Kasanot’ Pannakagun-odda iti Kasta a Nagpintasan a Dutdot?
DAGITI lila ti barukongna a rollers gagangayen nga agnanaedda iti makintengnga ken makin-abagatan nga Africa. Kanayon nga agbatayda kadagiti kaykayo wenno kadagiti barot ti telepono iti igid ti kalsada. Daytoy ti mangipaay iti nagsayaatan a panangsiputda iti aglawlawda maipaay kadagiti insekto ken dadduma a taraon.
No agbiahekayo a lumasat iti Botswana wenno Zimbabwe, mabalin a makitayo ti naiyullagis nga asul a dutdot bayat a maysa kadagitoy a tumatayab ti tumayab a bumallasiw iti kalsada. Kas ipamatmat ti nagan a roller, no dadduma ipakitada dagiti napnuan kolor a dutdotda iti panagsirko a panagpabuya iti tangatang. Ti naipakuyog a ladawan iti tumatayab iti napabassit a ladawan ti payakna ipalgakna dagiti naraniag a kolor ti roller. Dagiti dutdot ti payak isut’ naglalaok nga uppat a kolor iti asul agraman ti nangisit ken brown. Anian a nagsayaatan ti pannakaiduma daytoy iti lila a barukongna, orange a pingpingna, puraw a mugingna, ken ti nakusnaw a berde a koronana! Daytoy ti mangibangon iti nagpateg a saludsod: Kasanot’ pannakagun-odda iti kasta a nagpintasan a dutdot?
No sukimatenyo ti saka ti roller, madlawyo a dagitoy ket nabalkot kadagiti siksik, saan a dutdot. Dagiti kadi dutdot timmaudda a naiparparna manipud kadagiti siksik ti reptilia, kas ti isuro dagiti ebolusionista?
Bueno, panunotenyo a ti maysa a dutdot ket pagsidsiddaawan ti enhenieria. Agsaknap manipud iti nakaimulaan ti dutdot isu dagiti linea dagiti barbs. “No masina dagiti nagabay a barb—ket napigsa ti pannakapisang ti vane—dagitoy ti dagus a maidekket a kas iti zipper babaen ti panangapros iti dutdot babaen iti ramay,” inlawlawag ti libro ti siensia nga Integrated Principles of Zoology. “Ti tumatayab, siempre, aramidenna dayta babaen iti sippitna.”
Dagiti kadi ginasgasut a nagsayaatan a “zippers” a mangbukel iti maymaysa a dutdot timmaudda a naiparparna? Adda kadi aniaman a pammaneknek dagiti sientista a ti maysa a siksik ket aktual a nagbalin a dutdot? “Nakaskasdaaw unay,” inamin ti naadaw iti ngato a libro, “a nupay no dagiti moderno a tumatayab addaanda nga agpadpada kadagiti siksik (nangnangruna kadagiti sakada) ken dutdotda, awan ti tukad a nasarakan iti nagbaetan dagiti dua agpadpada kadagiti tedtedda wenno kadagiti sibibiag.”
Sigurado, dagiti dutdot mangipaayda iti pammaneknek a ti Kangrunaan nga Enheniero ket maysa met nga eksperto iti panangibagaybagay kadagiti nakapimpintas a kolor. Dagiti parsua a kas ti lila ti barukongna a roller nairamanda kadagiti “nagpayak a tumatayab” a “mangidayaw iti nagan ni Jehova,” ti pudno a Dios.—Salmo 148:7, 10-13.
[Picture Credit Line iti panid 16]
National Parks Board iti Sud Africa