Ti Tuokko iti Flight 232

Kas insalaysay ti maysa a nakalasat

Idi natnag ti United Airlines Flight 232 iti maysa a talon ti mais idiay Iowa idi napan a tawen, 110 a pasaheros ken tripolante ti natay. Ngem, nakaskasdaaw, 186 ti nakalasat.

“MAADDAANTAYO iti panagdisso nga emerhensia idiay Sioux City,” namakdaar ti piloto. “Rumigrigaten ti panagtayab.”

Hulio 19, 1989 idi, ket ti asawak ken siak addakami iti dalanmi a mapan idiay Chicago nga agatender iti maysa a kumbension iti kompania ti kompiuter isu nga imatmatonan ti asawak, ni Kevin. Nagtayabkamin manipud Albuquerque a nagturong iti Denver, a sadiay nasabetmi ti maysa a gayyem a mapan iti isu met laeng a kumbension ngem sabali a flight. Malagipko a nagaangawkami maipapan iti no sino ti makadanon nga umuna idiay Chicago. Ti eroplanomi, ti United Flight 232, immuna a pimmanaw; ti sabali nga eskediol ket tumayabto agarup sangapulo a minutos kalpasanna.

Panagdanag iti Uneg ti Eroplano

Kellaat, bayat ti pannanganmi a nakalugan, adda dakkel a timek, ket nagkintayeg ti eroplano ken bimmaba ti panagtayabna. Di nagbayag kalpasanna inyanunsio ti piloto a napukaw ti maysa a makinami ket maladawkami a makagteng idiay Chicago. Nakalma ti langana.

Maseknan dagiti flight attendants ngem saanda unay a madanagan. Tunggal maysa pagsasaritaanda ti kasasaad, ngem awan ti nagdanag. Kamaudiananna, naammuak a ti eroplano mabalinna laeng ti agtayab iti kannawan agsipud ta dagiti hydraulic lines napugsatda idi nadadael ti maysa a makina.

Di nagbayag ti piloto inyanunsionan a masapul nga agdissokami idiay Sioux City, Iowa, ket narigat bassit dayta a panagdisso. Imbagana nga isuamin ket nasayaat koma, ngem binilinnakami nga agsagana maipaay iti kapilitan a panagdisso. Indemostra dagiti flight attendants no kasano ti mangpairut kadagiti barikes ti tugawmi ken mangiggem kadagiti pingilmi.

Nanipud idi kanito a pannakadadael ti makina, nangrugin a nagsangitak, ket diakon makasardeng. Inarakupnak ni Kevin, ket nagkararag ken Jehova maipaay kadakami a dua. Anian a ragsakmi ta dikam kadua dagiti dua nga annakmi a babbai, nga agtawen iti innem ken dua, iti daytoy a panagbiahe!

Ti babai a sumaganad kaniak, a kaduana dagiti dua nga annakna a lallaki, immasideg ket iniggamanna ti imak idi agsaganakamin nga agdisso. Nagdisso ti eroplano a natalinaay, ket pagarupek a nakalasatkamin idi pinanunotko a nakadissokamin.

Panagbiag ken Pannakaospital

Kankanayon a nakakidemak ket mariknak a kasla nakaluganak iti roller coaster, a makakitkitaak iti silnag ti init iti nakakidem a matak. Ti maudi a malagipko ket malaplapsut dagiti sapatosko ket pinadasko a kukuten dagiti ramay ti sakak tapno dida malapsut.

Idi nagmulagatak, nasipnget, ken agargarawak. Tumtumbaen ti manangalaw ti tugawko. Addakami iti maysa a talon. Nangisit ken naberde, ket naraniag ti init. Nakagalot pay laeng ni Kevin iti tugawna a sumaganad kaniak. Inawagak ti naganna, ngem di simmungbat.

Indissodak iti daga, isu a binangonak a nagtukodko ti sikok. Inimtuodko no nakalasat ti asawak. Nagwingiwing ti manangalaw. Basta nagkalmaak laeng. Bayat ti panaglugan iti ambulansia, mangngegko dagiti amin a timek ngem pudno a diak dumdumngeg. Mariknak a lumlumteg dagiti matak.

Idiay Marion County Health Center, naasi ken managtulong dagiti tattao, nangnangruna ti maysa a nars a managan Lori. Alistoak a nangted iti numero ti telepono ti kabsatko idiay Albuquerque, ket immawag tapno ipakaammona iti pamiliak a sibibiagak.

