Inton Maimbaganen Dagiti Dati a Sugsugatda

NI AGTUTUBO nga Adeline Nako, a nadakamat iti pangrugian daytoy a serie, nakapataud iti nakaro a pananggura iti pagilian dagiti inapona, ti Japan. No dadduma nga ubbing awaganda dagiti Hapones-Hawaiino a “Hapon,” isut’ sumungbat, “Americano kami.” Isut’ nangpinta kadagiti poster nga agkunkuna, “Pukawenyo dagidiay Pannakabalin nga Axis” ket idadauluanna ti kampania iti pananggatang kadagiti selio a mangurnong iti pundo maipaay iti gubat. Kinuna ni Adeline: “Pagtangsitko ti maika-100 ken maika-442 a batalion a buklen iti nisei, wenno maikadua-kaputotan a Hapones-Americano, a situtured a nakilaban maipaay iti America.”

Nupay kasta, bayat a dumakdakkel, isut’ nangrugi a nagpanunot: ‘Apay nga agpipinnatay dagiti tattao?’ Dakes nga interamente dayta. ‘Makigubat dagiti Budista. Makigubat dagiti Kristiano. Managinsisingpetda amin,’ pinanunotna. Gapu ta narugiannan ti panagadal ti Biblia babaen iti tulong dagiti Saksi ni Jehova, kinaritna ti Saksi a mannursurona babaen iti saludsod a, “Dakayo a Saksi ni Jehova makigubgubatkayo aya?”

Naibaga kenkuana a dida mangitag-ay iti armas tapno patayenda ti asinoman a tao. Iti dayta a tiempo madama pay laeng ti gubat idiay Europa agraman idiay Asia. Naammuan ni Adeline a dagiti Saksi idiay Alemania maibabaonda kadagiti kampo konsentrasion ket dagidiay adda idiay Estados Unidos maibalbaludda gaput’ dida panangitag-ay iti armas iti gubat. ‘Daytoy ngarud ti pudno a relihion,’ pinanunotna.

Natalna a Mision

Bayat ti irarang-ay ti pannakaammona iti Biblia, isut’ natignay a mangidedikar iti biagna ken ni Jehova, ti Dios iti Biblia. Ti kinapasnekna “iti Dios iti kappia” ti nangtignay kenkuana a mangpalawa iti ayatna babaen ti panangsurotna kadagiti addang dagiti lima a Hapones-Hawaiiano a nagboluntario a mapan idiay Japan di nagbayag kalpasan ti Gubat Sangalubongan II. (Filipos 4:9) Magagaranda a tumulong kadagiti tao iti daga dagiti inapoda, dagiti dati a kabusorda, babaen ti panangikasaba kas misionero iti makaliwliwa a naimbag a damag iti Pagarian manipud iti Biblia.—Mateo 24:14.

Ti maysa a nagboluntario a tumulong iti dinadael ti gubat a daga iti Japan, ni Shinichi, nalagipna no kasano ti riknana maipapan itoy a mision. “Pinampanunotko ti kinamatalek dagiti tao a Hapones no maipapan iti panagserbi kadagiti natauan nga appo ken ti emperador,” kunana. “Pinampanunotko dagiti piloto ti kamikaze, a nangipaay iti biagda iti emperador babaen iti panangipatayab kadagiti eroplanoda a sumaranget kadagiti barko de guerra ti kabusor. No kasta ti kinamatalek dagiti Hapones kadagiti tao, pinanunotko, anianto ti aramidenda no masarakanda ti pudno nga Apo, ni Jehova?”

Babaen kadagita a positibo a panangmatmat, idi 1949 dagitoy a boluntario simrekda idiay Tokyo, a di pay nabayag a rinebbek ti B-29 babaen iti panangraut iti tangatang. Aniat’ nasarakanda kadagiti kalapaw iti tengnga dagiti rebbek? Dagiti managbabain a tattao a nagaget a trabahador. Siempre, addada dagiti tao a makarurod pay laeng ken mangidumduma. Adu, nupay kasta, ti nasayaat ti isusungbatna iti mensahe ti Biblia a kappia.

