Ti Panangmatmat ti Biblia

Ipalubos Kadit’ Biblia ti Panangig-iggem ti Uleg?

ITI babassit a simsimbaan, agtataripnong dagiti matalek. Agtokarda kadagiti de koriente a gitara ken agkantada kadagiti kankanta ti ebanghelio. Agkararagda maipaay iti pannakaagas. Umimdengda kadagiti simple a sermon ket maragragsakanda iti awaganda a “baro a pagsasao.” Kadagitoy amin, saanda a naiduma iti aniaman nga adu a Pentecostal wenno karismatiko a grupo iti Kakristianuan. Kalpasanna alaendan ti sabidong, ti apuy, ken dagiti uleg.

Ti sabidong ket gagangay nga strychnine, (napigsa a sabidong manipud mula), a marunaw iti danum. Ti apuy mabalin nga umap-apuy a naopran ti gas a lupot wenno silaw a gangtan ti acetylene, ket dagiti uleg mabalin a rattlesnakes wenno copperheads, a nalaka laeng a masarakan iti Kabambantayan ti Appalachia iti Estados Unidos, a sadiay gagangay dagitoy a grupo. No mariknada nga ayaban ida “ti espiritu” a mangaramid iti kasta, uminumda ti sabidong ken isebbada dagiti im-imada iti apuy. Agiggemda met ti ul-uleg, nga isallabayda iti taktakiagda ken abagada, idekketda iti bagbagida, nga ipasada dayta iti maysa ken maysa. Apay?

“Iggamak dagiti uleg ta adda dayta iti Biblia, kas maysa a bilin,” kuna ni Dewey, ti pangulo iti bassit a simbaan iti West Virginia.a Kuna ni Dewey a nakagaten iti namin-106 a daras, ket addaan kadagiti piglat a mangpaneknek iti dayta. Pudno kadi nga ibilin ti Biblia dagita a bambanag?

“Dika Sulisogen ti Apo”

“Ti saan nga agayat saanna nga ammo ti Dios; ta ti Dios isu ti ayat,” kuna ti Biblia idiay 1 Juan 4:8, King James Version. Sapulen kadi ti Dios iti ayat kadagiti managdaydayawna ti mangipaay iti di kasapulan a rigat iti bagbagida? “Naut-ot ti kagat,” kuna ni Dewey. “Daytat’ ut-ot a mamin-100 a daras a nakarkaro ngem ut-ot ti ngipen . . . Mariknam a kaslaka maur-uram.” Nupay agbiag ti kaaduan a biktima iti kagat ti uleg, pinulpullo a matmatay ti mapaneknekan, agraman ti ipapatay ti kabsat a babai ni Dewey idi 1961.

Siempre, kankanayon a dagiti Kristiano sisasaganada a matay maipaay iti pammatida, ngem ti ipapatayda ti gagangay nga ipaay dagiti dadduma gapu iti panagkedkedda a mangikompromiso kadagiti prinsipio ti Biblia. Iti kasumbangirna, idi inawis ni Satanas ni Jesu-Kristo nga awan ar-arnasna a pagpeggadenna ti biagna ken igagarana babaen ti itutuppuakna manipud iti torre ti templo, “kinuna ni Jesus kenkuana, Adda a naisurat, Dika sulisogen ti Apo a Diosmo.” (Mateo 4:7, KJ) Saan kadi a panangsulisog iti Dios, wenno sipaparammag a panangkarit kenkuana, ti panangay-ayam kadagiti uleg, apuy, wenno sabidong? Saan kadi a ti kasta a panangsubok ipamatmatna ti nakaro a kinakurang iti pammati iti biang ti managdaydayaw, maysa a panangikagumaan a mangpilit iti Dios a paneknekanna ti bagina a pudno iti saona babaen kadagiti nakaskasdaaw nga ar-aramid?

Aniat’ Ibilin dagiti Kasuratan?

Dagiti miembro iti grupo a mangig-iggem iti uleg kunaenda a dagiti ar-aramidda ket imbilin ti Sao ti Dios, ket isitarda ti Marcos 16:17, 18 kas pammaneknek. Sigun iti King James Version, dagitoy a bersikulo mabasa: “Ket dagitoy a pagilasinan kuyogendanto dagiti mammati; Iti naganko paruarendanto dagiti sairo; agsaodanto kadagiti babbaro a pagsasao; agpidutdanto kadagiti ul-uleg; ket no uminumdanto ti makagamut, saandanto a maan-ano; ipataydanto dagiti im-imada kadagiti masaksakit, ket umimbagdanto.”

