“Addaandat’ Nagpaiduma a Bileg iti Moral”
KALPASAN ti agarup 40 a tawen a pannakaidadanes idiay Czechoslovakia, dagiti Saksi ni Jehova nabalinandan nga inangay dagiti asamblea sirkito sadiay. Ti maysa idiay Ostrava, idi Mayo 1990, ket inreport ni Jiří Muladi iti pagiwarnak a Nová Svoboda (Baro a Wayawaya). Kadagiti dadduma a bambanag insuratna:
“Maipapan kadagiti Tattao a Naan-anay a Natauan”
“Iti tallo nga aldaw sakbay ti pasamak, agarup 90 a tattao nagtitiponda idiay Tatran Hall ket dinalusanda a nasaysayaat dayta ngem iti pannakadalusna iti 40 a tawen. Uray no un-unnaak ti bagik, kunaek daytoy, a ti pagtaripnongan ket kas ti kadalusna kalpasan ti dua-aldaw nga [asamblea], nga awan pulos aniaman a papel wenno rungrong ti sigarilio iti datar. Wen gayam, di agsigsigarilio dagiti Saksi ni Jehova.
“Ti umuna nga aldaw ti asamblea sirkito, adda 1,600 a timmabuno. . . . Nangrugida babaen ti maysa a kanta a kinansion ti amin. Adu a managputar mabalin nga agsiddaawda no kasanot’ kapintas dagitoy a kanta. . . . Tunggal banag naaramid nga awan pammarang. Awan nangipakaammo kadagiti mararaem ti saadna. (Gapuna diak pay ammo no asinot’ kangatuan iti ranggo ket agasenyo ta awan maseknan iti dayta.) Awan agkurno wenno mangiyawag kadagiti pagsasao. Adda kinapakumbaba, kinaasi, ken kinamanagrikna.”
Impormasion Maipapan kadagiti Saksi
“Jehova ti nagan ti Dios. Idiay Biblia a Czech, ti naganna ket naipatarus (wenno nasunuan) babaen ti nagan a Hospodin [Apo]. Dagiti Saksi ni Jehova idagadagdat’ panangusar ti orihinal a nagan ti Dios, ken babaen kadagiti pannakilangenda determinadoda a mangsaksi maipapan ti kaaddana ken dagiti tigtignayna. . . .
“Ti pammati dagiti Saksi ni Jehova iparitna ti panagusar kadagiti igam maibusor kadagiti tattao, ket dagidiay a nagkitakit iti pamunganayan a serbisio militar ken di nagtrabaho kadagiti pagminaan ti karbon naipanda iti pagbaludan, uray iti uppat a tawen.
“Manipud laeng iti daytoy nalawag nga addaandat’ nagpaiduma a bileg iti moral. Mabalintay nga usaren dagiti kakasta a di naagum a tattao uray kadagiti kangatuan a politikal nga akem—ngem ditay pulos ida maipan sadiay. Dagiti Saksi ni Jehova idagadagda a dagiti tattao inturayanda ti bagbagida ngem iti bukodda laeng a pagdaksan. Siempre, bigbigenda dagiti autoridad ti gobierno ngem patienda a ti laeng Pagarian ti Dios ti makabael a mangsolbar ti amin a natauan a problema. Ngem siputanyo—saanda a panatiko. Tattaoda nga ukopado iti sangatauan. Ket ita, mabalinyon a panunoten ti aniaman a kayatyo kadakuada.
“P.S. Saanak a kameng dagiti Saksi ni Jehova, uray pay makipagriknaak iti adu kadagiti ideyada.”
[Ladawan iti panid 25]
Asamblea idiay Lucerna Hall, Prague, Czechoslovakia