Surat Manipud Maysa a Manangkablaaw

ITAY nabiit maysa a surat ti naawat manipud iti maysa a manangkablaaw iti maysa a pagilian ti Africa a pakaiparitan ti trabaho dagiti Saksi ni Jehova. Ti lalaki insuratna:

“Patgek nga Apo,

“Diakon agpalpalikaw; kayatko laeng nga ipalagip kadakayo a ti gobierno ditoy iparitnan dagiti trabaho ti iglesiayo. Anian ti pannakluksawko!

“Diakon makaaw-awat a regular iti Agriingkayo! Ngem makunak kadakayo, ti Agriingkayo! nalabit isut’ kasayaatan a magasin a naam-ammok pay laeng. Balakadanna dagiti managbasa no kasanot’ panangaywanda iti bagbagida a sibaballigi ken siuumiso, iti legal ken naespirituan. Nakaskasdaaw dayta.

“Siguradoak nga awan ti lecturer iti eskuelaan a kastat’ kaadu ti ammona wenno makasiuro iti kasta a kinadetalye. Nakarkaro pay dagiti ‘pastormi.’ Ket kaskasdi kunaen ti gobiernotayo a dagitoy a magasin ken dagiti umas-asping, a makaisuro unay, ket maiparitda. Apay? Gapu ta dagiti manangipablaak dida agsaludo iti bandera. Nasayaat.

“Ngem maysa a saludsod: No adda agsaludo iti bandera ket kalpasanna dispalkuennat’ pundo ti pagilian, umawat ti pasuksok, di agbayad iti buis, pumatay, ken dadduma pay, mabalin kadi nga isut’ makuna a matalek? Daytat’ ar-aramiden dagiti ‘Kristianotayo.’ Saluduandat’ bandera kadagiti lugar a pagparadaan ket alaenda pay ida kadagiti lugar a pagdaydyawanda tapno saluduanda ida sadiay. Sumagmamano a Kristiano! Ammok, saanak a perpekto wenno uray pay naimbag iti imatang ti Dios. Ngem daytoy saan nga isut’ gagangay a pamay-an.

“Agkedked dagiti Saksiyo iti panaggsaludo iti bandera, iti pannakaiyalison ti dara, iti Krismas ken Easter ken naing-inget pay ti panagkedkedda iti krimen, panangdispalko, panangpasuksok, panangpapatay. Ken agkedkedda iti pannakiabig ken pannakikamalala. No kadagiti bisio, sigurado nga agkedked dagiti Saksi.

“Mangnamnamaak ken ikarkararagko a maawatan ti gobierno ti kasasaad ket ipaayannat’ iglesiayo iti wayawaya a mangisuro.”