Umuna, masapul a bigbigentayo a dandani amin nga eskolar ti Biblia umanamongda a dagitoy a bersikulo ket saan nga orihinal a paset iti Ebanghelio ni Marcos. “Ti mapagduduaan a kinapudno iti Mar 16 bersikulo 9-20 ti mamagbalin iti dayta a saan a nainsiriban ti mangibangon iti maysa a doktrina wenno mangibatay iti maysa a kapadasan kadakuada (nangnangruna dagiti ber. Mar 16:16-18),” kas itudo ti komentarista a ni Charles Ryrie.

Nupay kasta, dagidiay a mangig-iggem kadagiti uleg iti panagdaydayawda masansan a saanda a maawis iti pagarupen dagiti eskolar ti Biblia maipapan iti kinapudno iti Marcos 16:9-20. Adda dagiti bersikulo iti King James Bible, nga isu ti kakaisuna a Biblia a taltalkenda amin, ket para kadakuada daytan ti pagpatinggaan ti amin.

Ngem uray pay no mapagtalkan dagitoy a bersikulo, dagitoy dida ibilin ti panangiggem kadagiti uleg wenno pananginum iti sabidong, ken dagitoy awan ibagbagada maipapan iti apuy. Gapuna dagitoy saan a mabalin nga ibasa a kas kasapulan maipaay iti panagdayaw. Kinapudnona, pudno a kinaptan ti maysa nga uleg ni apostol Pablo idiay isla iti Malta (Melita, KJ) ngem aksidente laeng ta adda iti reppet dagiti sangsanga nga isungsungrodna iti apuy. Nupay nakagat ni Pablo ket sinalakniban ti Dios manipud iti pannakadangran, dina impasa ti uleg kadagiti dadduma tapno iggamanda. Imbes ketdi, “inwagsakna daydi uleg iti apuy.” Imbes a makarikna iti kasla makauram nga ut-ot a kas kadagiti moderno a mangig-iggem iti uleg, “awan dakes a napasamak” kenkuana.—Aramid 28:3-6, KJ.

Pakasubokan iti Pammati?

Sigun iti The Encyclopaedia of American Religions, ti panangi-iggem iti uleg ket nabiit pay a pasamak. “Idi 1909,” kunaenna, “ni George Went Hensley, maysa nga agtutubo nga agnaed iti aw-away ti Grasshopper Valley, Tennessee, nakumbinsir a dagiti reperensia iti Marcos 16:17-18 maipapan kadagiti ul-uleg ken sabidong ket, iti kinapudnona, maysa a bilin. Nangtiliw iti maysa a rattlesnake ket iti sumagmamano nga aldaw kamaudiananna iti asideg a Sale Creek, iti tengnga iti serbisio ti panagdayaw, inruarna ti uleg nga iggaman dagiti makipaspaset kas pakasubokan iti pammatida.” Ngem awan ti ebidensia, Nainkasuratan man wenno historikal, a dagiti immuna a Kristiano sinapulda ti aniaman a kasta a ‘pakasubokan iti pammatida.’

Mainayon iti dayta, usigenyo daytoy: Inusar ti Dios ni Pablo a mangpagungar kadagiti natay; ngem isut’ naaddaan iti nainkalintegan a panagannad maipapan iti bukodna a salun-at ken ti salun-at dagiti kakaduana. (1 Timoteo 5:23; 2 Timoteo 4:13) Saan a pinadpadas ni Pablo ti nangpataud kadagiti gundaway a mangpagungar kadagiti tattao.

Gapuna, imbes a maaddaan kadagiti bagbagi a dinadael ti ut-ot wenno napiglatan babaen iti kagat ti uleg, dagiti Kristiano mabalakadanda a ‘mangiparang iti bagbagida kas daton a sibibiag, nasantuan, makaay-ayo iti Dios, isu a nainkalintegan a panagserbida.’ (Roma 12:1, KJ) Imbes nga ibilinna a dagiti Kristiano subokenda ti pammatida babaen iti awan annadna nga ar-aramid, ti nainkalintegan a balakad ti apostol isut’: “Sukimatenyo dagiti bagbagiyo met laeng, no addakayo iti pammati; suutenyo dagiti bagbagiyo met laeng.” (2 Corinto 13:5, KJ) Suutenyo ti pammatiyo iti Sao ti Dios. Ti napudno a panangsukimat iti bagiyo met laeng, nga idiligyo ti pammatiyo iti Kasuratan, tulongannakayonto a mangikeddeng no ti pammatiyo makalasatto iti dayta kapapatgan iti amin a pakasubokan iti anamong iti Dios.

[Footnote]