Kinamanagpasangbay Dagiti Pinlandes

KIMTER ti danaw, a 41 centimetrot’ kapuskol ti yelona. Ti temperatura ti angin ket -15 degrees Celsius, a gagangay no Pebrero sadi Finland. Ket ni Martti, a nangsangaili kadakami, butbuttawanna ti yelo. Damo daytoy a gundawayna a mangipakitat’ kinamanagpasangbayna iti ganggannaet a naggaput’ Isla ti Caribbean.

No kadagiti taga tropiko a Puerto Rico, kinamaag ti innak aramiden. Ngem no kadagiti Pinlandes, ti ibabatok iti danum a yelo ket kadaanan nga ugalida nga agbalbalinen a popular. Ti lenguahe ti Finland adda piho a saona, nga avanto, a tukoyennat’ abut a silulukat idiay yelo a pagbatokan iti apagbiit.

Daytoy “nalamiis a kinamanagpasangbay” nagpaut laeng iti sumagmamano a segundo ngem immun-una ken sarunuen ti ag-15 minuto a panaguper iti napudot a sauna a 85 degrees Celsius. Makapainawa unay daytoy a kapadasan ket dinoblek pay, isu a naragsakan dagiti gagayyemko a Pinlandes!

Sigun kadagiti dadduma paglinglingayan laeng daytoy nga ugali. Kuna met dagiti dadduma a pasayaatenna ti salun-at, maikkat dagiti dadduma nga an-anayen, makessayan ti irteng, ket mangpakaradkad. Dagitoy a panangipapan ken dadduma pay a kuestion maipapan iti sauna dagiti Pinlandes ken ti ugalida nga aglangoy no kalam-ekna ket agdama a sirsiraraken dagiti sientista.—Naipatulod.