Umakar a Tumatayab Agannad: Liklikan ti Europa!
“MAPNEK iti kasta unay, indasar a sipapannakkel ti waiter ti kangrunaan a taraon. Iti plato, kaabay ti agas-asuk a nilugaw a mais, tallo a babassit, nakset a sippit ti nakatudo iti kostumer. Ti naituno a bagi dagiti tumatayab ket nadutdutan ngem di naibagisan. Ti nakset a payakda ken nakuttong a saksakada pumada iti paset ti bagi ti insekto. Sumilsilengda gapu iti nabanglo a lana ti olibo.”
Kastat’ rugi ti maysa nga artikulo ti The Wall Street Journal, idi napalabas a tawen. Maysa daytoy a nangina, pangrambak a taraon a maidasdasar iti maysa a restauran idiay Italia. Kaaduanna a sibubukel nga isakmol ti kostumer dagiti tumatayab, karemkemenna dagiti tulang ken aminen. Itatta laeng a gundaway a di mapasamak a kasta. Imbes ketdi, ti kostumer, ni Piergiorgio Candela, maysa nga opisial ti kagimongan dagiti manangsalaknib kadagiti tumatayab idiay Italia, ti nangtudok kadagiti tallo a bangkay, padpadasenna nga ilasin ti kakikitada. Ti konklusionna: “Dagitoy a tumatayab ket illegal.” Iti kasta a panangsukisok, naduktalanna ti 1,400 a nadutdutan a tumatayab idiay kusina.
Ituloy ti artikulo: “Ti sumagmamano a kita ti mapapatay ket mailako a legal; ngem kaaduanna saan. Uray aniat’ mapasamak. Tinawen, 50 milion a nasalakniban a babassit a tumatayab ken kumakanta a tumatayab ti nagpatingga kadagiti panganan dagiti Italiano. . . . No magupgop, ti pananganup ken panangsilo patayenna ti agarup 15% kadagiti umakar a tumatayab idiay lugar ti Mediteraneo. Idiay España, dagiti mannalon ti Catalonia ti mangipulagid iti piket kadagiti babassit a sanga ti kayo tapno maipagket dagiti tumatayab, sakbay a pidutenda. Iti asideg ti Bergamo, idiay Italia, allilawen dagiti manangsilo dagiti kumakanta a tumatayab tapno aramidenda ida a nasam-it panagkantana a taraken iti pagtaengan. Ken idiay Malta, 10% kadagiti 300,000 nga umili ti addaan iti tinawen nga aglablabes a panangpaltog, panangipupok ken panangaramid a naseksekan nga animal kadagiti uppat a milion nga atap a tumatayab.”
Dagitoy umakar a kumakanta a tumatayab dida unay agkankantan kadagitoy nga aldaw. Iti dadduma a lugar dandani di payen mangngegan ti nasinggit a panagunida.
[Picture Credit Line iti panid 31]
Ladawan ni G. C. Kelley