Panagkinnaawatan Dagiti Doktor ken Dagiti Pasiente a Saksi
DAGITI doktor iti lubong kangrunaanna ammoda ti maysa a banag maipapan kadagiti Saksi ni Jehova: Agkedkedda iti panangyalison iti dara. Nupay kasta, adu a dodoktor ti bassit laeng ti ammoda maipapan kadagiti Saksi. Gapuna no kayatda ti mangiyalison iti dara iti maysa a pasiente a Saksi, ti panagkedked mabalin a mamagsiddaaw kadakuada a naan-anay a di nainkalintegan. Gapuna, ti nakalkaldaang a di pagkinnaawatan ti mabalin a mamagsina iti mangngagas ken ti pasiente.
Mammano a dodoktor ti makabigbig a dagiti Saksi ni Jehova saanda a busoren ti medikal a panangagas ket ti takderda iti dara agpadpada a di maipabiang iti sabali ken sititibker a nairamut iti Nainkasuratan a linteg. Kabayatanna, ti kinanainkalintegan daytoy a Nainkasuratan a takder ket kankanayon a naitan-ok babaen iti nakaad-adu a baro a sientipiko a nasarakan agpadpada kadagiti peggad iti homologous a panangyalison ken ti kinatalged dagiti kasukat iti panangyalison. Ngem kasano a dagiti Saksi ni Jehova maiyallatiwda daytoy nga impormasion iti medikal a komunidad?
Dagiti “Liaison Committees” iti Ospital
Gapu iti dayta, ti Bagi a Manarawidwid dagiti Saksi ni Jehova inturongda ti pannakaipasdek dagiti mangibabaet a komite iti ospital kadagiti dadakkel a siudad nga addaan kadagiti dadakkel a medikal nga institusion. Idiay Estados Unidos, adda sangagasut a komite, nga addaan iti promedio a lima a ministro iti tunggal maysa, a mangipapaayen iti panagkinnaawatan ti medikal a lubong ken dagiti Saksi. Nasapa pay itoy a tawen naipaay met ti urnos kadagiti dadduma a dagdaga. Manipud Pebrero 19 agingga iti Marso 27, tallo a miembro iti Hospital Information Services idiay Brooklyn ti bimmisita kadagiti walo a sanga nga opisina dagiti Saksi ni Jehova idiay luglugar ti Pacifico.
Nagkatlo ti panggep: tapno mangangay kadagiti seminar a mangsanay kadagiti immunan a napili a ministro a Saksi maipaay iti trabaho a mangibabaet a komite iti ospital, ti panangsanay kadagiti kameng ti sanga a mangimaton iti opisina ti Hospital Information Services iti tunggal sanga, ken ti panangbisita kadagiti ospital ken dodoktor tapno paregtaen ida a mangitultuloy ken mangpalawa iti panangagasda kadagiti Saksi ni Jehova a saanda nga agus-usar iti dara. Naangay dagiti uppat a seminar: maysa idiay Sydney maipaay iti Australia ken New Zealand; maysa idiay Manila maipaay iti Filipinas, Hong Kong, ken Taiwan; maysa idiay Ebina City maipaay iti Japan ken Korea; ken ti maudi idiay Honolulu maipaay iti Hawaii.
Ti programa agpadpada a nagusar kadagiti slides ken video tapno ilawlawag ti paset ken linaon ti dara ken ti umad-adu a listaan dagiti medikal a kasukat iti homologous a dara. Ti panagsasarita saklawenna dagiti pamay-an a mangtulong kadagiti Saksi ni Jehova no mapasanguanda iti parikut a pakairamanan ti dara. Ti seminar ipaganetgetna met ti kinapateg iti pannakitinnulong kadagiti dodoktor ken dagiti ospital, isu a mamagbalin a nalaklaka para kadakuada a mangraem iti takder dagiti Saksi. Kinuna ti maysa a miembro iti Hapones a komite: “Ti programa pudno a kinabalannakami a mangiyuswat iti trabaho a mangsukay iti panagkinnaawatan.” Nasurok a 350 a Saksi nanipud kadagiti amin a kita iti panagbiag ti nasanay kadagiti uppat a seminar.