Pudno nga impagarupko a yantangay addaak idiay Iowa, awan ti umay mangkita kaniak sadiay. Ngem iti dayta umuna a rabii, dua a panglakayen manipud iti lokal a kongregasion dagiti Saksi ni Jehova ti nangbisita kaniak idiay ospital. Dagiti lokal a Saksi intultuloyda ti bimmisita, immawag, ken nagsurat bayat ti uppat nga aldaw a panagnaedko sadiay. Ti United Airlines nanglukatda iti kuenta idiay J. C. Penney’s, ket dagiti Saksi naggatangda maipaay kaniak tapno adda maisuotko.

Iti sumaganad nga aldaw nasdaawak idi ni nanangko, ti kabsatko a babai, ken ti kabsat ni Kevin ken dagiti dadakkelna simmangpetda amin tapno kaduaandak. Awan kadakuada ti nagpadlaw kaniak a natayen ni Kevin, gapuna inanamaek pay laeng ti nalidem a namnama a mabalin nga isut’ maysa kadagiti di pay nailasin a nasugatan.

Idi nagbuyaak iti damdamag iti telebision, diak patien ti nakitak. Diak pay ket ammo a natnagkami! Idi impagarupko a ti eroplano ket nagdisson, impagarupko a natalgedkamin. Diak pay nagpanunot no apay nga addakamin iti ruar ti eroplano. Ti linea dagiti tugaw a nagtugawanmi ken ni Kevin addada iti likudan ti payak. Addakami iti tengnga iti lima a tugaw, ket idi nasinasina ti eroplano, naipurruak dagiti tugawmi iti daga. Natay ni Kevin ken ti sumaganad kaniak a babai, ngem nagbiag dagiti dua a babassit nga annakna a lallaki.

Maysa a manangalaw—ti kakaisuna a malagipko—ti bimmisita kaniak idiay ospital. A dagiti dadduma nagbiagda ket natay dagiti dadduma ti nangriribuk kenkuana. Daytat’ banag a panawen ken gasat a mapasamak kadagidiay nairaman,’ inlawlawagko. (Eclesiastes 9:11) Saan nga intuding ti Dios nga agtugaw dagiti dadduma a tattao iti lugar a pakatayanda ket dagiti dadduma agtugaw iti lugar a pagbiaganda. Inikkak ti traks nga Aniat’ Namnama kadagiti Ing-ingungoten a Natayen? ken ti broshur nga “Adtoy! Pagbalinek dagiti Isuamin a Bambanag a Baro.” Naginnungngokami, ket pagarupek a nasaysayaat ti riknanan idi pimmanaw.

Ni Lori, a mangag-agas kadagiti sugsugatko iti kuarto iti emerhensia, intultuloyna ti bimmisita kaniak bayat ti kaaddak iti ospital, uray no awanak iti listaan dagiti pasientena. Dinayawna ti makin-uneg a bilegko, ket inlawlawagko kenkuana nga agtaud dayta iti Diosko, ni Jehova, isu a tumultulong kaniak nga agballigi.—Salmo 121:1-3.

Panangitultuloy iti Panagballigi

Iti Domingo, Hulio 23, sisasaganaakon a mangkompleto ti panagpaimbagko iti pagtaengan. Bayat ti panagluganmi iti eroplano, nagsaoak iti pammaregta a sasao ket impamaysak ti panagangesko tapno diak agdanag. Idi nakitanak ti anakko a duat’ tawenna, ni Mercedes, a napno iti benda ken sugsugat, dina kayat ti umasideg kaniak. Innalana ti tallo wenno uppat nga aldaw tapno umay umasideg manen kaniak. Ni Tarrah naragsakan a nakasublin ni nanangna, ngem mailiw ken tatangna.

Ti pannakikadua kadagiti makaam-ammo ken ni Kevin ken dagidiay nakakita iti naespirituan nga irarang-ayna (isut’ mabautisaran koma kas maysa a Saksi ni Jehova idi Oktubre) ti namagbalin a narigat kaniak a mangsaranget iti kinapudno iti ipapatayna. Dadduma kunaenda a ti Santa Fe di pay nakakitkita iti nagadu a nakipamonpon ngem iti nakipamonpon kenkuana. Ammona ti makigayyem ket inapektaranna ti biag dagiti adu a tattao.

