu ti panagsakripisio?
13 Adu nga agibumbunannag iti Pagarian ti timmulong kadagiti teritoria a ganggannaet ti pagsasaoda apaman a nakitada ti positibo a reaksion dagitoy iti kinapudno iti Biblia. Rimmegta met ti dadduma idi nagbalin ti ministerioda nga ad-adda a makakarit ken makapainteres. “Adu kadagidiay naggapu iti Makindaya a Europa ti mawaw iti kinapudno,” kuna ti maysa a sanga nga opisina dagiti Saksi ni Jehova iti makin-abagatan a Europa. Anian a makapnek ti tumulong kadagiti kasta a manangipangag nga indibidual!―Isaias 55:1, 2.
14 Ngem tapno agbalintayo a nabunga iti daytoy a trabaho, kasapulantayo ti determinasion ken panagsakripisio. (Salmo 110:3) Kas pagarigan, adu a Saksi a pamilia a Hapon ti nangpanaw kadagiti nasaliwanwan a pagtaenganda kadagiti dadakkel a siudad ket immakarda kadagiti nasulinek a lugar tapno tulonganda dagiti Tsino nga imigrante nga agadal iti Biblia. Iti makinlaud a kosta ti Estados Unidos, regular nga agmaneho dagiti agibumbunannag iti uneg ti maysa wenno dua nga oras tapno iyadalanda iti Biblia dagiti Filipino. Idiay Norway, adda Saksi nga agassawa a mangyad-adal iti maysa a pamilia a taga-Afghanistan. Us-usaren ti agassawa ti Ingles ken Norwego nga edision ti broshur nga Ania ti Kalikaguman ti Dios Kadatayo?a Basaen ti pamilia ti parapo iti Persiano, maysa a lenguahe nga umarngi unay iti nakayanakanda a lenguahe a Dari. Agpapatangda iti Ingles ken Norwego. Ti kasta nga espiritu ti panagsakripisio ken pannakibagay ket sibabaknang a magunggonaan no ipangag dagiti ganggannaet ti naimbag a damag.b
15. Kasano a maaddaantayo amin iti pannakipaset iti trabaho a panangasaba kadagiti nadumaduma a pagsasao?
15 Mabalinyo kadi ti makiraman iti daytoy nga aktibidad mainaig kadagiti nagduduma a pagsasao? Apay a diyo rugian babaen ti panangpaliiwyo no ania a ganggannaet a pagsasao ti gagangay a maar-aramat iti teritoriayo? Kalpasanna, mabalin a mangitugotkayo kadagiti polieto wenno broshur nga adda kadagita a pagsasao? Ti bokleta a Good News for People of All Nations, a nairuar idi 2004, ket nakatulong iti pannakaisaknap ti namnama ti Pagarian babaen ti simple, positibo a mensahe a linaonna iti adu a lenguahe.―Kitaenyo ti artikulo a “Good News for People of All Nations” iti panid 32.
“Ayatenyo ti Ganggannaet nga Agnanaed”
16. Kasano a maipakita dagiti panglakayen nga ipangpangrunada ti pagimbagan dagiti tattao a ganggannaet ti pagsasaoda?
16 Ammotayo man ti agsao iti sabali a lenguahe wenno saan, makatulongtayo amin iti naespirituan a panangisuro kadagiti ganggannaet iti lugartayo. Binilin ni Jehova ti ilina nga ‘ayatenda ti ganggannaet nga agnanaed.’ (Deuteronomio 10:18, 19) Kas pagarigan, iti maysa a dakkel a siudad iti Makin-amianan nga America, lima a kongregasion ti aggigimong iti maymaysa a Kingdom Hall. Kas iti adu a kongregasion, adda tinawen a panagsisinnukat iti oras ti gimong, a mangapektar iti gimong dagiti Tsino ta mayakar dayta iti naladladaw nga oras ti Domingo. No masurot dayta nga eskediul, adu nga imigrante nga agtartrabaho kadagiti restawran ti saan a makatabuno. Dagiti panglakayen iti dadduma a kongregasion ket siaayat a nangaramid iti panagbalbaliw tapno maangay iti nasapsapa nga oras ti Domingo dagiti Tsino a gimong.
