Dagiti Crowned Crane—Nagduduma ti Kolor-Tuktokda a Sumasala
BABAEN TI KORESPONSAL TI AGRIINGKAYO! IDIAY KENYA
MAYSA ti crowned crane kadagiti kapipintasan a tumatayab iti lubong. Maysa a nadaeg a tumatayab a nagpipintas ti kolorna ken naisangsangayan ti itsurana. Nasurok a maysa a metro ti kaatiddogna, dakkel ti nakaukrad a payakna ken napintas, atiddog ti tengngedna, a kas met la iti dadduma a kita ti kannaway.
Agkakaingas ti kalakian ken kabaian a crowned crane. Ti natayengteng a kolor ti dutdot iti bukotna nagpintas ti pannakaibagayna kadagiti puro a puraw a dutdot ti payak iti agsumbangir a sikigan ti tumatayab ken agbalin a bimmalitok iti asideg ti ipus. Dadduma pay a dutdot ti payak ket natayengteng a chestnut brown.
Makaay-ayo a buyaen ti rupa ti crowned crane. Napudaw ti pingpingna ket napalawlawan iti nalamuyot, nangisit a dutdot ti tuktok ken karabukobna. Dagiti matana ket napintas a napusyaw nga asul. Adda atiddog a nakalablabbaga a lambilambi nga agbitbitin a nairaman kadagiti nangisit a dutdot ti karabukob a kaasping ti lumabaga a pabitin no paidda nga iyunnat ti kannaway ti tengngedna. Ti nakadidillaw unay isu ti naisangsangayan a nakatud-aw a napino, bimmalitok a dutdot iti tuktok a mangporma iti nagsayaatan ti pannakabukelna a balangat. Dagitoy a nasileng, napino a dutdot agsilnagda a bimmalitok no maraniagan ti init. Amin dagitoy naisangsangayan a nagduduma a kolor maibagayda iti dua nga atitiddog, nakuttong a nangisit a saka.
Ti makatitileng nga ikkis ti crowned crane ti maysa kadagiti di maliplipatan nga uni iti Africa: O-wahng! O-wahng! O-wahng! Daytoy a nagpigsa nga ikkis mangngeg iti nakaad-adayo. Masansan, aggiddan nga aguni ti agparis a kannaway bayat ti ipapanda wenno panaggapuda iti pagaponanda a kaykayo. Iti dadduma a paset ti tawen, aguummong dagiti crowned crane ket mabalin nga agdagup iti aginggat’ 30 a tumatayab, a mangpataud iti nadumaduma nga agsusupadi nga uni a makaay-ayo a denggen.
Panangtaripato ti Nagannak
Nabatad a dagiti crowned crane agtiponda agingga iti tungpal-biag. Masarakan ida kadagiti adu a paset ti Daya nga Africa, nangnangruna kadagiti aluguog ken baresbes, a sadiay ti pagumokan ken pangtaripatuanda kadagiti urbonda. Ti umok ket dakkel a kasla-sarangusong a bunton a ruot ken runruno a mangipaay iti daplat a pagitlogan ti kabaian iti dua wenno tallo a dadakkel, bumerde nga asul nga itlog. Agsinnublat ti kalakian ken kabaian a mangukop kadagiti itlog, ket mapessaan ti itlog iti las-ud ti makabulan. Agtinnulong dagiti nagannak a mangpakan ken mangtaripato kadagiti nakapimpino ti dutdotna nga annakda, ket situtured a salaknibanda dagiti urbonda.
Ti kaaduan a taraon dagiti crowned crane ket dagiti insekto, tukak, babassit nga uleg, ken bukbukel. Babaen ti panangusarda kadagiti karantiway ken dadakkel a sakada, ibaddekda a kanen ti aniaman a babassit a parsua a rummuar iti karuotan.
Sala Dagiti Billit
Naregget ken makaliwliwa a sumasala dagiti crowned crane. Babaen iti panangikayabkabda kadagiti dadakkel ken nadumaduma ti kolorna a payakda, tumayokda a diretso iti tangatang ket kalpasanna agampayagda a siiinayad nga agdisso a kasla nakakapet iti parachute. Babaen iti nagpintas a panaglagtoda, agtaray ken aglagtolagtoda iti tangatang, a mangrikrikus iti asawada nga itungrarawda a sipapartak dagiti uloda babaen iti nakakatkatawa a pananggutad. No iyukradda dagiti dadakkel a payakda, aginderengda ken ipabuyada ti napipintas a kolor dagiti dutdot ti payakda.
No dadduma nagpintas ti panangkillo ti agpareha iti tengngedda ken agpinnerengda. Agsinnango dagiti sippitda, agsasaruno nga agunida iti nabangag, natibong a nota nga arignat’ agtintinnapat. Aginderengda manen, ituloyda ti nakapimpintas a sala dagiti tumatayab.
Ti Panangikagumaan nga Agbiag
Naamo kadagiti tao dagiti crowned crane ket nalakada a mapaamo. Gapu kadagiti makaay-ayo a kolor, itsura ken ti makaliwliwa a panagsalada, nalatakda kadagiti zoo ket matarigagayan unay a mangarkos kadagiti pribado a sanikua ken hardin. Gapu iti kasta a pakasapulan, di pakasdaawan a bumasbassit ti bilangda. Ti maysa pay a pakarigatan ti crowned crane isu ti pannakadadael dagiti aluguog ken ti pannakausar dagiti sabidong ken insektisidio, a mangmulit kadagiti danaw ken waig.
Nakalkaldaang no dumtengto ti aldaw nga awanen ti makita ken mangngeg nga uni ti nagpintas a crowned crane. Nupay kasta, ikari ti Biblia nga iti mabiiten mapabaronton ti intero a daga. (Idiligyo ti 2 Pedro 3:13.) Iti kasta, amin dagiti agindeg iti daga agragsakdanto nga agnanayon iti nagsayaat a parsua ti Nadibinuan a Namarsua, ni Jehova a Dios, ken ti pinarsuana a nagduduma-ti-kolorna a sumasala.