Dagiti Ulila nga Afghan nga Agtarigagay a Makakita iti Talon
BAYAT a ti moderno a sosiedad agbalbalin nga ad-adda a moderno, minilion nga ubbing ti di pay nakakitkita iti talon ken dagiti animalna. Pudno unay, dagiti ubbing idiay Afghanistan gagangay a dida makakitkita iti talon iti America. Gapuna panunotenyo ti ragsak ti maysa a bassit a grupo dagita nga ubbing, dagiti ulila, a dinadael ken sinugatan ti gubat, a makasarungkar iti Watchtower Farms, masarakan idiay Wallkill, agarup dua nga oras iti amianan ti New York City babaen ti kotse.
Dagiti Afghan a managipatarus immayda a kadua ti grupo tapno tulonganda ida a makaawat iti amin a trabaho iti daytoy naisalsalumina a pagtalonan-pagimprentaan a pasdek a papaandaren dagiti Saksi ni Jehova ken pagtartrabahuan ti nasurok a sangaribo a boluntario a trabahador, a mangbukel ti pamilia ti Watchtower Farms.
Ti isasarungkar nangrugi iti maysa a pangablaaw a pannangan ti tsa ken cookies, kalpasanna ti grupo immakar tapno kitaen ti nagdakkelan nga uppat-a-kolor a pagimprentaan a mausar a mangpataud kadagiti Watchtower ken Awake! a magasin. Maysa a mangiturturong kinunana: “Iti panagsiddaawko naragsakanda iti kinalaing ken ti kadakkel ti trabaho, nupay ti puspusoda ti naiturong iti panangkita kadagiti animal iti talon.”
Intuloyna: “Kalpasanna, napankami kadagiti baka, a sadiay dagiti ubbing naaddaanda ti gundaway a mangapros ken mangpakan kadagiti animal. Daytat’ maysa nga eksena a bubuyaen—dagiti ubbing nga agtataray tapno mangala ti ad-adu pay a berde a bulbulong tapno pakanen dagiti urbon nga animal. Idiay pagtaraknan ti manok, aminda iniggamanda kadagiti piek. Nakakatkatawa, idi napagsaludsodanda no ania ti paboritoda a taraon iti America, insungbatda, ‘Kentucky fried chicken!’”
Idi dimteng ti pangaldaw, nakiramanda iti pannangan ti innapuy ken manok a kadua ti dakkel a pamilia ti talon idiay kuarto a panganan. Kalpasanna, nagaaribungbong dagiti miembro ti pamilia tapno kablaawan dagitoy agtutubo a naggapu iti adayo a lugar. Nalawag nga inay-ayatda dagiti ubbing.
Iti malem tinagiragsak dagiti ubbing ti immuli kadagiti traktora ken mangtengngel ti manibela. Siempre, kayatda amin ti sumakay iti kabalio, ket di nagbayag naipaay dayta a kalikagum. Ti sumaruno a dakkel a pagraragsakan? Ti ayan ti pangpatay ti uram ti Watchtower Farms, agraman ti dakkel, narangrang a nalabaga a makina a pangpatay ti uram! Anian a kinaragsak! Makitayo kadagiti rupada bayat a nagsisinnublatda a simmakay ken nangpaguni iti sirena. Dagiti ubbing iti sangalubongan gagangay a pagay-ayatda dagiti isu met la a bambanag—ti kolor ken ariwawa!
Idi napagsaludsodanda maipapan iti reaksionda iti isasarungkar, ni Ahmad, maysa a natataengan nga ubing, kinunana: “Tinagiragsakko dagiti pagimprentaan, ti panagkararag sakbay ken kalpasan ti pannangan—ken ti isuamin a banag nga adda idiay kapeteria!” Aminda pagay-ayatda dagiti animal ken ti panagsakay iti kabalio.
Daytoy ababa a kapadasan iyilustrarna a ti asi, kadagiti ulila ken iti asinoman, agserbi kas nasayaat a rekomendasion ti Nakristianuan a pammati ken ti naayat a Dios, ni Jehova. Kas kunaen ti Biblia: “Ti porma ti panagdaydayaw a nadalus ken awan tulawna iti imatang ti Dios ken Ama isu daytoy: aywanan dagiti ulila ken balo bayat iti rigatda, ken ti panagtalinaed nga awan tulawna iti lubong.” (Santiago 1:27)—Naipatulod.