Manipud Managbasatayo

Rosario Nagsuratak maipapan ti artikuloyo iti rosario. (“Ti Panangmatmat iti Biblia,” Hunio 8, 1990) Maibatay iti maymaysa a dasig a panangmatmat ti dua a “dati a madre,” kunaenyon a ti Dios dina kayat nga umaytay kenkuana babaen iti Inana, a ni Maria. Ti Katoliko a doktrina a ni Maria ket manangibabaet ni Kristo ket nabayagen ken nasayaat ti pannakaipasdekna. Asinoman a mangbusor iti daytoy a banag a di siraraken dagiti amin nga adda nga impormasion ket dakkel panagbiddutna. Gun-odenyo dagiti kinapudno!

M. E. M., Estados Unidos

Maawatanmi a nalaing no apay kastoy ti panagriknat’ dadduma a managbasa a Katoliko. Nupay kasta, naan-anay ti pannakasirarak ti artikulomi, a nagusar kadagiti mararaem a libro, agraman ti “New Catholic Encyclopedia.” Ket nupay makapainteres ti komento ti dua a dati a madre, ti artikulo imbasarna ti konklusionna iti mismo a pammaneknek ti Biblia. Dagiti sinigsiglo a tradision ti simbaan dina balbaliwan ti kinapudno a ti Biblia basta dina ipaannong ken Maria ti akem a “manangibabaet.” Imbes ketdi, kuna ni Jesus: “Awan ti makapan ken Ama no di magna kaniak.” (Juan 14:6, Catholic “Jerusalem Bible”)—ED.

Teleskopio Ti Marso 8, 1990 a bilang intampokna ti artikulo a napauluan “Naisangsangayan a Teleskopio Ipalgakna dagiti Misterio ti Init.” Impakitak iti titserko iti siensia, ket naragsakan iti dayta. Dua nga aldaw kalpasanna, ti titser inikkannat’ tunggal maysa iti klase ti kopia ti artikulo, ket winanasnat’ intero nga artikulo. Panggepna nga usaren ti artikulo kadagiti amin a klasena iti siensia.

A. V. A., Estados Unidos

Makeup Gistay amin a babbai iti klasek idiay eskuelaan agusarda iti makeup, nupay 13-años laeng ti dadduma kadakuada. Kayatko met a padasen, ngem iparit dayta dagiti dadakkelko. Idi mabasak ti artikuloyo (Mayo 22, 1990), maawatakon a mabalinmo met ti agparang a napintas uray no awan ti makeup. Pagarupko a talaga a nagsayaat ti panangipablaakyo kadagiti artikulo a maipaay a nangnangruna kadagiti agtutubo.

D. C., Alemania

Agyamanak iti artikuloyo maipapan iti umiso a panagusar ti makeup. (Hunio 22, 1990) Diak mapalubosan nga agusar ti makeup gapu ta 11-añosak pay laeng. Ngem naadalko iti artikuloyo nga inton mapalubosanakon, bassit laeng ti usarek, ket bayat a bumaketak ken kasapulak ti ad-adu a makeup, iti daytanto nga agusarak iti ad-adu.

S. D., Estados Unidos

Panagturay ti Tao Ti serieyo a “Ti Panagturay ti Tao Nakatin kadagiti Timbangan” riribukennak. Aniat’ serbina ti panangsukimat ken panangukom kadagiti nadumaduma a klase ti gobierno no amin met a kita ti gobierno ket di agsarday a bibiangan ni Satanas ida? Kasanot’ panangipatuldo ti maysa no adinot’ paginggaan dagiti pasurot ni Satanas ken ti pangrugian ti kinakurang ti abilidad ti tao?

A. P., Estados Unidos

Di pagduaduaan a ti pannakibiang ni Satanas timmulong iti pannakapaay ti tao a mangituray iti bagina. Nupay kasta, ti turay ti tao a naisina iti Dios mapaayto uray no awan ti pannakibiang ni Satanas. Ti Jeremias 10:23 kunana: “Saan nga agtaud iti tao a magna uray ti panangiturong kadagiti addangna.” Dagiti seriemi ipakitada ti kinapudno dagitoy a sasao.—ED.

Adiksion iti Crack Agyamanak kadagiti pudno iti biag nga artikuloyo maipapan ti crack. (Hulio 22, 1990) Napadasakon ti amin nga am-ammo a droga malaksid iti heroin, ket managusarak ti droga iti las-ud ti 11 a tawen. Ti asawak managusar ken managlako pay iti droga. Bayat ti pannakaibaludko iti 27 a bulan, inruginat’ nakipagadal ti Biblia kadagiti Saksi ni Jehova ket isut’ nabautisaran. Babaen ti panagadal iti Biblia, ken iti tulong ni Jehova, naan-anay met a natallikudak ti droga.

C. V., Colombia

Narigat ti panangtallikud kadagiti makaadikto a droga, ket daddumat’ nagkasapulan iti propesional a tulong tapno maaramidan dayta. Ti pannakaadal kadagiti kinapudno ti Biblia, nupay kasta, mabalin a nabileg a tulong tapno mawayawayaan ti maysa manipud kadagiti pannakaadikto.—ED.