No Apay Impalubos ti Dios ti Panagsagaba

“Saan nga agtaud iti tao a magna ti panangiturong kadagiti addangna. O Jehova, dusaennak.”—Jeremias 10:23, 24.

DAGIDIAY a sasao naisuratda rinibribo a tawenen kalpasan ti pannakaparsua dagiti tattao. Nabigbig ni Jeremias nga agingga idi kaaldawanna, makadidigra ti natauan a historia no idilig iti nagsayaat a nangrugian nga inted ti Dios iti immuna a nagannaktayo.

Napatalgedan ti kapaliiwan ni Jeremias babaen iti rekord iti nasurok a 2,500 a kanayonan a tawtawen iti historia nanipud idi tiempona. Kimmaro ti nakalkaldaang a kasasaad ti tao. Aniat’ dakes a napasamak?

Di Umiso a Panangusar ti Wayawaya nga Agpili

Napukaw dagiti immuna a nagannaktayo ti panangbigbig a saanda a naparsua a rumang-ay a naisina iti Dios ken kadagiti linlintegna. Inkeddengda ti agwayawaya manipud iti Dios, a pagarupenda a mapasayaatda ti biagda. Ngem daytoy ket panangabuso iti wayawayada. Rimmuarda iti inkeddeng ti Dios a limitasion iti wayawaya nga agpili.—Genesis, kapitulo 3.

Apay a saan a basta dinadadael ti Dios da Adan ken Eva ket nangrugi manen iti sabali a paris a tao? Gapu ta ti kinasoberanona iti uniberso ken ti pamay-an ti panagiturayna naikabil iti panagduadua. Ti saadna a Mannakabalin-amin a Dios ken ti Namarsua kadagiti amin a parsua ti nangted kenkuana ti kalintegan a mangituray kadakuada. Yantangay isut’ Masirib-iti-Isuamin, ti turayna ti kasayaatan para kadagiti amin a parsua. Ngem itan nakariten ti turay ti Dios.

Nasaysayaat kadi ti kasasaad ti tao no saan nga iturayan ti Dios? Pudno nga ammo ti Namarsua ti sungbat dayta a saludsod. Ti sigurado a pamay-an dagiti tattao a mangammo iti dayta isut’ panangipalubosna kadakuada iti awan limitasionna a wayawaya a tartarigagayanda. Ngarud, ti maysa a rason, malaksid kadagiti dadduma, no apay impalubos ti Dios ti kinadakes ken ti panagsagaba isut’ panangipakita nga awan ti aniaman a panagduadua no ti turay ti tao nga awan ti Dios ket agballigi.a

Inyeg ni Adan ken ni Eva ti panagsagaba iti bagbagida met laeng ken kadagiti annakda. ‘Inanida ti immulada.’ (Galacia 6:7) “Dakes ti inaramidda kenkuana; isuda saan ida nga annak [ti Dios], dayta ti pilawda.”—Deuteronomio 32:5.

Napakdaaran dagiti immuna a nagannaktayo a ti panagwaywayas a naisina iti turay ti Dios mabalin nga agbanag iti ipapatayda. (Genesis 2:17) Daytat’ napaneknekan a kinapudno. Babaen iti panangpanawda iti Dios, pinanawanda ti gubuayan iti salun-at ken biagda. Kimmapuyda agingga a natayda.—Genesis 3:19.

Kalpasanna, impalubos ti Dios ti umdas a tiempo maipaay iti natauan a pamilia tapno idemostrana a naan-anay no ti aniaman a napolitikaan, sosial, wenno ekonomiko a sistema a pinataudda a naisina iti turayna pudno a naan-anayto a makapnek. Makaipaayto kadi ti aniaman kadagitoy a sistema iti naragsak, natalna a lubong nga awanan ti krimen wenno gubat? Makapataudto kadi ti aniaman kadagitoy ti namaterialan nga irarang-ay? Maparmeknanto kadi ti sakit, panaglakay, ken ipapatay? Nadisenio ti turay ti Dios a mangibanag kadagitoy amin.—Genesis 1:26-31.

No Aniat’ Isuro ti Panaglabas ti Tiempo

Di nagbayag impabigbigen ti historia ti kinapudno ti Roma 5:12 “Nagsaknap ti ipapatay kadagiti isuamin a tao.” Ilawlawag daytoy a bersikulo ti “iseserrek ti basol ditoy lubong gapu iti maymaysa a tao ken ti ipapatay gapu iti basol.” Idi immalsa dagiti immuna a nagannaktayo iti turay ti Dios, nagbalin nga addaan depekto, imperpekto. Daytoy laeng a depekto ti maipasada kadagiti annakda. Kas banagna, datay amin naipasngaytayo nga addaan depekto, nalaka nga agsakit ken matay.

