Parmeken ti Nasupit a Pagtaengan!

‘KASAPULAK ti nalawlawa a pagtaengan!’ Namin-anon a daras a nangngegyo—wenno naisao—dayta gagangay a reklamo? Ti kadi sungbat isut’ dakdakkel a pagtaengan wenno apartment? Nalabit saan. Kaaduan kadatayo basta dina kabaelan ti umakar. Ken uray dagidiay a makabael mabalin a masarakandanto iti apagbiit a ti parikut iti kinasupit maulitto manen a mapasamak.

Ti kinapudno ket, kasano man kabassit ti pagtaengantayo, masansan nga adda umdas a kuarto maipaay kadagiti bambanag a kasapulantayo. Dagiti sobra kaaduanna ti mangpatpataud iti parikut. Ket no di naurnos ken nakawarwara ti pagtaengan, mabalin a daytat’ kankanayon a gubuayan iti rigat, pannakapaay, ken danag. Ngarud, ipamaysatayo kadagiti tallo a pamay-an a “mangsapul” iti nalawlawa a pagtaengan iti mismo a pagnanaedanyon—ti pagtaenganyo!a

No. 1: Ibelleng dagiti Di Napateg a Bambanag

Iti adu a pagtaengan ti panagdalus iti primavera wenno otonio ket maysa a ritual a panangsukat, panangdalus ken panangisubli kadagiti bambanag iti dati a lugarda. Ngem apay a dikay usaren daytoy a gundaway a mangikkat kadagiti di napateg a bambanag?

Ugaliyon aya ti mangidulin kadagiti daan a diario ken magasin? Padasenyo a kartiben dagiti artikulo a pudno a kayatyo nga idulin (nga imarkayo ti nagan ti periodiko, petsa, ken panid maipaay iti masanguanan a reperensia) ket kalpasanna ibellengyon ti dadduma a diario wenno magasin. Masdaawkayto iti baro a lugar a patauden daytoy!

Kitaenyo, met, ti mueblesyo. Addada kadi dagiti bassit ti usarna a manginayon laeng iti wara? Nalabit ad-adda a kasapulan ti maysa a gayyem. Ket ti met ngay klosetyo? Apay a dikay usigen ti panangikkatyon iti aniaman a dikay insusuoten iti nakatawen wenno nabaybayag pay?

Ipapantayon, kasla dakkel a proyekto daytoy, ket mabalin a kasta. Gapuna pagbalinenyo a proyekto ti pamilia. Iramanyo dagiti ubbing ken ti asawayo. No dagiti annakyo makiramanda iti proyekto, mabalin a kayatdanto nga ikkaten dagiti dadduma a di kasapulan a bambanag a kukuada. Ti resulta? Nalabit pangrugian iti agpaut iti biag a padron iti kinadalimanek.

No. 2: Usarenyo ti Amin nga Adda nga Espasio

Itan pasiarentayo ti pagtaenganyo ket ilasintayo dagiti amin a lugar a pagipempenan. Daytoy iramanna dagiti diding, estante, ruangan, pasilio, kloset, ken ti bubida. Dagiti nalaka laeng a basket wenno rack mabalin a maibitin iti diding ti pasilio wenno iti ruangan tapno pagidulinan kadagiti sapatos, twalia, ken dadduma pay. Dagiti kahon wenno kaing mabalin nga usaren a pagidulinan kadagiti liblibro, ay-ayam, album ti retrato, ken dadduma a bambanag a kayatyo nga idulin. Babaen ti panangikabilyo kadagitoy a pagikkan iti klosetyo, mausaryo ti di maus-usar nga espasio iti datar.

Al-alaen kadi dagiti makupin a tugaw ti nakaad-adu nga espasio? Nalabit mabalin nga idulin ida iti sirok ti sofa wenno iti likudan ti kurtinayo. Al-alaen kadi dagiti babassit a pagikkan ti libro ti napateg nga espasio a pagtaengan? Apay a dikay mangaramid ti pagikkan iti libro a manipud datar agingga iti bubida iti pasilioyo? No ikkanyo ti rikepna mabalin met a pagikkan kadagiti dadduma a banag malaksid kadagiti libro.

Dikay liplipatan ti espasio iti sirok ti kamayo. Dagiti plastik wenno karton a kahon mabalin nga ikabil sadiay a pagidulinan kadagiti di us-usaren nga ules. Ket dagiti ngay didingyo? Dagiti dadakkel nga speaker ti stereo mabalin a maikabil iti diding ket iti kasta maekonomia ti espasio. No nakawara dagiti ay-ayam iti datar iti kuarto ti anakyo, padasenyo ti mangikabil iti estante iti diding. Dagitoy mangipaayda iti lugar a pangikabilan ti anakyo kadagiti ay-ayamna, imbes nga urnongen ida iti nagdakkelan a baul. Dagiti ay-ayam makitkita pay dagiti ubbing, ket dagiti estante mabalin nga ipangato iti diding no dumakdakkelen ti ubing. Mabalin a nausar met dagiti estante iti banioyo a pagidulinan iti twalia, sabon, ken dagiti usaren iti kasilias.

No. 3: Baliwanyo ti Urnos ti Pagnaedanyo

Masansan a mapalawa ti pagnaedan babaen ti panangbaliw iti urnos ti sumagmamano a bambanag. Adu nga agtagibalay ti mangikabil kadagiti amin a mueblesda a nakatalikud iti diding, a ti tengnga ti kuarto awan ti nagyanna. Padasenyo ti mangikabil iti dua nga estante ti libro nga agtinnalikud tapno agserbi a dibision ti kuarto. Wenno panunotenyo ti mangikabil iti pagikkan ti libro a manipud datar agingga iti bubida nga agserbi agpadpada a pagidulinan ken dibision ti kuarto. Itan mabalinen nga usaren dayta a kuarto agpaay iti dua a panggep—maysa agpaay a pagadalan, ti sabali agpaay iti dadduma nga ar-aramid iti balay. Dagiti dibision ti kuarto nausarda nangnangruna no agkakuarto dagiti annak. Paaduenna ti panagsolsolo a bassit laeng ti gastos.

No nasupit ti pagtaengan, nupay kasta, no dadduma uray pay ti kasayaatanen a panangikagumaan a mangbalbaliw iti urnos di makaipaay iti tarigagayan a resulta. Nalabit mapagbalinyo a kasla nalawa babaen iti panangusar iti sarming iti diding wenno ti panangbaliw iti pintura ti pagtaenganyo iti nakuskusnaw a kolor. Ti panangaramid iti uray ania kadagitoy palawaenna ti panagkita iti pagtaenganyo.

No parikut ti kinasupit ti pagtaengan, apay a dikay padasen dagitoy a simple a singasing? Mabalin a masarakanyonto a no ti pagtaenganyo ket nadalimanek ken naurnos, manginayon iti nasayaat a rikna ken talna ti isip iti intero a pamilia—maitutop a gunggona agpaay iti pannakidangadang iti nasupit a pagtaengan!

[Footnote]