Ti Gatad iti Panangipilit iti Dara

DAGITI bato ni Casey Lunsford ti mamagsakit kenkuana. Pinattapatta dagiti doktor a ti tallo-ket-kagudua-ti-tawenna nga ubing a lalaki mabalin nga agbiag laengen iti tallo wenno uppat a bulan malaksid no daytat’ maaddaan iti kidney transplant. Dagiti dadakkelna, a Saksi ni Jehova, inkeddengda a kayatda ti operasion; kinapudnona, ti ama ni Casey ti mangidonar iti maysa a batona iti ubing a lalaki.a Ti laeng dawatda ket awan ti dara a mausar—agkedked dagiti Saksi ni Jehova iti panangiyalison gapu iti Nainkasuratan a rason.—Kitaenyo ti Aramid 15:20.

Implano dagiti Lunsford a maaramid ti operasion iti maysa nga ospital idiay Texas nga addaanen ti ammo a rekord a naballigi a kidney transplants a naaramid nga awan ti panangyalison iti dara. Ngem maysa nga ospital a sumagmamano laeng a milias ti kaadayona manipud iti pagtaengan dagiti Lunsford idiay California mayat a mangaramid iti transplant nga awan ti panangyalison iti dara. Pinili dagiti Lunsford daytoy as-asideg nga ospital.

Bayat ti lawas sakbay ti operasion, ti kameng ti ospital ken ti siruhano iti transplant maulit-ulit nga impanamnamada kadagiti nagannak a di kasapulan ti panangyalison iti dara wenno ti bilin ti korte a mangted autorisasion iti maysa nupay agkedked dagiti nagannak. Nupay kasta, kalpasan la unay ti iyaanamong dagiti nagannak iti operasion, rinugianen nga inyurnos ti siruhano ti mangala iti bilin ti korte a mangipilit iti dara ken ni Casey. Nabaelanna pay a sinukatan ti maysa a social worker iti kaso idi impilitna a dagiti nagannak adda kalinteganda nga mangammo iti aniaman a bilin ti korte. Iti kabigatan ti operasion, naiteden ti sertipiko a mangdawdawat iti bilin ti korte a mangiyalison ken ni Casey. Pinagparang ti sertipiko a ni Casey ket nakaiddan nga agpadpadara iti lamisaan a pagoperaan idinto nga iti kinapudnona di pay nangrugi ti operasion! Maysa nga oras kalpasan ti operasion, isu a sibaballigi a naaramid nga awan ti dara, nayalisonan ti dara ni Casey.

Indarum dagiti Lunsford ti siruhano ken ti ospital gapu iti pananglabsing iti sibil a kalinteganda ken gapu iti panangallilaw, agsasaruno a pangipaay iti rigat iti emosion, ken ti pananglabsing iti naitalek a rebbengen. Kalpasan ti uppat a lawas a panangbista, ti hurado inusigda ti kaso iti dua ket kagudua nga aldaw ket impatawda ti dusa maibusor iti siruhano ken ti ospital. Nabilinda nga agbayad kadagiti Lunsford iti nagupgop a gatad a $500,000.

Nupay no di inanamongan ti hues iti panangbista ti pangngeddeng iti pannakalabsing ti kalintegan dagiti umili ket imbilinnan ti baro a pannakabista maipaay iti panangallilaw ken dagiti dadduma a pammabasol, dagiti 12 a hurado makumbinsirda a ti panangallilaw ti ospital ken ti doktor maitutop iti panagbayadda iti $500,000. Impamatmat dagiti abogado ti pamilia nga ikagumaandanto nga itandudo ti pangngeddeng ti hurado babaen iti panagapelar.

[Footnote]