Pudno ti Sangalubongan a Panagkakabsat!

SAAN pay a nabayag idiay West Africa ti misionera idi isut’ timmabuno iti maysa a relihiuso a kumbension iti maysa nga adayu a lugar. Idi immasideg iti maysa a lokal a pamilia, awan gapgapuna, maysa a dua-tawenna nga ubing a lalaki, nangrugin a nagsangit.

Pinadas a liwliwaen ti misionera ti ubing, ngem ad-adda a nagriaw ti ubing. “Aniat’ napasamak?” inimtuod ti misionera iti ina. Isut’ simmungbat a buyogen ti panagbain: “Pagarupko sikat’ gapuna. Mabuteng iti kolormo. Di pay nakakitkita iti puraw idi.”

Manipud kinamaladaga mabalin nga ammotayon dagiti pisikal a nagdudumaan dagiti tattao. Kamaudiananna tumanoren ti panangidumduma. Ti panangmatmat dagiti ubbing mamolde bayat ti panangpaliiwda kadagiti kababalin ken ug-ugali dagiti natataengan, kas kadagiti dadakkelda. Idiay eskuelaan maimpluensiaanda pay kadagiti mannursuroda, gagayyemda, ken kaeskuelaanda.

Sigun iti nabayag a panagadal idiay Estados Unidos, inton makagtengen dagiti ubbing iti edad a 12, nakapatauddan iti gagangayen a naisigud a kapanunotan ken kababalin maipapan iti nasion, rasa, ken relihiuso a grupo iti aglawlawda. Inton nataengandan naigaedton dagitoy a kapanunotan.

Naiduma dagiti Saksi ni Jehova

Iti lubong a sadiay aglaplapusanan ti panangidumduma, naisangsangayan ti pannakaiduma dagiti Saksi ni Jehova. Mabigbigda nga agtutunosda iti rasa iti internasional. Masansan a mapaliiw daytoy dagiti managpaliiw kadagiti dadakkel a tinawen a kumbensionda.

Kas pangarigan, impadamag ti diario nga States-Item daytoy maipapan iti maysa a dakkel a kumbension dagiti Saksi idiay makin-abagatan nga Estados Unidos: “Marikna ti panagkakabsat a nangpunno iti Lousiana Superdome idi dagiti agtutubo ken nataengan, nangisit ken puraw a Saksi ni Jehova nagtutugawda tapno rugian iti . . . panagsursuro ken panangiraman iti kapadasan. . . . Ti panangidumduma iti rasa . . . saan a parikut kadagiti saksi.”

Idiay kumbension dagiti Saksi, idiay Sud Africa, maysa a babai a taga Xhosa ti nagkuna: “Nakaskasdaaw ta ditoy Sud Africa dagiti tattao iti amin a rasa kasta unay ti panagkaykaysada. Daytat’ naiduma unay iti nakairuamak kadagiti simsimbaan.”

Idi timmabuno dagiti bisita manipud Norte ken Sud America agraman ti Europa kadagiti dadakkel a kumbension dagiti Saksi ni Jehova iti Adayu a Daya ken iti Sud Pacifico, “awan,” sigun iti maysa a report, “ti aniaman a pakakitaan iti racismo kadakuada, wenno kadagiti nangsangaili kadakuada.”

Gapuna, ti naiduma unay kadagiti minilion a Saksi ni Jehova iti isuamin a daga isut’ pudno a panagkaykaysada ken ti panagtutunosda iti rasa. Nagkaykaysada babaen iti pudno a Nakristianuan nga ayat, kas kinuna ni Jesus a masapul a maaramid: “Gapu itoy mailasindanto a dakayo ti adalak, no adda ayatyo iti maysa ken maysa.”—Juan 13:35.

Gapuna dagiti Saksi ni Jehova addaandan iti pudno, agnanayon nga internasional a panagkakabsat! Impapusoda ti kinuna ni Jesus idiay Mateo 23:8: “Dakay amin agkakabsatkayo.” Ket mapaspasamak daytoy iti tiempo a ti panagsisina ken gurangura iti rasa ken nasion daddadaelennan ti pamuon dagiti nasnasion.—Kitaenyo met ti 1 Corinto 1:10; 1 Juan 3:10-12; 4:20, 21; 5:2, 3.

Kasano a Maibanag ti Panagkaykaysa

Kangrunaan iti daytoy a panagkaykaysa isut’ naibatay-Biblia a pannursuro nga aw-awaten dagiti Saksi ni Jehova kadagiti Kingdom Halls da ken dagiti personal a panagadalda iti Biblia. Dagitoy kasla da kadagiti Kristiano idiay Tesalonica, isu a nagkunaan ni apostol Pablo: “Ta idi inawatyo kadakami ti sao a paibaga ti Dios, inawatyo, saan a kasla sao dagiti tattao, no di ket kas pudno a sao ti Dios, nga agaramid met kadakayo a mamati.”—1 Tesalonica 2:13.

Gapuna, dagiti Saksi mamatida iti kunaen ti Biblia, ket sipapasnek a tuladenda ti panagpampanunot ti Dios. Ipapusoda ti kinuna ti Kristiano nga apostol Pedro a nagkuna iti sidong ti pannakapaltiing: “Kinapudnona a makitak a ti Dios saan a mangidumduma kadagiti tao, no di ket uray ania a nasion dagiti agbuteng ken agaramid ti kinalinteg makaay-ayoda kenkuana.”—Aramid 10:34, 35.

