Manipud Managbasatayo

TV Agyamanak iti serie dagiti artikulo a “Telebision—Ti Kahon a Nangbalbaliw iti Lubong.” (Mayo 22, 1991) Kankanayon nga addaanak iti parikut iti TV; awan ti nabileg a pakinakemko a mangiddep iti dayta. Nakatulong dagiti singasingyo. Kankanayon a siputak no kasano kapaut ti panagbuyak iti telebision. Inkabilko met ti TV iti kloset tapno no kayatko ti agbuya, umuna a matingitingko dagiti pagimbagan ken pagdaksan ti panagbuya. Agyamanak manen.

W. H., Estados Unidos

Team iti Eskuelaan Kalkalpasko pay laeng a binasa ti artikulo nga “Agimtuod dagiti Agtutubo . . . Rebbeng Kadi a Makikaduaak iti Team ti Eskuelaan?” (Hunio 22, 1991) Pilitendak dagiti kapatadak a makikadua iti team ti eskuelaan agsipud ta ammoda a pagay-ayatko ti ay-ayam. Agyamanak kadakayo, itan mailawlawagkon no apay a diak makikadua.

D. K., Estados Unidos

Panangbalbaliw iti Kinataoyo Kayatko ti agyaman kadakayo manipud iti kaungan ti pusok gapu iti nagsayaatan a singasing nga intedyo iti serie a “Rebbeng Aya a Baliwam ti Kinataom?” (Hulio 8, 1991) Nabigbigko a masapul a mangaramidak iti panagbalbaliw iti personalidadko, ngem awan ti mangtignay kaniak a mangaramid iti kasta. Ikagkagumaakon ti mangiyaplikar iti balakadyo, ket makitkitakon a makagunggona iti kasta unay.

S. C., Italia

Kalpasan ti iruruarko iti kuarto ti sikiatria iti ospital, binasak dagiti artikulo maipapan iti ‘panangbalbaliw.’ Agaplikar kaniak ti saritaenna! Innalana ti 30 a tawen a makitak nga adda serioso unay a parikut iti kababalinko. Ita makitakon ti pudpudno a kinataok, ket itan ta pagaammokon dagiti parikutko, makaalaakon kadagiti addang a mangtengngel iti bagik.

J. D., Estados Unidos

Dagiti Bara Agtawenak iti 13 años. Malagipko ti panagadalko maipapan iti bara idi maikalima ti gradok, ngem nalipatakon ti kaaduan iti impormasion. Ti artikuloyo a “Ti Bara—Pagsidsiddaawan a Disenio” (Hunio 8, 1991) pinabarona ti memoriak. Daytat’ nagsayaatan ti pannakaisuratna, ket ti diagrama umiso unay. Agyamanak iti kasta unay kadagiti artikulo kas kadagitoy a tumulong a mangpauneg iti panangapresiarko kadagiti nakaskasdaaw a panamarsua ni Jehova.

A. M., Estados Unidos

TMJ Syndrome Ti artikulo a “Di Panagtimbeng ti Panga—Ti Dakkel a Manangallilaw” (Hunio 22, 1991) ket naisangsangayan a paginteresak, ta maysaak a siruhano iti oral-maxillofacial ket nangag-agasakon iti parparikut iti TMJ iti nasurok a 14 a tawtawen. Ibagayo a ti kaaduan a makagapu iti sakit a TMJ isu ti malocclusion, kayatna a sawen, ti di umiso a panagtimbeng ti makingngato ken ti makimbaba a ngipen. Dagiti nabiit pay a medikal a literatura ken ti kapadasak a mismo ipakitana a nupay no ti occlusion adda pasetna iti dadduma a pasiente, saan a dayta ti kangrunaan a makagapu. Kaaduan a pasiente ti pudno a saan nga agtimbeng ti panagsilpo a mismo ti pangada. Dadduma a bambanag agparang a mairaman, kas iti parikut iti dori. Dagiti pamay-an a saan a pannakaopera a kas ti physical therapy ken panangagas ti chiropractor mabalin nga epektibo iti panangbang-ar iti reklamo ti pasiente. Dagiti pasiente nga addaan iti TMJ syndrome masapul met a limitaranda ti taraonda kadagiti nalukneng a taraon. Ti panangpabassit iti trabaho dagiti piskel ken nagsusuopan ti panga agbanag iti pannakapukaw dagiti sintomas. Ngem para iti kaaduan a pasiente, awan ti pudno nga agas—ti laeng pudno a pannakaagas dumtengto iti sidong ti Pagarian ti Dios.

C. A., D.M.D., Estados Unidos

Agyamankami itoy a kanayonan nga impormasion, a paneknekan ti kapadasanyo a mismo. Apresiarenmi dagitoy a kapaliiwan.—ED.

Panangileppas iti Rinugianyo Idi basaek ti artikulo nga “Agimtuod dagiti Agtutubo . . . ‘Apay a Diak Malpas ti Rinugiak?’” (Setiembre 8, 1991), pagarupko no agsursuratkayo maipapan kaniak. Babaen iti tulong ti artikuloyo ken ti tulong ni Jehova, maileppaskonton ti rinugiak. Agyamanak unay iti naintiempuan nga impormasion.

A. P., Estados Unidos