Manipud Managbasatayo

Panagsirarak Babaen iti Animal Diak kayat a basaen ti bilang maipapan iti panagsirarak iti animal (Hulio 8, 1990) agsipud ta ammok a daytat’ emosional a tema. Ngem tinamingyo dayta iti nataktika ken natimbeng a pamay-an.

N. V., Estados Unidos

Yantangay ti panagsirarak ti trabahok, sigagagarak a mangbasa no aniat’ kunaen ti Agriingkayo! Nalawag a ti Biblia dina kondenaren ti panagsirarak babaen iti animal, ngem dina ikalintegan ti panagsirarak babaen iti animal. No ti trabahok sapulenna ti panangusar kadagiti animal iti masanguanan, naannadakto a di mangsayang wenno agbalin a narungsot kadakuada.

O. O., Estados Unidos

Makaupay ti artikuloyo. Impamaysayo ti lima a parapo iti kinaranggas dagiti aktibista (a saan met a nasaknap). Ti “pagam-amkan nga estoria,” nupay kasta, ket nagupgop iti maysa a sub-titulo. Kasano a taginayonen ti maysa a tao ti natimbeng a kababalin iti panangmatmat iti kasta a kasta unay a kinaranggas? Wen, ti panagsirarak babaen iti animal nakatulong iti irarang-ay ti medisina. Ngem ditay kadi maisardeng dayta itan?

S. F., Pederal a Republika ti Alemania

Ti artikuloyo agparang a paboranna ti panagsirarak babaen iti animal no dayta dina ramanen ti nakaro a panagsagaba. Ania ngarud ti pategna no adda maaramidan babaen iti panagsagaba ken ipapatay dagiti inosente nga an-animal?

M. B., Estados Unidos

Ti panagsirarak babaen iti animal ket napnapno kadagiti isyu a mangtignay iti emosion, ket dagiti artikulomi tinignayna ti kasta unay a rikrikna dagiti managbasa. Saan nga interamente a kondenaren ti Biblia ti panagusar kadagiti animal a maipaay a pakagunggonaan dagiti tattao. Ngem, kaawatan, adut’ marurod iti aniaman a kita ti panagsagaba ti animal, ket pudno a raementayo dagiti riknada maipapan itoy a banag. ED.

Pannakaadikto iti Crack Masapul nga agsuratak kadakayo tapno ipakaammok kadakayo a dagiti artikuloyo maipapan iti pannakaadikto iti crack (Hulio 22, 1990) ket makaipaay iti adu nga impormasion. Kas maysa nga adikto iti crack, nawayawayaanak laeng manipud iti crack idi rinugiak ti nakipagadal iti Biblia ken nakilangen kadagiti Saksi ni Jehova. Us-usarek idi ti pagabangko a kuarta, ti pagbayadko iti kotse, ken ti tinakaw a kuarta tapno makagun-odak iti crack. Nagbalinak a nakakutkuttong a kaslan rurog. Ngem iti panangsuportar ken panangiwanwan dagiti Saksi ni Jehova, nasarakak ti agasna.

C. H., Estados Unidos

Dagiti Sine Ti artikulo nga “Agimtuod dagiti Agtutubo . . . Napateg Kadi No Ania a Sine ti Buyaek?” (Hulio 22, 1990) tinulongannak a mangbigbig iti pannakabalin dagiti sine a mangtengngel kadagiti tattao. Diakton agbuya kadagiti R-rated a sine.

W. R., Estados Unidos

Saan a kankanayon a mapanak agbuya iti sine, gapuna rinugiakon ti nagbasa maipapan kadagiti an-animal, salamangka, ken historia. Addada nagadu a nagsasayaatan a liblibro a naimbag ken makaisuro ken di mangusar kadagiti panagtabbaaw.

L. H., Estados Unidos

Pudno a kaykayatko ti artikuloyo nga “Agimtuod dagiti Agtutubo . . . Kasanot’ Panangpilik iti Nasayaat a Sine?” (Agosto 8, 1990) Maysa pay a banag ti mangriribuk kaniak. Umiso kadi para iti maysa a Kristiano ti agbuya iti sine a naibilang a PG-13?

R. J., Estados Unidos

Idiay Estados Unidos, ti maysa a sine a naibilang a PG-13 ket maipalubos a buyaen dagiti amin nga edad, “ngem sibibileg a napakdaaran dagiti nagannak a mangipaayda iti naisangsangayan a panangiwanwan iti panagbuya dagiti ubbing a nababbaba ngem 13 ti edadda.” (“World Book Encyclopedia”) Gagangay laeng nga agbalin a naannad ti maysa a Kristiano no ti maysa a pelikula naibilang a kasta. Nupay kasta, ti rating ti sine iparangarangna dagiti pagalagadan ti lubong, saan a dagiti prinsipio ti Biblia, ket dagita a pagalagadan masansan a di agtunos. Gapuna kadagiti dagdaga nga adda dagiti sistema a pakarukodan dagiti sine, dagiti indibidual masapul nga ikeddengda no aniat’ pagpatinggaan ti panagpaidalanda iti dayta. Dagiti agtutubo masapul a surotenda ti panangiturong dagiti dadakkelda. No, kas pangarigan nasayaat ti nakaibilangan ti maysa a pelikula, ket agbanag a di nasayaat, ti maysa mabalinna ti pumanaw iti sinean wenno iddepenna ti telebision.—ED.