Manipud Managbasatayo

TMJ Syndrome Agyamanak iti artikulo a “Di Panagtimbeng ti Panga—Ti Dakkel a Manangallilaw.” (Hunio 22, 1991) Sumagmamano a tiempon a napalabas, nagsagabaak itoy a parikut. Makariingak iti rabii, a madandanagan gapu ta di makaem ti pangak! Di nasarakan dagiti dadduma a doktor ti parikut agingga a nagkonsultaak iti maysa nga eksperto a dentista. Dagdagus a nasarakanna a daytat’ gapu iti rukapi a ngipen. Dagiti singasing a naited iti artikulo ket praktikal, makatulong, ken makaipaay iti dagus a bang-ar.

S. F., Italia

Dakes a Kababalin Agyamanak iti tulong a nasarakak iti artikulo a “Pananglapped ti Isusubli ti Dakes a Kababalin” (Abril 8, 1991) iti panangparmek iti pannakaadikto ti TV. Ti kapitulo 36 iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo [nga impablaak ti Watchtower Bible and Tract Society of New York, Inc.] nakatulong iti sumagmamano a tiempo, ngem nagsubliak manen iti kasta unay a panagbuybuya iti TV. Tinulongannak ti artikuloyo a mangsukat iti dakes a kababalin iti nasaysayaat, nga isu, ti panagbasa iti naespirituan a taraon a rumrummuar iti Agriingkayo!

A. G., Estados Unidos

Annak ti Diborsio Naimpusuan nga agyamanak iti serie a “Tulong kadagiti Annak ti Diborsio.” (Abril 22, 1991) Idi agtawenak iti tallo, indiborsio ni tatangko ni nanangko. Nagsayaatan ti panangpadakkel ni nanang iti bassit a kabsatko a babai ken siak iti panagayat ken ni Jehova. Ngem bayat ti kinatin-edyerko, apag-isu ti dineskribiryo. Mariknak nga “amin a relasion ket di mapagtalkan, a dumtengto ti aldaw a panangliput ken di kinamatalek.” Maamakak nga agayat ken maayat, ket uray pay kadagiti pada a Kristiano, sinalimetmetak a narabaw laeng ti pannakilangenko. Ti pannakasursuro a mangaramid kadagiti bambanag a maipaay kadagiti dadduma a tao ken ti panagserbi kas amin-tiempo nga ebanghelisador tinulongannak a mangparmek kadagitoy a pagannayasan iti dadduma a pamay-an. Nupay kasta, ti artikuloyo tinulongannak a makaawat iti dadduma a nasaem a rikrikna iti damdamo unay.

M. H., Japan

Dagiti artikulo impariknana kadakami nga agassawa a nakabasolkami. Nailaksid ti immuna nga asawak iti kongregasion Kristiano gapu iti di kinamatalek. Dagiti annakko a lallaki ken siak nakipagnaedkami kadagiti dadakkelko, agarup 3,200 kilometros ti kaadayona. Bassit laeng ti pannakilangen dagiti annakko a lallaki iti amada. Kalpasan ti pannakiasawak manen, intultuloymi ti panangupay iti aniaman a pannakilangen, ta mariknami a dakes ti impluensia ti ama. Umiso kadi ti pangngeddengmi?

C. W., Estados Unidos

Saan nga ipatingga ti diborsio wenno ti pannakailaksid ti relasion ti nagannak iti anak: agtultuloy a masapul dagiti annak dagiti nagannakda. Nupay kasta, naiduma ti tunggal kasasaad. Ti pisikal a kaadayo wenno di panangikankano ti dati nga asawa mabalin a limitaranna iti kasta unay ti panaglangen ti nagannak-anak. Iti kasumbangirna, dagiti korte mabalin nga iyurnosda ti panangbisita, ket ti Kristiano mabalin nga awan ti pagpilianna no di ti makitinnulong. No awan ti naiyurnos a panagbisita, agpannurayen iti mangay-aywan a nagannak a mangikeddeng no ti pannakilangen iti dati nga asawana ket makaipaay iti nakaro a pisikal wenno naespirituan a peggad.—ED.

Agyamanak iti kinapudno kadagiti artikuloyo maipapan iti diborsio. Nagdiborsio dagiti dadakkelko idi dandanin 20 ti tawenko, ket naglasatak iti tukad a linaisko ti institusion ti panagasawa. Minatmatak dayta a maysa a silo wenno maysa a pagbaludan! Agyamanak kadagiti nalawlawagan-Biblia a liblibro ken magasin, pudno nga inanamaek ti panagasawa iti umay nga aldaw, nga inanamaek ti pudno a pannakaibanagna.

L. T., Estados Unidos

Colosseum Masarakak ti artikulo a “Ti Colosseum—Sentro a ‘Paglinglingayan’ ti Roma idi Ugma” (Abril 8, 1991) a makaay-ayo unay. Kas maysa a historiador, pagarupek a makaawis ti pamay-an a panangilasinyo iti kinapudno manipud iti sarita.

N. H., Estados Unidos