Kinasaririt ti Bakes

Idiay Sierra Leone, Makinlaud nga Africa, adda maysa a pagsasao: “Saan laeng nga ibaga ti bakes iti urbonna, “Kumpetka a naimbag kaniak!’ Kunaenna pay, ‘Kumitaka iti baba.’”

Daytoy ipalagipna ti ladawan ti maysa nga urbon a bakes nga adda a nakangatngato iti kaykayo, a nakakapet iti bukot ni inana. Ti panggep ti pagsasao ket no ti Ina basta ibagana laeng a kumpet, ti anakna mabalin a kumpet iti sumagmamano a kanito, ngem gaput’ dina ammo ti panggep ti bilinna, mabalin a malipatannanton ket lumukay ti panangpetpetna.

Nupay kasta, no ti urbon kumita iti baba, makitana no kasano ti kangatona manipud iti daga ket ad-adda a maipaganetget kenkuana a nairaman ti biagna. Kas pangarigan, mabalin a madangran wenno matay pay! Gaput’ naawatanna a naimbag, isut’ addaan nabileg a pakatignayan a kumpet a siiirut. Itan aniaman a mainayon a balakad wenno bilin ad-addan a maraem.

Anian a nagsayaatan a prinsipio iti panangisuro kadagiti dadduma, nangnangruna kadagiti ubbing. Ti praktikal a leksion iti estoria ket imbes a basta mangipaay kadagiti bilin, napateg ti mangipaay iti pannakaawat.

Siempre, no dadduma mabalin nga awan ti umdas a tiempo a mangaramid iti dayta iti damo. Kas pangarigan, no ti anakyo, a di siaannad a kimmita, bumallasiwen iti kalsada nga adut’ lumaslasat a lugan, mabalin a bilinen a sumardeng ket agsubli a dagus. Ti panangibilin ditoy ket napateg. Ngem ti panangilawlawag iti peggad nga ayan ti ubing mangipaay iti pannakaawat.

Ti gunggona itoy nga addang—saan laeng a mangipaay iti bilin no di ket mangipaay iti pannakaawat—ket masarakan iti proverbio ti Biblia: “Ti mangsalimetmet iti linteg anak a mannakaawat.”—Proverbio 28:7.

[Picture Credit Line iti panid 31]

© Zoological Society of San Diego