Maitunos iti daytoy, binilin ni Jesus dagiti paspasurotna a mangaramid kadagiti adalan kadagiti tattao “iti amin a nasion.” (Mateo 28:19) Gapuna, dagiti Saksi ni Jehova aktibo a sapulenda dagiti agayat iti kinalinteg iti amin a rasa ken nasion, nga awan ilaklaksidda. Ket no dagitoy a nagduduma ti nalikudanda ken rasada agkaykaysada iti panagdayaw, panagtrabaho, ken aglalangenda, maparmek ti naisigud a panagpampanunot. Masursuroda ti pateg ti maysa ken maysa, ti panagayat iti maysa ken maysa.

Pudno, ti maysa a tao a nabayagen a nangidumduma iti rasa mabalin a saan a dagdagus a mabalbaliwanna ti panangmatmatna. No agbalin a maysa a Saksi, rugianna ti “mangikawes iti baro a personalidad” iti pudno a Kristiano, ket agtrabaho a mangparmek iti dati a panangmatmatna. (Efeso 4:22-24) Isu dina padpadasen nga ikalintegan dagiti panangidumdumana babaen ti panagkunana, ‘Kastat’ pannakapadakkelko.’ Saan, ikagumaanna a balbaliwan ti panunotna ken “maaddaan iti panagayat iti intero nga asosasion dagiti agkakabsat.”—1 Pedro 2:17.

Matungtungpalen dagiti Padpadto ti Biblia

Ti mapaspasamak kadagiti Saksi ni Jehova itatta dakkel ti kaipapananna. Kinapudnona, daytat’ naipadto iti Biblia.

Paliiwenyo ti naipadto idiay Isaias 2:2-4 a mapasamak “iti kamaudianan dagiti al-aldaw,” kadagitoy “maudi nga al-aldaw” iti dakes a sistema dagiti bambanag. (2 Timoteo 3:1-5, 13) Dayta a padto ni Isaias kunaenna a ti pudno a panagdayaw ken Jehova maibangonto iti daytoy a kaputotan, ket ‘agayusto dagiti tattao manipud iti isuamin a nasion. Ket adu nga inilin-ili a mapanto ken agkuna: “Umaykayo, ket sumang-attayo iti bantay ti pudno a panagdayaw ken Jehova. Ket isuronatayonto kadagiti dalanna, ket magnatayonto kadagiti danana.”’

Ibaga met ti padto ni Isaias ti sumaganad a naisangsangayan a resulta, isu a nakitan iti internasional a kasaknap iti ummong dagiti Saksi ni Jehova iti intero a siglo: “Ket pandayendanto dagiti kampilanda a pagbalinen a dingding ti arado ket dagiti pikpikada pandayendanto a komkompay. Ti maysa a nasion saannanto nga itag-ay ti kampilan a maibusor iti nasion ket didanto adalenen iti pannakigubat uray kaano.”

Kasta met, ti libro ti Apocalipsis, iti panagsaritana maipapan iti tiempotayo, impadtona a ti maysa a dakkel a bunggoy dagiti tattao “manipud iti amin a nasion ken tribo ken il-ili ken pagsasao” agkaykaysadanton iti pudno a panagkakabsat nga agserbi iti Dios a sangsangkamaysa.—Apocalipsis 7:9, 15.

Daytoy ket saan nga ar-arapaap. Ti dakkel a bunggoy manipud iti amin a nasion, manipud iti amin a rasa ken etniko a grupo, maporporman. Maysa a pudno ken agnanayon a sangalubongan a panagkakabsat maibangbangonen ita a mismo! Daytat’ pamuon iti interamente a baro a sangalubongan a kagimongan iti nagkaykaysa, naragsak nga ili a mangsukatto iti daytoy agdama a dakes a kagimongan a mabiiten a dadaelen ti Dios. Daytoy a nagkaykaysa a kagimongan, kas kinuna ni Jesus, “tawidennanto ti daga,” ket agbiagdanto nga agnanayon ditoy iti dayta iti sidong ti panangituray ti Pagarian ti Dios.—Mateo 5:5; 6:9, 10; Salmo 37:10, 11, 28, 29, 37, 38.

Apay a dikay kitaen a mismo? Awisendakayo a bumisita iti aniaman a Kingdom Hall dagiti Saksi ni Jehova ket padasenyo ti panagtutunosda iti rasa. Wenno inton bisitaendakay manen dagiti Saksi, pastrekenyo ida ket kiddawenyo nga ipakitada manipud Biblia ti pakaibasaran ti panagtutunosda iti rasa. Bay-anyo nga ipakitada kadakayo ti Biblikal a namnamada a maysa a baro a lubong a sadiay addanto ti pudno a panagkakabsat iti isuamin a daga.

Ti mannakablain-amin a Dios, ni Jehova, ti mangpatalged a daytoy a panggepna a mangipasdek iti panagkakabsat iti isuamin a sangatauan ket matungpalto. Kunana: “Kastanto met ti saok a rummuar iti ngiwatko. Isu dinto agsubli kaniak nga awan ti pagmamaayanna, no di ket tungpalennanto ti pagayatak, ken rumang-ayto iti banag a pangipanak kenkuana.”—Isaias 55:11.

Awisendakayo a mangusig iti pammaneknek manipud kadagiti padpadto ti Biblia ken manipud iti kaitungpalan dagitoy a padpadto. No aramidenyo dayta, makitayonto a ti panagtutunos iti rasa saan laeng a posible no di ket pudno a mapasamak!

[Blurb iti panid 9]

Ti mapaspasamak iti ummong dagiti Saksi ni Jehova itatta ket naipadto iti Biblia

[Ladawan iti panid 10]

Naisangsangayan dagiti Saksi ni Jehova iti kaadda ti pudno a panagtutunos iti rasa iti nagtetengngaanda