Sakbay dagiti ibibisita, dagiti sanga nga opisina nangaramidda kadagiti pannakitulag kadagiti prominente a siruhano ken senior a kameng dagiti kangrunaan nga ospital tapno pagsasaritaan ti awan darana a panangagas kadagiti Saksi ni Jehova. Tallo a grupo iti tunggal sanga ti natudingan a mangaramid kadagitoy nga ibibisita, a tunggal maysa ti idauluan ti maysa kadagiti tallo a pannakabagi manipud Brooklyn. Daytoy saan laeng a nangipaay iti pannakasanay a mismo iti lugar kadagidiay a natudingan nga agbalin a miembro iti komite iti ospital no di ket namagbalin kadakuada a komportable no makisarsaritada kadagiti doktor ken mangay-aywan ti salun-at a propesional. Nasurok a 55 a kakasta nga isasarungkar ti naaramid iti daytoy nga innem a lawas.
Pamay-an iti Panagtinnulong
Makapnek dagiti resulta. Idiay Australia maysa a bumisbisita a grupo ti nakiuman iti ministro iti salun-at maipaay iti estado iti New South Wales. Insalaysayda kenkuana ti panangopera nga awan ti dara kadagiti adu a sentro a pagaywanan iti salun-at, nga insingasingda a ti Australia mabalin nga agbalin a sentro iti kasta a panagopera maipaay kadagiti Saksi ni Jehova idiay Sud Pacifico. Saan a makakita iti rason no apay a dagiti dodoktor dida makaorganisar a mangaramid iti kasta a panagopera. Duapulo ket dua nga ibibisita ti naaramid idiay Australia. Kinuna ti maysa a direktor iti maysa nga ospital: “Ad-adu ti ammoyo maipapan iti tema ti dara ken dagiti kasukat a panangagas ngem ti ammomi.” Ti hepe ehekutibo iti maysa a grupo iti pito nga ospital impanamnamana nga isut’ mangtuding iti maysa a propesor iti panagopera a mangibanag iti plano a mangipasdek iti maysa a grupo dagiti siruhano iti maysa kadagiti ospitalda a mangipaay iti awan darana a panangagas kadagiti Saksi ni Jehova.
Iti heart center idiay Manila—nga ibilang dagiti dadduma a kasayaatan iti Dumaya—naitudo iti direktor iti medisina nga agarup sangagasut a Saksi ni Jehova nga agur-uray iti pannakaopera iti puso ti naikabil iti udi ti linea gapu ta dida umawat iti dara. Imbagana a pasardengenna dayta nga aramid. Naipakita iti direktor ti medisina iti kalalatakan nga ospital iti Filipinas, ti St. Luke’s, no ania ti kunkunaenen ti literatura ti medisina maipapan iti awanan dara nga operasion, ket immanamong a daytat’ nataltalged. “Dumtengto dayta a banag,” inaminna. “Dayta laeng ti pamay-an iti panangliklik iti AIDS ken ti hepatitis.” Impamatmatna nga isut’ sisasagana a mangipaay kadagiti Saksi iti gundaway a makagun-od iti awanan dara a pannakaagas idiay pasilidadna; isu met ti presidente iti banko ti dara iti ospital.
Idiay Japan ti tallo-aldaw a seminar, nairepresentar met ti Korea, nga adda delegasion dagiti Saksi ni Jehova a 44, 5 kadakuada ti dodoktor. Manipud Japan immay dagiti 255 a ministro a Saksi, agraman ti 41 a dodoktor, a dadduma kadakuada ti nuerosurgeons ken anesthesiologist, agraman 2 nga abogado. Duapulo a komite ti naipasdek idiay Japan, ket pito idiay Korea.
Kalpasan ti seminar, dagiti instruktor nakikuyogda kadagiti miembro ti komite a bumisita kadagiti dodoktor ken ospital idiay Tokyo tapno parang-ayen ti panagtitinnulong. “Binisitami ti katulongan a propesor iti obstetrics idiay ospital ti unibersidad,” kuna ti maysa a ministro a Hapones. “Isut’ nangpaanaken kadagiti agarup sangapulo a babbai a Saksi ni Jehova. Maysa kadakuada ti nakapukaw iti 2,800 a kubiko centimetro a dara, ket bimmaba ti hemoglobinna iti 3.5 gramo/deciliter. (Ti promedio kadagiti babbai ket 14 gramo/decilitro.) Ngem nagballigi a nangpaanak nga awan ti dara. Nupay no Budista, ti pagalagadanna isut’ panangraem iti pammati ti pasiente. Immanamong a mangitultuloy iti panangawat kadagiti pasiente a Saksi ni Jehova.”