Ti panaglabas ti tiempo ipalgakna met no kasano a napnapno ti dakes ti panagtignay dagiti tattao iti maysa ken maysa. Adda dagiti di mabilang a narungsot a gubgubat, dagiti panaggugura dagiti rasa ken relihion, dagiti inkisision, ken ti kasta unay a nagadu a kita iti krimen, ken ti kinaagum ken kinabuklis. Mainayon pay, ti kinapanglaw ken bisin biniktimanan dagiti adu a milion a tattao.

Bayat ti napalabas a rinibribo a tawen, ti sangatauan pinadasna ti amin a mapanunot a kita iti gobierno. Kaskasdi, agsasaruno a dida nagballigi a nangpennek iti kasapulan ti tao. Nabiit pay, dagiti gobierno a Komunista di naawat kadagiti adu a dagdaga. Kadagiti demokratiko a nasnasion adda ti nakaro a krimen, kinapanglaw, di kinatalged ti ekonomia, ken ti kinadakes. Pudno unay, amin a kita ti gobierno ti tao napaneknekan a nagkurang.

Kasta met, impalubos ti Dios ti tiempo para kadagiti tattao a makagtengda iti kangitingitan iti sientipiko ken material a naaramidanda. Ngem pudno kadi nga irarang-ay no ti bai ken pana sinukatanen dagiti nuklear a misil? no makapagbiahen ti tao iti law-ang ngem di makapagnaed a sangsangkamaysa a sitatalna ditoy daga? no dagiti minilion a tattao maamakda a rummuar iti rabii gapu iti krimen?

Ti ipakita ti panangsubok iti tiempo ket saanen a ‘maiturong [dagiti tattao] dagiti addangda’ a sibaballigi a kas iti saanda a panagbiag nga awan ti taraon, danum, ken angin. Nadiseniotayo nga agpannuray iti panangiwanwan iti Nangaramid kadatayo a kas iti sigurado a pannakaparsuatayo nga agpannuray iti taraon, danum, ken angin.—Mateo 4:4.

Babaen ti panangipalubos iti kinadakes ken panagsagaba, namimpinsan nga impakita ti Dios iti amin a tiempo dagiti nakalkaldaang a pagbanagan iti di umiso a panangusar iti wayawaya nga agpili. Daytoy ket nakapatpateg a sagut ta imbes nga ikkaten ti wayawaya nga agpili kadagiti tao, impalubos ti Dios a makitada ti kaipapanan ti di umiso a panangusar iti dayta.

No maipapan iti wayawaya nga agpili, ti publikasion nga “Statement of Principles of Conservative Judaism” kunaenna: “No awan ti posibilidad a dagiti tattao mangaramidda iti di umiso a pili no mapasanguan iti naimbag ken dakes, ti intero a kapanunotan nga agpili awan ti pategna. . . . Adu a panagsagaba ti lubong ket direkta a resulta iti di umiso a panangusar iti wayawaya nga agpili a naited kadatayo.”

Sigurado, umiso ni Jeremias idi kinunana: “Saan nga agtaud iti tao a magna ti panangiturong kadagiti addangna.” Ket umiso met ni Salomon idi kinunana: “Ti tao addaan pannakabalin iti sabali a maipaay iti pagdaksanna.”—Eclesiastes 8:9.

Nakabilbileg, dayta iyilustrarna ti di pannakabael ti tao a mangpukaw iti panagsagaba. Uray pay ni Salomon, agraman dagiti amin a kinasiribna, kinabaknangna, ken pannakabalinna dina mapalinteg ti rigat nga agtataud iti panangituray ti tao.

Kasano, ngarud, nga iyeg ti Dios ti panagpatingga iti panagsagaba? Gunggonaannanto kadi dagiti tattao kadagiti napalabas a panagsagabada?

[Footnote]

[Ladawan iti panid 9]

Nangted ti Dios iti naan-anay a nangrugian ti sangatauan, ngem ipakita ti historia a no agwaywayas a maisina iti Dios dagiti tattao saanda a ‘maiturong dagiti addangda’ a sibaballigi