Manipud Managbasatayo
Makeup Agtartrabahoak kas maysa a makeup artist ket nasarakak ti artikulo nga “Agimtuod dagiti Agtutubo . . . Kasanot’ Panangusarko a Siuumiso iti Makeup?” (Hunio 22, 1990) nga umiso unay ken aduan impormasion. Maipapan iti peggad iti pannakamulit iti bakteria kadagiti tiendaan ti sample wenno pangsubokan, maysa a nainsiriban a panagannad isut’ panaggatang kadagiti mabigbigbig a tiendaan. Dagita a tiendaan gagangay nga addaanda kadagiti kamkameng a nasanay a naimbag a mangikagkagumaan a mangsalimetmet kadagiti pangsubokda a nadalus ken makaay-ayo kadagiti sukida. Masapul nga ipilityo met dagiti maibelbellengen a pagikabil, kas iti nabilot a kapas, a mausar. Dagiti lipstick masapul a madalusan iti alkohol sakbay ti panangusar. Dagiti brush ti makeup masapul a madalusan nga umuna iti pagdalus a solvent. Dagiti lapis ti mata masapul a matasaran sakbay ti tunggal panangusar. Makaipakitakayo met ti konsiderasion iti sumaganad a suki babaen ti diyo panangikabkabil kadagiti ramayyo iti aniaman a produkto.
C. H., Estados Unidos
Dagiti Paltog Nasaktanak babaen iti di umiso a panangiladawanyo kadagiti paltog iti Mayo 22, 1990, a bilang. Ti kasta a maymaysa a dasig, negatibo a panangiladawan kadagiti awan-biagna a bambanag ket nakakatkatawa. Dagiti paltog saanda a nainkasigudan a naimbag wenno dakes; ket kasta met ti panangpataud, panaglako, wenno panangikut kadakuada.
J. P., Estados Unidos
Ti ulitegko napukawna ti asawak iti maysa nga aksidente iti kotse ket binusbosna ti tallo a bulan a nagin-inum iti kasta unay. Kamaudiananna tinulbekannan ti bagina iti banio ket pinaltoganna ti bagina. Inanamaek a dagiti tao a makabasa itoy nga artikulo agsarimadengda ken agpanunotda no maiparbeng ti mangikut iti maysa a paltog.
M. C. A., Brazil
Nupay no masapul nga ipudnok a kankanayon a tinarigagayak ti maysa a paltog, idi nabasak dagidiay a pinanid, daytat’ namagduadua kaniak no maiparbeng ti panagsalsalimetmetko tapno makagatangak iti maysa.
D. M., Inglatera
Pannakabingaybingay ti Katoliko Napabutnganak iti bilangyo a Hunio 22, 1990! Nasken kadi ti panangipakita iti nailansa a Manangisalakantayo a nagudua?
D. L. A., Estados Unidos
Awan ti nairanta a di panangraem ken ni Kristo. Ti krusipiho ket gagangay a naus-usar kas simbolo iti Iglesia Katolika a mismo. Ti ladawan ngarud nagserbi a mangiladawan iti nakalkaldaang a pannakabingaybingay iti uneg ti Katolicismo. Makapainteres, idi kinondenar ni apostol Pablo ti sektarianismo iti ummong dagiti Kristiano idiay Corinto, inusarna daytoy a nakalawlawag nga ilustrasion: “adda a nasinasina ni Kristo.” (1 Corinto 1:13)—ED.
Kablaawandakayo. Nagsayaatan ti pannakasukimat ti naisurat, ken makapainteres ti pannakaisuratna, ken saan a manguk-ukom. Didakto makumberte iti relihionyo, ngem nalawlawagandak ken napakaammuanak.
V. O., Estados Unidos
Kissiw Masapul nga iyebkasko ti kasta unay a panagyamanko iti artikulo maipapan iti kissiw! (Hunio 22, 1990) Anian a pannakabang-ar ti pannakabigbigko a saan laeng a sisiak ti agsagsagaba iti kissiw. Kasta unay ti pannakaupayko idi ta ipatenggakon amin dayta. Dimteng laeng ti artikulo iti umiso a tiempo. Linukatanna ti inanama iti maysa a masanguanan nga awanen ti sakit.
N. P., Pederal a Republika iti Alemania
Panagsirarak Babaen iti Animal Inapresiarko unay ti artikuloyo. (Hulio 8, 1990) Ammok a maar-aramid dagiti eksperimento kadagiti animal, ngem pulos a diak pinampanunot a maus-usar dagitoy iti panangparang-ay kadagiti kosmetiko, shampoo, ken dagiti sabon! Magagaranak a mangur-uray iti tiempo inton agpatingganton dagita a panangabuso.
R. M., Italia