Manipud Managbasatayo

Sangalubongan a Panagkakabsat Pudno nga inapresiarko ti impormasion iti bilang a Disiembre 8, 1990. Agnanaedak iti maysa a pamilia a sadiay adda ti panangidumduma ti rasa, ket masansan a daytoy ti mangparurod kaniak. Nagur-urayak iti impormasion a kas itoy tapno iramanko kadakuada. Nalawag ti pannakaiparangna ken direkta iti punto, dagiti artikulo makagunggona koma a tumulong kadakuada nga umawat no apay a masapul a tuladentayo koma ti ulidan ti Dios a saan a mangidumduma.

T. C., Estados Unidos

Dagiti Biningay ti Relihion a Pagtaengan Agyamanak iti kasta unay kadakayo gapu iti artikulo nga “Agimtuod dagiti Agtutubo . . . Kasanot’ Panagbiagko iti Biningay ti Relihion a Pagtaengan?” (Enero 22, 1991) Bayat ti panangbasak a kaduak dagiti annakko iti artikulo, nariknami no kasano a kasla pudno a naawatanyo no kasanot’ rigat ti kastoy a kasasaad. Dayta dineskribirna dagiti adu a parparikut a personal a sangsanguenmi iti pagtaenganmi. Makaparegta unay ti makaawat iti praktikal a balakad manipud iti Kasuratan!

D. H., Estados Unidos

Siak dumakdakkelak met iti biningay ti relihion a pagtaengan. Kas iti ubing a lalaki a naadaw iti artikulo, no dadduma malidlidayak gapu ken tatangko ta agsolsolo a mabati iti balay no mapankami kadagiti Nakristianuan a gimgimong. No dadduma masulisogak a mangikompromiso iti pammatik. Kalpasan ti panangbasak itoy nga artikulo, nupay kasta, inkeddengko a nupay naasiak ken nataktika ken tatangko, masapul nga annadak met dagiti pakaikulbuan a naespirituan.

J. O., Japan

Panangawat iti Pammabalaw Nanipud pay idi nagbalinak a maysa a Kristiano, sapsapulenen dagiti dadakkelko ti pangbabalawanda kaniak. Daytoy ket makaparurod unay. Ngem ti artikuloyo a “Kaguram Aya ti Mababalaw?” (Pebrero 8, 1991) impakitana kaniak no kasano ti panangtaming itoy a kasasaad.

M. M., Estados Unidos

Dagus a Pannakapnek Masapul nga iyebkasko ti ‘panagyaman!’ maipaay kadagiti artikulo maipapan iti dagus a pannakapnek. (Enero 22, 1991) Makidangdangadangak itoy a mentalidad, gapu laeng iti innem nga oras a panagbuybuyak iti telebision bayat ti kinaubingko. Ti panangbasak kadagiti artikulo pinabarona ti panangmatmatko.

R. D., Estados Unidos

Panagtabako Nakasarakak ti maysa a kopia iti Agriingkayo!, a mangtamtaming iti panagtabako, iti maysa a pagteleponuan. (Hulio 8, 1989) Ti bangabanga iti akkub ket pudno a mangawis iti atension! Simmardengak nga agsigarilio uppat a tawenen ti napalabas, ngem impasak ti magasin iti maysa kadagiti annakko nga agsigsigarilio. Adda pay tallo a sabali nga annakko a maspaul a sumardeng met nga agsigarilio. Dagiti artikulo ket makaipaayda kadagiti adu nga impormasion ken direkta iti punto. Nupay didak kapammatian, raemek dayta.

P. T., Estados Unidos

Agsigarilio iti kasta unay ti mannursurok, ket tunggal makisarita kaniak, isut’ agat-asuk ti sigarilio. Nalagipko ti artikulo nga addaan iti sangapulo a pamay-an iti panangisardeng ti panagsigarilio. Impaayak ti mannursurok ti maysa a kopia ket inimtuodko kenkuana no simmardengen nga agsigarilio. Imbagana kaniak a babaen iti tulong ti magasin ken ti panangikagumaanna, isut’ simmardengen. Isut’ nagsigsigarilion iti 25 a tawen.

B. O., Estados Unidos

Agsolsolo a Naganak a Sangakabbalayan Maysaak nga agsolsolo a naganak, ket gapu iti rigat iti panangpadakkel ken panangipaay kadagiti annakko ken iti bagik, apektarannak ti panagannayas a mangipamaysa kadagitoy a bambanag, a masansan mariknak a sisiak laeng ti kastoy ti kasasaadna. Ti artikuloyo a “Kasanok ti Agragsak a Makipagnaed iti Maymaysa a Nagannak?” (Disiembre 22, 1990) tinulongannak a makakita kadagiti bambanag iti sabali a punto de bista—ti punto de bista dagiti annakko. Nabigbigko a dagiti rikrikna ken kasapulak saan nga isu laeng ti masapul nga usigen.

P. G. B., Estados Unidos