“Uminumtayo ti Horchata de Chufas!”
DAYTOY nga imbitasion nalabit saan a pamiliar kadakayo. Ngem no nairana nga aggigiankayo idiay España, ken nangnangruna iti dumaya nga igid ti baybay, pamiliarkayo iti dayta. Iti intero a makatawen, ngem nangnangruna bayat dagiti nakapudpudot nga al-aldaw ti kalgaw, umariwekwek ti mangtagtagiragsak iti daytoy nakasamsam-it, ngem makarepresko, awan alkoholna nga inumen, ti naisangsangayan a horchata de chufas!
Uray adu kadagiti Español ti masdaawan a makaammo a ti horchata mabalin a maaramid manipud kadagiti almendro ken kadagiti bukbukel ti karabasa wenno sandia, agraman manipud bagas, apricots, mansanas, cherries, currants, verjuice nga ubas, mulberries, plums, ken licorice. Nupay kasta, masansan a pampanunoten dagiti Español ti chufas kas ti kangrunaan nga ingrediente iti inumen.
Ngem ania dagiti chufas? Dagita ti almendro iti daga wenno rush nuts, ket ti termino agaplikar a nangnangruna iti tunggal maysa kadagiti babassit nga adda iti uneg ti daga a kasla mani a bagas a patpatauden ti mula a sedge ti Europa (Cyperus esculentus). Dagitat’ masarakan agarup 5 ingganat’ 8 a sentimetro iti uneg ti daga. Ti mula a sedge ti mataripato manipud Hulio ingganat’ Oktubre saan laeng nga idiay España no di ket kasta met iti Middle East ken Africa del Norte. Manipud sadiay impan dayta dagiti Arabe idiay España. Nupay damo a naimula dayta idiay abagatan ti pagilian, awan nasaysayaaten a lugar a pakaibagayan ti pannakataripatona ngem kadagiti adda padanumna a kataltalonan ti Valencia idiay kosta Mediteraneo ti España a Valencia, a sadiay ti pagtubtubuanda a nakaad-adu.
Kasanotay nga isagana ti horchata? Dagiti chufas ti maiyuper iti sumagmamano nga oras, a tunggal managaramid ti horchata addaan kabukbukodanna nga opinion iti apagpag-isu a kabayagna. Daytoy pabussogenna dagiti chufas, ta dagitat’ mangagsep ti adu a danum. Daytoyen ti kanito a pananglebbek kadakuada, bayat a mainaynayon pay ti adu a danum. Apaman a nalpasen ti pananglebbek, ti nalebbek a banag maikabil iti pagikabilan ket magamer a naimbag, ket kalpasan ti panangipaarinsaed ti agarup 15 minutos, daytat’ maipalabas iti pagpespesan tapno maisina ti syrupna manipud masa. Kalpasanna, maarisit ti syrup, sa manayonan ti asukar (ngangngani maysa kilo iti kada kilo a namagan a chufas).
Dadduma nayonanda dayta ti cinnamon, tinadtad nga ukis ti perres, wenno mabalin a dadduma a kahel-ramanna a danum. Apaman a nakasaganan ti inumen, daytat’ maipreserbar a dagus babaen ti pannakaipalamiisna, ngem saan a nabaybayag ngem 48 oras; ta no saan dagiti enzymes ti chufas di agbayag agtignaydan ket baliwanda ti ramanna. No kayatyo a tagiragsaken dayta kas inumen, daytat’ rebbeng a maipalamiis iti 37 ingganat’ 39 degrees Fahrenheit; ket no kaykayatyo ti ilado nga inumen, daytat’ rebbeng a maikabil iti ngangngani 30 degrees Fahrenheit.
Ti horchata de chufas maysa a makarepresko, nasam-it, makapapigsa nga inumen. Gapuna, no adda gundawayyonto a makabisita iti makindaya a kosta ti España, akseptarenyo ti imbitasion nga, “Intay uminum ti horchata de chufas!”—Naipatulod.