Pananglapped iti Uram iti Pagtaengan

SIGUN iti estoria, ti baka ni Mrs. Patrick O’Leary nakugtaranna ti lampara a de gas iti kamarin ket rinugianna ti dakkel nga uram idiay Chicago idi 1871. Ti gatad ti nadadael a sanikua ken biag ket nakangatngato. Sigun iti maysa a gubuayan, ti uram imbatina ti 100,000 nga awan ti pagtaenganna, dinadadaelna ti nasurok a 17,400 a patpatakder, ken pinatayna ti 250 a tattao.

Itatta, 120 a tawenen kamaudiananna, dagiti moderno a pangiddep iti uram nakatulongen a manglapped iti adu nga uram. Nupay kasta, agtultuloy a mangipaay ti peggad dagiti uram iti balay. Ti NFPA (National Fire Protection Association) kunaenna nga idiay Estados Unidos, dandani lima ribo a tattao ti natay iti uram iti balay iti maysa a tawen. Kas nairekord iti The Vancouver Sun, ti NFPA nangted iti sumagmamano a simple a pangripiripan a manglapped iti pannakairugi ti uram iti balay. Dagitoy, ti kababagasna:

◻ Dikay ipalubos ti panagsigarilio iti balay. Dagiti aksidente a pakairamanan dagiti di naannad a mannigarilio agtultuloy nga isut’ kangrunaan a makagapu iti ipapatay manipud kadagiti uran iti pagtaengan

◻ Dikay baybay-an dagiti maaw-awit a pagpapudot iti angin iti nakulong a lugar nga agan-andar a di masipsiputan wenno bayat a maturogkayo

◻ Dikay labsan ti electrical circuit wenno mangusar iti nakapuy a kordon ti koriente. Agusar laeng kadagiti umiso ti kadakkelna a fuse ti koriente.

◻ Salimetmetan a nadalus dagiti hurno ken simburio. Sukimaten ida a tinawen.

◻ Sukimaten dagiti pagilasin iti asuk a kankanayon, ket sukatan dagiti bateriada a tinawen. Siguraduenyo a mabigbig ti pamilia ti timek ti pagilasin iti asuk.

◻ Sukimaten nga amin nga adda iti pamilia ammoda ti pagnaan nga aglisi no adda uram, ket taginayonen nga awan lapped ti pagruaran.