Manipud Managbasatayo

Di Pannakabigbig iti Kolor Naglasat ti asawak iti operasion iti mata ket ita saan a makabasa. Apaman a naawatmi ti artikulo maipapan iti Daltonism [di pannakabigbig iti kolor] a Pebrero 22, 1991, a bilang, dinawatna ti panangibasak iti dayta kenkuana. Kas ubing, dina mabigbig ti nangisit ken puraw a ladawan, ngem awan ti maseknan iti pamiliana. Idi laeng nangala ti eksamin para iti lisensiana nga agmaneho a naammuanna nga isut’ di makabigbig iti kolor. Ngarud iyebkas ti asawak ti panagyamanna iti artikuloyo. No koma no nagun-odanna dayta idi, mabalin a naliklikanna dagiti adu a di nasayaat a kasasaad!

M. D., Italia

Biningay ti Relihion a Pagtaengan Ti artikuloyo nga “Agimtuod dagiti Agtutubo . . . Kasanot’ Panagbiagko iti Biningay ti Relihion a Pagtaengan?” (Enero 22, 1991) pudno a tinulongannak nga agballigi. No dadduma ni tatangko kayatnak a di tumabuno iti Nakristianuan a gimong tapno agbuyaak laeng iti TV. Tinulongannak ken ni nanangko ti artikuloyo a kankanayon nga agkararag ken manginanama a ni Jehova tignayenna ti puso ni tatangko. Pagyamanan!

C. E., Estados Unidos

Saan a Kristiano ni tatangko, ket no dadduma daytat’ mangpaladingit kaniak. Planok nga usaren dagiti makatulong a puntosyo tapno padasek ti mangallukoy kenkuana.

L. M., Estados Unidos

Kooperasion ti Doktor-Pasiente Agyamanak kadakayo maipaay iti artikulo a “Panagkinnaawatan dagiti Doktor ken dagiti Pasiente a Saksi.” (Nobiembre 22, 1990) Addaanak ti bassit nga anak a lalaki a naipasngay nga addaan iti hydrocephalus ken spina bifida. Isut’ naopera iti innem a daras sakbay ti nakatawenna. Nupay no simmayaat ti kasasaadna, kasapulanna pay laeng ti medikal a pannakaaywan. Gaput’ takdertayo maipapan iti dara [kas Saksi ni Jehova], agduaduaak no dagiti doktor makitinnulongda. Inanamaenmi a ti urnos a kaadda dagiti nasanay a Kristiano a kakabsat a lallaki a tumulong kadatayo a makilangen kadagiti doktor dumtengton ditoy Argentina.

A. M., Argentina

Maipaspasdeken dagiti Hospital Liaison Committees iti Argentina.—ED.

Makindaya nga Europa Nanipud idi nangrugi dagiti nabiit pay a panagbalbaliw idiay Makindaya nga Europa, magagaranakon a makaammo ti maipapan kadagiti Saksi ni Jehova nga agnanaed iti dayta a paset ti daga. Bassit laeng ti publikasion a masarakan kadagiti publikasiontayo. Panunotenyo laengen ti pannakapnekko idi naawatko ti Enero 8, 1991, a bilang nga addaan iti artikulo a “Dagiti Saksi ni Jehova iti Makindaya nga Europa.” Inanamaek nga itultuloyyo ti mangpakaammo kadakami maipapan iti irarang-ay ti trabaho a panangasaba iti dayta a paset ti lubong.

E. S. L., Brazil

Resistensia Kayatko nga ipakaammo kadakayo no kasano a nagsayaatan a medikal a panagsirarak ti naaramid kadagiti artikulo maipapan iti resistensia. (Nobiembre 22, 1990) Agtartrabahoak iti hematology-oncology ket pudno nga inapresiarko ti aduan pannakaammo ken nalawag a pamay-an a pannakaiparang ti material. Nakaiwarasak kadagiti kopia ti magasin kadagiti doktor ken narses a katrabahuak.

G. T., Estados Unidos

Maysaak a mannursuro iti siensia, ket naiparna a salsalaysayenmi ti immunology iti klase idi naipablaak daytoy a bilang iti Agriingkayo! Nangiwarasak ti maysa a kopia iti tunggal estudiante, ket naaddaankam iti abanse a sesion iti siensia a naibatay iti dayta.

R. I., Estados Unidos

Droga Idi nabasak ti artikulo a “Droga? Alamanuem Laeng ni Satanas!” (Nobiembre 8, 1990), nakasangitak. Nakalkaldaang ti report, ngem ketdi, makapabileg. Pinagbalin a nalawag ti artikulo a di makagunggona ti panangisukat ken ni Jehova maipaay iti aniaman nga itukon daytoy daan a lubong.

M. C. P., Brazil