Idi 1953, nakikadua ni Adeline kadagidiay immuna a misionero. Sigagagar a tinulonganna dagidiay a mabisbisin ken mawaw iti makaliwliwa a mensahe a masarakan idiay Biblia. Pudno a nakasarak kadagiti tattao a bumusor iti trabahona a panangasaba. Ibagada kenkuana: “Dakayo a tattao ti nangitinnag iti bomba atomika idiay Hiroshima ken Nagasaki!”

“Bueno,” isut’ sumungbat, “ammoyo a naggapuak idiay Hawaii. Ket ti Japan ti immuna a nangraut iti Pearl Harbor ket pinatayna dagiti adu a tattao sadiay. Ngem daytat’ di nanglapped kaniak nga umay ditoy Japan tapno ibaga daytoy naimbag a damag kadagiti tattao ditoy.” Gagangay a daytat’ mangpakalma kadakuada, ket umawatda kadagiti literatura a mangilawlawag iti Biblia.

Babaen iti tulong ti nagsayaatan a pamuon nga impasdek dagidiay immuna a misioneros manipud Hawaii ken kadagiti dadduma a pagilian, ita nasuroken a 150,000 a Hapones ti paset iti maysa a panagkakabsat dagidiay a saanen a “mangsursuro iti gubat.”—Isaias 2:4; 1 Pedro 2:17.

No Kasano nga Agpatingga ti Amin a Gubat

Kinapudnona, ti panangammo iti maysa ken maysa ken ti panangsukay iti awan-agumna nga ayat iti maysa ken maysa ket nasken unay iti sangalubongan a talna. Nupay kasta, saan nga umdas dayta. Dagiti tao a managayat iti talna ken addaan kadagiti gagayyem iti sabali a benneg natignayda met a makipaset iti gubat Pacifico iti sidong ti panangpilit dagiti “nainkalintegan” a makagapu. Dagiti propaganda ti nasion ti nangringbaw kadagiti gagangay a pagannayasanda. Nupay agkedked dagiti dadduma a makigubat ket agpeggadda pay iti pannakaibaon kadagiti kampo konsentrasion wenno pagbaludan, ti tignayda, nupay mapadayawan, bassit laeng ti maaramidanna, no adda man, iti pananglapped iti kasta unay a panagregget a makigubat.

No maiturong ti intero a nasion a makigubat, saan laeng a dagiti tao ti mangiturturong iti dayta. Gagangay nga amin a nairaman ipapilitda a tarigagayanda a lapdan ti gubat. Kaskasdi, adda nakabilbileg a puersa a mangimpluensia kadakuada a maibusor iti pagayatanda. Ilasin ti Biblia dayta a nabileg a puersa a kas “ti dios daytoy a sistema dagiti bambanag.” (2 Corinto 4:4) Kinapudnona, “ti isuamin a lubong adda iti babaen ti dakes,” ni Satanas a Diablo.—1 Juan 5:19; kitaenyo met ti Juan 12:31; 14:30.

Nupay kasta, ikari ti Biblia a “ti Dios ti kappia dunorennanto iti mabiit ni Satanas.” (Roma 16:20) Ti nangrugian daytoy a panangdunor napasamak idiay langit 77 a tawenen a napalabas. Imdenganyo ti panangiladawan iti nakita ni apostol Juan iti nakaay-ayat a sirmata 18 a siglo sakbay ti kaitungpalanna idi 1914: “Ket adda gubat sadi langit . . . Ket naigarangugong daydi dakkel a dragon, daydi uleg a kadaanan nga isu ti managan ti Diablo ken Satanas, isu a mangallilaw iti isuamin a lubong; naitapuak ditoy daga, ket dagidi angelna naitapuakda a naikanunong kenkuana.”—Apocalipsis 12:7-9.