Maysa a doktor ti medisina idiay Yokohama ti immanamong a mailista ti ospitalna kadagidiay mayat a tumulong a makitinnulong ket kinunana a maragsakanda a mangawat kadagiti pasiente a Saksi a di awaten dagiti dadduma nga ospital. “Ti panangagas kadagiti Saksi nga awan iti dara,” kinuna ti doktor, “ket pudno a maysa a karit, ngem apresiarek dagiti Saksi ta inikkandak ti gundaway a mangparang-ay iti paglaingak kas maysa a doktor.” Idiay met Yokohama ti nagkunaan ti maysa a genecologo: “Makilabanak a maipaay iti kalintegan ti pasiente iti korte no maidarumak gapu iti panangraemko iti pagayatan ti pasiente ken ti di panangipaay iti panangyalison iti dara.”
Dagiti komite a naipasdek idiay Korea ipadpadamagda ti nagsayaatan a balligi. Idi Mayo 26 nabisita ti Yonsei University Hospital. Daytoy nakalatlatak idiay Korea ket adda tallo a sangana. Timmabuno dagiti miembro manipud kadagitoy amin a pasilidades, a ti bilangda ket 62. Maysa a propesor iti anesthesiology ti nagsarita maipapan iti “Panangtaming iti Anesthesia kadagiti Pasiente a Saksi ni Jehova.” Ti impaayna nga impormasion maisuratto iti maysa a pagiwarnak iti anesthesiolohia iti Korea. Yantangay daytat’ maysa kadagiti kangrunaan nga ospital idiay Korea, daytoy maaddaan koma iti nasayaat nga impluensia kadagiti dadduma nga ospital ken dodoktor. Awan ti saludsod a timmaud a saan a nasaklaw a naan-anay idiay seminar idiay Japan.
Lima a mangibabaet a komite ti naibangon idiay Hawaii, ket immayda amin idiay Honolulu maipaay iti seminar. Kaaduan kadakuada ti napan bimmisita iti ospital. Idiay Hawaii Healthcare Center, kinuna ti direktor nga isut’ mangisurat ti maysa nga artikulo maipapan kadatayo iti pagiwarnakda a maipatulod kadagiti amin nga ospital idiay Hawaii.
Iti kadadakkelan kadagitoy a sentro a pangaywanan iti salun-at, ti Queen’s idiay Honolulu, intudo ti komite a ti porma maipaay iti pammalubos nga us-usaren ti sentro naglaon kadagiti di umiso a sasao a di umisot’ panangirepresentarna kadagiti Saksi ni Jehova. Kunaenna a dagiti Saksi kaykayatda ti matay ngem ti maikkan iti “makaispal-biag” a panangyalison iti dara. Daytat’ nalawlawagan a saan a kastoy ti takdertayo, nga immaytayo iti ospital tapno masalakniban ti salun-at ken biagtayo. Pinagparang dagiti sasao a ti dara ket nakasaysayaat ket ti di panangawat iti dara katupagna ti ipapatay. Dagiti sasaoda dina aminen a posible ti ipapatay gapu iti panangyalison, iti kasta di mangipaay iti pasiente iti addaan pannakaammo a panagpili no ania a peggad ti situtulok nga awatenna. Kinuna ti abogado ti ospital: “Kitaek man dayta!” Bayat ti panangbasana iti dayta, kinunana: “Diak insurat daytoy!” Bayat ti ipapanaw ti abogado ken ti administrador, kinuna ti administrador iti abogado: ‘Pagarupek a repasuenta a dua daytoy a dokumento.’