Nabigbigko a masapul a kankanayon nga okupadoak ket awan ti nasaysayaat nga aramid ngem ti Nakristianuan a ministerio. Idi Abril ken Mayo, nakiramanak iti trabaho nga auxiliary payunir, maysa a porma iti amin-tiempo a ministerio. Ket determinadoak manen a nangaramid iti dayta idi Setiembre. Ti pannakairaman a kadua dagiti tattao ken kadagiti parparikutda ket pudno a makatulong. Inkeddengko met ti mangaramid kadagiti bambanag iti aglawlaw iti balay, kas iti panangikabil kadagiti blinds iti tawtawa, panangikapet kadagiti wallpaper iti kuarto a panganan ken ti kuarto a pagadalan, ken ti panangbarnis manen iti lamisaan a panganan.

Idi napasamak ti aksidente, mangikonkonduktaak iti dua a panagadal iti Biblia kadagiti interesado a tattao iti Sao ti Dios, ket kalpasan ti kras tinarigagayan ti maysa a dati nga estudiante nga itultuloy ti panagadalna. Amin dagiti tallo nga estudiante inimtuodda: ‘Apay nga insalakannaka ni Jehova ken saanna nga insalakan ni Kevin, ket ikagkagumaanna met nga ay-ayuen ti Dios?’

Inlawlawagko kadakuada ti nagdumaan ti aramid ti Dios ken ti gagangay a didigra wenno aksidente. Iti aramid ti Dios, pakdaarannatayo ti Dios nga adda mapasamak. Maysa a pangarigan iti dayta isut’ Layus idi aldaw ni Noe. Iti kasta a kaso imbaga ti Dios ken Noe ti aramidenna tapno maliklikan ti kalamidad. Isut’ masapul a mangibangon iti daong. Iti kasumbangirna, dagiti aksidente ken gagangay a didigra ket di mapakpakadaan ket apektaranna ti tunggal maysa nga awan pilpilienna, naimbag wenno dakes. Awan ti makaammo nga adda mapasamak a dakes iti eroplanomi. No naammuanda koma dayta, awan koma ti limmugan iti dayta. Aksidente ti panagbiagko a kas met iti ipapatay ni Kevin.

Dagiti tattao a mangibaga kaniak a “nabilegak” dida mabigbig no kasano a masansan a makasangitak. Mabayag bassit a tiempo ti palabasek sakbay a malipatak ti kapadasak. Masaritak ti maipapan ken Kevin wenno mangkita kadagiti ladawan ket nasayaat ti riknak agingga nga agsolsoloakon; kalpasanna agsangitakon. Kasta unay ti panaglidayko iti pannakapukawko iti asawak kalpasan iti nagbiitan a panagkaduami, pito laeng a tawen.

Dagiti babassit nga annakko a babbai kasta unay ti panangas-asikasoda iti aniaman a Kristiano a kabsat a lalaki nga umay bumisita, a kumpetda kadagiti sakada no dadduma tapno dida pumanaw. Makarurod iti apagkanito ni Tarrah ket no dadduma agsangit a dina ammo no apay. Nalaing idiay eskuelaan, nupay kasta, ket padpadasenna nga ibaga kadagiti kaeskuelaanna ti maipapan iti panagungar.—Juan 5:28, 29.

Padpadasenmi a pagbalinen a simple ti panagbiagmi ket pagbalinenmi ti Nakristianuan a ministerio a pamay-an ti biagmi. Babaen iti tulong ni Jehova maaramidanminto dayta. Nakatawenen ti napalabas, pinaregtanak ti maysa a gayyem nga agtultuloyak ket mangrugiak nga agserbi kas regular payunir. Maragsakanak ta inawatko dayta a pammaregta. Kas maysa nga amin-tiempo a ministro, ti panangtulong kadagiti dadduma a makaammo iti pangpanggep ti Dios natulongannak a mangsalimetmet iti panangipamaysak iti isipko iti naindaklan a panggep ti Dios a mangparsua iti maysa a naindagaan a paraiso ket pagungarenna dagiti ingungoten a natayen. (Lucas 23:43; Apocalipsis 21:3, 4)—Kas insalaysay ni Lydia Francis Atwell.

[Ladawan iti panid 26]

Kaduak ti asawak sakbay ti panagtayab

[Picture Credit Line iti panid 25]

UPI/Bettmann Newsphotos