Agimtuod Dagiti Agtutubo . . .

No Ngay Di Saranayen Dagiti Dadakkelko ti Pammatik?

ADU a Kristiano nga agtutubo ti addaan di mamati a nagannak. “Sisiak laeng ti agad-adal iti Biblia iti pamiliak,” kuna ti maysa a 12-años nga ubing a babai. “Ket kayat ni nanang nga isardengko ti agadal.” Dadduma addaanda kadagiti dadakkel a di mangidadaulo iti naespirituan. Mabalin a pudno a pakasuotan dagitoy a sirkumstansia iti maysa a napasnek nga agtutubo a tarigagayannat’ agserbi iti Dios.

Narigat ti panagbalin a maysa a pudno a Kristiano no awan saranay ken pammaregta dagiti nagannak. Ngem makapagballigikayo! Daytat’ paneknekan ti adu nga ehemplo, agpadpada idi napalabas ken iti agdama.

Matalek nga Agtutubo idi Tiempo ti Biblia

Panunotenyo ni Abel, anak ti immuna a natauan a pagassawaan, da Adan ken Eva. Naipaayan koma da Adan ken Eva dagiti annakda iti naan-anay a naespirituan a pammakired. Ngem immalsa ken timmallikudda ken Jehova, a binaybay-anda dagiti annakda nga aywananda a mismo ti bagbagida iti naespirituan. Imbes a kaasianna ti bagina wenno ipalubosna ti kinakurang ti espiritualidad dagiti dadakkelna a lapdan ti bukodna a panangipateg kadagiti sagrado a bambanag, awan duadua nga inaramid ni Abel amin a kabaelanna a nangsursuro maipapan iti Namarsua. Nakikomunikar ni Jehova kadagiti annak a lallaki ni Adan, da Cain ken Abel, ket napatanor ni Abel ti pannakirelasion iti Dios ket dimmakkel kas matalek a lalaki. “Gapu iti pammati ni Abel indiayana iti Dios ti maysa a daton a nasaysayaat ngem ni Cain, ket gapu iti daytoy a pammati naited kenkuana ti pammaneknek nga isu nalinteg.”—Hebreo 11:4; Genesis 4:2-15.

Ni Josias ket sabali pay nga ehemplo ti maysa nga agtutubo nga awanan naespirituan a badang manipud kadagiti dadakkelna. Napapatay ti tatangna, ni Ari Amon iti Judah, idi agtawen ni Josias iti walo. Idi sibibiag pay, ni Amon “inaramidna daydi dakes iti imatang ni Jehova, a kas iti inaramid ni Manasses nga amana; ket ni Amon nagidaton kadagiti amin a kinitikitan a ladladawan nga inaramid idi ni Manasses nga amana, ket nagserbi kadakuada. . . . Daytoy met laeng nga Amon nagsalungasing ket umad-adda nga umad-adda.” (2 Cronicas 33:22, 23) Panunotenyo, ngarud, ti makapaupay a naespirituan a kasasaad a dimmakkelan ni Josias nga anak ni Amon.

Kaskasdi, ni Josias “inaramidna daydi a nalinteg iti imatang ni Jehova, ket nagna kadagiti dalan ni David nga inapona . . . Isu nangrugi nga agsapul iti Dios ni David nga inapona; ket iti maika-12 a tawen [idi agarup agtawen iti 20] isu nangrugi a nanggugor iti Juda ken Jerusalem kadagiti nangato a disso, ken kadagiti ashera, ken kadagiti kinitikitan a ladladawan, ken kadagiti sinukog a ladladawan.”—2 Cronicas 34:2-4.

Kasano a pinatanor ni Josias ti kasta a kired nga awan tulong ni amana? Nagun-odanna ti pammakired manipud kadagiti dadduma a naespirituan a lallaki, kas ti nangato a padi a ni Helcias ken ti eskribientena a ni Safan. Ti positibo a naespirituan nga impluensiada ken agtutubo a Josias isut’ nangtulong kenkuana a “mangipatungpal kadagiti sasao ti linteg.” (2 Ar-ari 23:24; 2 Cronicas 34:14-19) Ipaalagad ti Linteg kadagiti ar-ari a mangaramidda ti personal a kopia daytoy ket adalenda iti aldaw ken rabii. (Deuteronomio 17:18; Josue 1:8) Ti panangaramid iti kasta awan duadua nagdakkelan naitulongna iti naespirituan a panagdakkel ni Josias.

Pananggun-od iti Pammakired Itatta

Mabalinyo met ti dumakkel iti naespirituan, uray no awan maaw-awatyo a badang a tartarigagayanyo manipud kadagiti dadakkelyo. Masansan a magun-odan ti pammakired manipud kadagiti naespirituan a kakabsat a lallaki ken babbai ken inna ken amma iti uneg ti kongregasion dagiti Saksi ni Jehova. (Marcos 10:30) Nalabit adda sumagmamano a naespirituan-panagpampanunotna, nga agtutubo iti kongregasion a mabalinyo a gayyemen. Wenno nalabit adda sumagmamano a natataenganen a Saksi a mangipakita iti pannakaseknan kadakayo. Kas pangarigan, maysa nga awan amana nga agtutubo nga agnagan Jerry ti inawis ti maysa a panglakayen ti kongregasion a kumuyog iti maysa a panagadal iti Biblia iti pagtaengan. Kalpasan ti panagadal, masansan a mapanda mangan iti karinderia ken agsarita. “Isut’ nagbalin a kas amak,” kinuna ni Jerry. Itatta addan asawa ni Jerry ken agserserbi kas maysa a ministerial nga adipen. Isut’ agyaman unay iti pammakired nga impaay ti panglakayen kenkuana.