Ti Baro a Komite Tungpalenna ti Panggepna
Iti adu nga al-aldaw kalpasan ti sesion a panagsanay idiay Hawaii, dagdagus a naipay iti ospital ti maysa a Saksi a nakaro ti anemiana, a nakababbaba ti blood count na. Awan met ti masarakan a panagpadara; kasapulan ti mangsukimat nga operasion. Di makaopera dagiti doktor nga awan ti dara. Isut’ nayakar iti sabali nga ospital a sadiay agkedked met ti sabali a doktor a mangopera. Nagparang ti kabbaro a naporma a mangibabaet a komite, nakisarita iti direktor ti medisina ken ti mangay-aywan a mangngagas, ket inlawlawagna a, kaiyariganna, ti pasiente nabaybay-an. Kaskasdi nga agkedked pay laeng a mangopera ti doktor ket naikkat a mangagas. Naiyeg ti dua a sabali a doktor. Inoperada, nasarakanda ti gapu iti panagpadara, ket inagasanda ti parikut. Nagbiag ti kabsattayo a babai. No saan a nakibiang ti mangibabaet a komite, mabalin nga isut’ natay, ket mabalin nga impadamag ti pagiwarnak dayta a maysa manen a kaso iti Saksi a ‘natay gaput’ awan ti dara a kasapulan.’ Iti kinapudnona, kadagita a kaso natay dagiti Saksi a saan a naopera no dagiti makabael a doktor mabalin a naispalda koma ida.
Iti internasional, ngarud, dagiti mangibabaet a komite agtartrabahoda a mangipaay iti panagkinnaawatan ti medikal a komunidad ken dagiti Saksi ni Jehova babaen iti nakapatpateg a komunikasion ken ti panagkinnaawatanda. Makapnek dagiti resulta. Umad-adu a doktor ti makakitkitan a ti nasayaat a panangagas iti medisina ken ti nakasigsigo a panagopera awatenna a naimbag ti pammati dagiti Saksi ni Jehova. Idiay Estados Unidos, nasurok a 6,500 a doktor ti situtulok a mangaramid iti kasta.
Iti biangda, itultuloy koma dagiti Saksi ti mangikagumaan nga agbalin a mannakitinnulong ken mannakaawat a pasiente. Iti kasta, dadduma a doktor raemenda pay dagiti Saksi gapu iti panangalagadda kadagiti natan-ok a prinsipio. Kas katulongan a propesor iti urology idiay kolehio ti medisina idiay Tokyo kinunana: “Raemek dagiti pasiente a Saksi ni Jehova. Addaanda kadagiti espisipiko nga ipatpateg iti lubong nga awanan kadagitoy nga ipatpateg.”
Ti intero a kalat kadagitoy a seminar ken panagbisita isu ti panangparang-ay iti ad-adda a managraem a pannakitinnulong ket iti kasta maliklikan ti panagsuppiat. Amin dagidiay nairaman iti daytoy a panangikagumaan nariknada a daytoy a kalat ket naibanag nga addaan iti makapnek a balligi. Agtalektayo a ni Jehova itultuloynanto a bendisionan dagitoy a panangikagumaan ket taginayonenna dagidiay a mangtungpal iti panangiturong ni Jehova nga umadayu iti dara, kas ibilin ti Saona nga aramidenda.
[Kahon iti panid 24]
“Amin nga aggaraw a sibibiag agpaaydanto a taraonyo; kas iti nalasbang a nateng intedkon amin kadakayo. Ngem ti lasag agraman ti biagna—nga isu ti darana—saanyonto a kanen.”
“Ket siasinoman a tao iti balay ti Israel wenno kadagiti gangannaet a makipagtaeng kadakuada a mangan iti uray ania a dara, iparangkonto ti rupak a maibusor iti dayta a tao a mangan iti dara, ket ipusaykonto iti ilina. Ta ti biag ti lasag adda iti dara, ket itedko dayta kadakayo iti rabaw ti altar a maaramid a pakaabbongan a maipaay kadagiti kararuayo, ta ti dara isu ti makaaramid iti pakaabbongan gapu ta adda kenkuana ti biag. Isu ti gapuna nga imbagak kadagiti annak ti Israel: ‘Awanto kadakayo ti mangan iti dara, uray pay ti siasinoman a gangannaet a makipagtaeng kadakayo dinto mangan iti dara.’”
“Ta maipagarup a naimbag iti nasantuan nga espiritu ken kadakami ti di mangipabaklay kadakayo iti dakdakkel nga awit ngem kadagitoy banag a masapul, isu nga adaywanyo dagiti banag a naidaton kadagiti saan a pudno a dios, ken ti dara, ken ti animal a nalmes, ken ti pannakikamalala. Ket no agaluadkayto kadagitoy a banag, rumang-aykayto. Sapay koma ta nasalun-atkayo amin!”
[Ladawan iti panid 23]
Hospital Committee Seminar—March 12, 1990