Nanipud idin ni Satanas a Diablo addan iti kaparanget ti daga. Babaen iti panangimaniobra kadagiti politiko ken militarista a kas alikamenna, isut’ nakaipaayen kadagiti awan sardayna a panagsagaba iti gubgubat daytoy a siglo. Nupay kasta, ti pannakarurodna iparangarangna laeng ti dakkel a pungtotna, “ta ammona a bassiten ti tiempona.” (Apocalipsis 12:12) Babaen iti nabileg nga im-ima ti “Prinsipe ti Kappia,” ni Jesu-Kristo, pagbalinento ti Dios nga awan gaway ni Satanas kalpasan “ti gubat iti dakkel nga aldaw ti Dios a Mannakabalin-amin” idiay “Har–Magedon.”—Isaias 9:6; Apocalipsis 16:14, 16.

Saan a kas kadagiti gubgubat a pakidangadangan dagiti tao, ti pagalagadan iti kinahustisia a nasaknapto iti dayta umay a gubat ti Dios ket naan-anay. Daytat’ pagalagadan iti Namarsua iti sangatauan, isu a mangpampanunot iti kasayaatan a pagimbagan ti sangatauan. Saan a kas kadagiti napolitikaan a papangulo a mangpilit kadagiti taoda a makigubat, ni Jehova, ti Namarsuatayo, ibagananto iti ilina ti kas iti imbagana iti nasion ti Israel idi kaaldawan ni Josafat iti Juda idi maikasangapulo a siglo K.K.P.: “Saanyonto a masapul ti gumubat itoy a bakal. Aguurnongkayo, agtakderkayo a sitatalna, ket kitaenyo ti panangisalakan ni Jehova kadakayo.”—2 Cronicas 20:17.

Inton mapukawen ti nasipnget nga impluensia ni Satanas, tagiragsakenton dagiti indibidual ti pudno a talna ken talged iti isuamin a daga. Iti kasta dagiti sumaruno a kasasaad nga impadto ni Isaias pumaysonton. “Adtoy, mamarsuaak kadagiti baro a langlangit ken ti maysa a baro a daga. Dagiti immuna a bambanag didanto malagipen wenno didanto mapanunoten.”—Isaias 65:17, The New English Bible.

Ngarud, ti napasamak idiay Pearl Harbor dinto malagipen iti nakalkaldaang a pamay-an, ket saanton nga umkis dagiti biktima iti panangbomba iti Hiroshima ken Nagasaki iti “Awanton dagiti Hiroshimas!” Apay? Agsipud ta dagiti sumaganad a sasao iti padto ni Isaias pumaysonton iti tunggal tao ditoy daga: “Isu [ti Dios] pagokomannanto dagiti nasnasion, ket kedngannanto ti maipapan kadagiti adu nga inilin-ili. Ket pandayendanto dagiti kampilanda a pagbalinen a dingding ti arado, ket dagiti pikpikada pandayendanto a komkompay. Ti maysa a nasion saannanto nga itag-ay ti kampilan a maibusor iti nasion, ket didanto adalenen ti pannakigubat uray kaano.”—Isaias 2:4.

Ti kaitungpalan dagitoy a padpadto matungtungpalen iti ummong dagiti Saksi ni Jehova, nga itan mangbukel iti sangalubongan a panagkakabsat a minilion ti bilangda. Daytoy maiparangarang a nangnangruna iti internasional a kumbension dagiti Saksi ni Jehova a naaramid kadagiti nadumaduma a paspaset iti lubong. Mabalinyo met ti agbalin a paset dayta nga internasional a panagkaykaysa ken talna. Umaykayo ket ammuenyo no kasano ti agbalin a maysa kadagiti tattao a ‘nangpitpiten kadagiti kampilanda a pinagbalin a dingding ti arado ken dagiti pikpikada a komkompay,’ isu a saanen a “mangsursuro iti pannakigubat uray kaano,” ken isu a mangin-inanama iti maysa a paraiso a mabiiten nga umay iti daga, a sadiay awanton a pulos dagiti mapasamak a gubgubat.—Salmo 46:8, 9.

[Ladawan iti panid 9]

Ni Jerry ken Yoshi Toma, Shinichi ken Masako Tohara, ken Elsie Tanigawa nagboluntarioda a tumulong kadagiti dati a kabusorda

[Ladawan iti panid 10]

Itatta maysa nga internasional a panagkakabsat ti agdaydayaw iti Dios nga addaan panagkaykaysa ken kappia