Manipud Managbasatayo

Pannakariribuk Idiay Eskuelaan Maragsakanak a makaawat iti artikulo nga “Agimtuod dagiti Agtutubo . . . Kasanot’ Aramidek Tapno Baybay-annak nga Agmaymaysa?” (Mayo 22, 1991) Daytoy ti umuna a tawenko iti high school, ket adun dagiti lallaki a mangpilpilit kaniak a makinobio. Maysa kadakuada ti basta di mangbaybay-a kaniak. Dinawatna ti ipapanko iti prom, rummuar a mangan, ken ti pay ipapan iti bambantay iti ngudot’ lawas. Ti panangibaga iti “saan” di nangpasardeng kenkuana. Ngem ti artikulo ti nangpabileg kaniak a mangliklik kenkuana.

P. B., Estados Unidos

Nupay no 17 laeng ti edadko, nakasabetakon kadagiti kasasaad a kas iti nadeskribir iti artikulo. Ngem gaput’ maay-ayoak iti atension, diak pulos pinasardeng dayta. Itan maawatakon ti pannakasapul iti dagus a panagkedked kadagita a panangipakita iti panangipateg.

L. A. R., Brazil

Tinulongannak ti artikulo a mangtaming iti umad-adu nga imoralidad idiay pagtrabahuak. Intudona dagiti peggad ket intandudona dagiti argumento nga addaan kadagiti Nainkasuratan a pangarigan. Nalawag a dagita nga artikulo tulonganna saan laeng a dagiti agtutubo no di ket dagiti agwaywayas a tattao iti amin nga edad.

K. H., Alemania

Tinulongannak ti artikulo a mangpabileg iti determinasionko, kas iti balasang a Sulamita, nga agbalin a “maysa a pader.”

E. S., Filipinas

TMJ Syndrome Pagyamanan iti artikulo a, “Di Panagtimbeng ti Panga—Ti Dakkel a Manangallilaw.” (Hunio 22, 1991) Adda napigsa a panagwengweng dagiti lapayagko iti dua a tawen gapu iti TMJ syndrome. Ti artikuloyo tinulongannak a mangikeddeng no ania a kita ti doktor ti masapul a pagkonsultaak. Mariknak a ni Jehova impaayna daytoy nga artikulo maipaay kaniak ken dagiti adu a di mabilang a dadduma pay nga agsagsagaba iti TMJ.

R. B., Estados Unidos

Ti “Agriingkayo!” di mangipapaay kadagiti balakad iti medisina, ngem maay-ayokami a mangipaay iti makatulong nga impormasion kadagiti managbasami. Di pakasdaawan, ti artikulo tinignayna ti naisangsangayan a kaadu dagiti sungbat manipud kadagiti managbasa iti aglawlaw ti lubong.—ED.

Panagsigarilio Gaput’ nabasak dagiti dua nga “Agimtuod dagiti Agtutubo . . . ” nga artikulo maipapan iti panagsigarilio (Agosto 8 ken 22, 1991), patalgedak laeng ti naisurat. Nangrugiak a nagsigarilio idi agtawenak iti 13, ta inallukoydak dagiti gagayyem idiay eskuelaan. Ngem idi nagbalinak a maysa a Kristiano idi agtawenak iti 15 ket insardengkon ti agsigarilio, nasarakak a binaybay-andakon dagiti “gagayyemko.” Kamaudiananna, pilpilitendak manen dagiti katrabahuak nga agsigarilio. Nagasat ta, itan agtartrabahoakon maipaay iti pada a Kristiano, ket ti angin iti aglawlawko nadalusen—iti literal ken naespirituan.

B. S., Alemania

Mamaglinteg Pagyamanan iti artikulo a “Ti Pannakabalin ti Kinapudno a Mamaglinteg.” (Hulio 22, 1991) Agdamaak a balud ket napabilegak iti pannakangngegko iti panangbalbaliw ti maysa a tao iti biagna. Padpadasen dagiti autoridad a balbaliwan ti kababalin dagiti kriminal, tapno isublida laeng ida iti lubong ni Satanas nga agbasol manen. Nasarakak, babaen iti tulong dagiti mannakaawat a ministro dagiti Saksi ni Jehova, a ti laeng manayon a mamaglinteg ramanenna ti panangsapul ken panagserbi iti Dios.

J. S., Estados Unidos

Lugar a Pagtaengan Kayatko ti agyaman kadakayo maipaay iti artikulo a “Parmeken ti Nasupit a Pagtaengan!” (Abril 22, 1991) Agnanaedkami iti bassit nga apartment, ket kasla kanayon a nakaad-adu dagiti alikamenmi. Daytoy nga artikulo nakagunggona iti adu kadakami ta inkeddengmi nga ikkaten dagiti isuamin a banag a saanmin nga us-usaren. Daytoy ket narigat mga aramiden, ket ikagkagumaanmi pay laeng nga aramiden dayta. Agyamankami iti kasta unay, ta kasla naisurat daytoy nga artikulo a maipaay a nangnangruna kadakami.

L. C., Guatemala