Komusta met Ngay ti Masanguanan?
Apay a makaay-ayo unay ti panagkappia ti tao ken animal? Gapu ta ti tattao ket orihinal a naparsuada a makikappia kadagiti animal, uray dagidiay makunkuna a naatap.
Idi pinarsua ti Dios ti immuna a lalaki ken babai, inkabilna ida iti paraiso a lugar ti daga tapno tagiragsakenda ti biag. Pinanggepna a maaddaandat’ annak ket isaknapda dagiti pagbedngan dayta orihinal a Paraiso agingga a sakupenna ti intero a daga. Iti dayta intero a daga, ti sangatauan maaddaan kadagiti animal a sitatalna nga iturayanda.
Ti salaysay ti Genesis kunaenna: “Ket iturayanda koma dagiti ikan iti taaw ken dagiti tumatayab iti langit ken dagiti an-animal ken ti amin a daga ken dagiti amin nga aggargaraw nga animal nga agkarkarayam iti daga. . . . Kalpasan dayta nakita ti Dios ti amin nga inaramidna ket, adtoy! nasayaatda unay.”—Genesis 1:26-31; 2:9.
Daytoy a panagpaituray dagiti animal ket saan a kakuykuyog ti kinaranggas. Nairanta a ti tattao ken dagiti animal agbiagda a sitatalna. Makita daytoy iti kinapudno nga idi dagiti animal limmabasda iti sanguanan ti tao tapno managananda, ti tao awan armasna. Ket awan ti nadakamat a panagbuteng nga imparangarang ti tao wenno animal.—Genesis 2:19, 20.
Ti Orihinal a Panggep Matungpalto
Makaparagsak, ta ti orihinal a panggep ti Dios ngangnganin maitungpal, inton amin dagiti aramid-tao a gobierno ket sinuktanen ti Pagarian ti Dios, nga agturay manipud langit. (Daniel 2:44; Mateo 6:9, 10) Iti naan-anay a pannakaipasdek manen ti turay ti Dios iti intero a daga, ti orihinal a panggep ti Dios iti daga ken ti agnaed a tao ken animalna maitungpalton.
Ti mangbalbaliw nga epekto ti nalinteg a turay ti Dios ket nagsayaat ti pannakailadawanda iti adu a padpadto ti Biblia. Kas ehemplo, paliiwenyo ti insurat ni Isaias iti sidong ti pannakaipaltiing: “Ket ti lobo makipagnaedto iti kordero, ket ti leopardo makikaiddanto iti urbon a kalding, ket ti urbon a baka ken urbon ti leon ken ti napalukmeg agkakaiddadanto; ket ti maysa nga ubing a bassit idalannanto ida. Ket ti baka ken ti oso agarabdanto; dagiti urbonda agkakaiddadanto. Ket ti leon manganto iti garami a kas iti baka a lalaki. Didanto mangranggas wenno mangdadael iti amin a bantayko a nasantuan; ta ti daga mapnunto iti pannakaammo ken Jehova a kas kadagiti dandanum saknapanda ti baybay.”—Isaias 11:6, 7, 9.
Dadduma a padpadto ipakitada met ti pudno a talna nga addanto iti baro a lubong ti Dios. Maipapan itoy impadto ni Mikias: “Ket pitpitendanto ti kampilanda a tadtadem ti arado ken dagiti gayangda a komkompay a pagpukan. Ti nasion saannanto nga ilayat ti kampilan a maibusor iti sabali a nasion, ket didanto sursuruenen ti gubat. Ket agtugawto ti tunggal maysa a tao iti sirok ti kayona nga ubas ken iti sirok ti kayona nga higos, ket awanto ti mangbutbuteng kadakuada.”—Mikias 4:3, 4.
Awanto kadagiti atap nga animal ti mangsinga iti talna ti sangatauan, ta ti naimpadtuan a sao ti Dios kunana: “Ket mangaramidakto kadakuada ti maysa a tulag ti kappia, ket pasardengekto dagiti dakes nga an-animal iti daga, ket agnaeddanto a sitatalged iti let-ang ken maturog iti bakir. . . . Ket sitatalgeddanto iti dagada.”—Ezequiel 34:25, 27.
Isut’ gapuna a ti kappia ken panagtutunos iti intero a naisubli a Paraiso ket naan-anayton. Daytat’ gapuna no apay a dagiti kasasaad sadiay mabalin a mailadawan iti maudi a libro ti Biblia a kastoy: “‘Ket [ti Dios] punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Ta dagiti immuna a bambanag napalabasdan.’ Ket daydi situtugaw iti trono kinunana: ‘Adtoy! pagbalinek a babbaro dagiti isuamin a bambanag.’ Kasta met, kinunana: ‘Isuratmo, ta dagitoy a sao papatien ken napudnoda.’”—Apocalipsis 21:4, 5.
Wen, papatien ken napudnoda. Kaipapanan daytoy a mapagtalkantayo dagiti kari ti Dios, ta saan a kas ti imperpekto a tattao, addaan iti puersa, ti kinasirib, ken ti determinasion a mangitungpal iti karkarina. Kas kunaen ti maysa kadagiti matalek nga adipen ti Dios idi ugma: “Awan ti uray maysa a nagkurang kadagiti amin a naimbag a ni Jehova a Diosyo insaona a maipanggep kadakayo. Isuda amin natungpalda kadakayo. Awan ti nagkurang kadakuada nga uray maysa.”—Josue 23:14; kitaenyo met ti Isaias 55:11.
Mabalintayo met ti maaddaan ti kasta a panagtalek nga iti mabiiten, iti baro a lubong ti Dios, ti orihinal a panggepna para iti daga, para iti tattao, ken para kadagiti an-animal matungpalton. Ti inted-Dios a kappia agbalinton a kinapudno. Ket saanto laeng a ti kasta a kappia agturay kadagiti tattao no di ket maisilnagto met iti dasig dagiti an-animal.