17. Ania ti rumbeng a panagriknatayo no ikeddeng dagiti dadduma ti umakar tapno tumulong iti grupo a ganggannaet ti pagsasaona?
17 Dagiti naayat a manangaywan komendaranda dagiti kualipikado ken nasigo a kakabsat nga agtarigagay nga umakar tapno tumulong kadagiti grupo a ganggannaet ti pagsasaoda. Dagiti kasta nga eksperiensiado a mannursuro iti Biblia ti mabalin a kailiwto ti kongregasion a naggapuanda, ngem marikna dagiti manangaywan ti narikna dagiti panglakayen idiay Listra ken Iconio. Dagidi a panglakayen dida linapdan a makikuyog ni Timoteo ken ni Pablo, nupay maysa ni Timoteo nga adigi ti kongregasionda. (Aramid 16:1-4) Maysa pay, dagidiay mangidadaulo iti trabaho a panangasaba dida pakaupayan ti nagduduma a panangmatmat, kostumbre, wenno kababalin dagiti ganggannaet. Imbes ketdi, maawatanda dayta a panagduduma ket mangbirokda kadagiti pamay-an a mangpatanor iti nasayaat a relasion maigapu iti naimbag a damag.―1 Corinto 9:22, 23.
18. Ania a dakkel a ruangan ti panagaramid ti silulukat iti isuamin?
18 Kas naipadto, ti naimbag a damag ket maikaskasaba iti “amin a pagsasao dagiti nasion.” Agtultuloy ti dakkel a potensial ti panagrang-ay kadagiti teritoria a ganggannaet ti pagsasaoda. Rinibu a manangikagumaan nga agibumbunannag ti simrek iti daytoy a “dakkel a ruangan a mangiturong iti panagaramid.” (1 Corinto 16:9) Ngem adda pay dadduma a kasapulan tapno maparang-ay dagiti kasta a teritoria, kas ipakita ti sumaganad nga artikulo.
[Footnotes]
a Impablaak dagiti Saksi ni Jehova.
b Para iti kanayonan a pagarigan, kitaenyo ti “Sibabaknang a Nabendisionankami Gapu Kadagiti Babassit a Panagsakripisio,” iti Ti Pagwanawanan, Abril 1, 2004, panid 24-8.
Mailawlawagyo Kadi?
• Kasanotayo a matulad ti saan a panangidumduma ni Jehova kadagiti amin a tattao?
• Ania ti nasken a panangmatmattayo kadagiti tattao iti teritoriatayo a sabali ti pagsasaoda?
• Apay a nasaysayaat no kasabaantayo dagiti tattao iti bukodda a pagsasao?
• Kasanotayo a maipakita a maseknantayo kadagiti ganggannaet iti lugartayo?
[Mapa/Ladawan iti panid 23]
(Para iti aktual a pannakaurnosna, kitaem ti publikasion)
Roma
CRETA
ASIA
FRIGIA
PAMFILIA
PONTO
CAPADOCIA
MESOPOTAMIA
MEDIA
PARTIA
ELAM
ARABIA
LIBYA
EGIPTO
JUDEA
Jerusalem
[Bagi ti danum]
Baybay Mediteraneo
Nangisit a Baybay
Nalabaga a Baybay
Gulpo ti Persia
[Ladawan]
Iti Pentecostes 33 K.P., dagiti tattao manipud iti 15 a rehion ti Imperio ti Roma nangngeganda ti naimbag a damag iti pagsasao a nakayanakanda
[Dagiti Ladawan iti panid 24]
Adu a ganggannaet ti nangipangag iti kinapudno iti Biblia
[Ladawan iti panid 25]
Karatula ti Kingdom Hall iti lima a nagduduma a lenguahe