Adda kadin nataengan a nangidiaya a tumulong kadakayo iti sumagmamano a pamay-an? No kasta apay dikay agtignay a sipopositibo? Ket no awan pay nangaramid iti kasta a diaya, pagreggetanyo a sukayan ti nasalun-at a pannakirelasion. Mabalin a padasenyo pay nga asitgan ti maysa kadagiti manangaywan iti kongregasion iti lugaryo. Nalabit a kasapulanyo ti maysa a mangyadal ti Biblia kadakayo iti pagtaengan wenno tumulong kadakayo a mangisagana kadagiti paspaset iti Teokratiko nga Eskuelaan ti Panagministro.a Wenno mabalin a kasapulanyo laeng ti nasayaat a panaglalangen ti pamilia. Kaawatan, mabalin a mabainkayo a mangipanayag kadagiti kasapulanyo iti kastoy a pamay-an. Ngem laglagipenyo, nadutokan dagiti panglakayen iti kongregasion tapno aywananda dagiti naespirituan a kasapulan ti tunggal maysa iti kongregasion—agraman dagiti agtutubo. (1 Pedro 5:2) Pudno a makatulongda.

Panangsukay ti Pammakired iti Pagtaengan

Kayat kadi a sawen daytoy nga awan pulos maaramidanyo tapno rumang-ay ti kasasaad iti pagtaenganyo? Saan. Alaenyo ni agtutubo a Joe, kas ehemplo. Kinunana a “bassit laeng” ti naespirituan a pammakired nga ipapaay kenkuana dagiti di mamati a dadakkelna. Kaskasdi, aminen ni Joe a mabalin nga adda met pasetna iti kinakurang ti pammakiredda. Kasano a kasta? Bueno, idi immuna a nakiadal ni Joe kadagiti Saksi ni Jehova, kasla dina ipaspasnek ti panangipakat iti maad-adalna iti mismo a panagbiagna. Gapuna agtultuloy ti kinasubegna kadagiti dadakkelna. Siempre, saanda a magutugot nga agadal iti Biblia a mismo, siranto la ketdin ti panangparegtada kenkuana nga agadal iti Biblia.

Dakayo ngay? No di mamati dagiti nagannakyo, ti tigtignayyo kadi mangted rason kadakuada a mamati a napasnekkay iti tarigagayyo nga agserbi iti Dios? Naibaga kadagiti Kristiano nga assawa a babbai a maguyugoyda dagiti di mamati a lallakayda babaen ti nasayaat a kababalinda. Dagiti dadakkelyo mabalin met kadi a “mapatulnogda nga awan ti sao” no ad-adda a natulnogkayo ken nadayaw kadakuada? (1 Pedro 3:1; Efeso 6:1-3) No kasta, saan kadi a mabalin a badangandakayto?

Ania ngay, nupay kasta, no Kristiano dagiti nagannakyo ngem dida met tungtungpalen amin a pagrebbenganda a tumulong ken mangparegta kadakayo? Aniaman ti rasonda, adut’ maaramidanyo a mangpasayaat iti naespirituan a kasasaad iti pagtaenganyo babaen ti panangipaayyo iti nasayaat nga ulidan. (1 Timoteo 4:12) No tiempon ti itatabuno kadagiti Nakristianuan a gimgimong, agsukat ken agrubbuatkayon. Agboluntariokayo a mangaramid kadagiti dadduma pay a trabaho ti pamlia tapno makapagsagana metten dagiti dadakkelyo. Asinot’ makaammo? Nalabit a ti kinapasnekyo a makigimong guyugoyenna ida.

Mangikonkondukta kadi dagiti nagannakyo iti linawas a panagadal iti Biblia kadakayo iti pagtaengan? No saan, apay dikay kiddawen nga aramidenda dayta iti naasi a pamay-an, a saankay a mangrengreng wenno agdayengdeng. No madama ti adal, dikay parigaten ida a manggun-od iti komentoyo; agsaganakayo a naan-anay tapno makapasetkayo. Aramidenyo ti pasetyo a mamagbalin iti dayta a naragsak nga okasion. Pagyamananyo ida gapu ta naaddaankayo ti panagadal. Nalabit a daytat’ mangparegta kadagiti dadakkelyo a mangangay iti panagadal a regular.

No ngay saanda unay a matignay iti panagreggetyo? Dikay sumuko. (Galacia 6:9) Sipapanayag nga iyebkasyo ti panagayatyo iti Dios ken iti kinapudno ti Biblia. Dikay pukawen ti kinaregtayo wenno kinaganatyo iti panangtulong kadagiti dadduma nga agsursuro maipapan iti Dios. Itultuloyyo ti ‘rumang-ay iti nasantuan unay a pammatiyo, nga agkarkararagkayo iti nasantuan nga espiritu.’ (Judas 20) Kastat’ ar-aramiden ti maysa nga agtutubo nga agnagan Laverne. “Inkeddengko a diak ipalubos a ni tatangko ti manglapped iti panagadalko iti kinapudno,” kinunana. “Gapuna ad-adalek a bukod ti Ti Pagwanawanan imbes nga agbuyaak iti TV.b Basbasaek met ti teksto ti Biblia tunggal agsapa. Makapanak met mangasaba babaen ti pannakikuyogko kadagiti dadduma a Kristiano a kakabsat a lallaki ken babbai.”

Ipakitayo ti umasping a determinasion. Dikay ipalubos ti kinakurang ti pammakired idiay pagtaenganyo nga upayennakayo. Patibkerenyo ti pammatiyo. No mabalin, agbalinkayo a nasinged kadagiti naespirituan-panagpampanunotna a kapatadayo ken kadagiti natataenganen iti kongregasion. Ngem adda man wenno awan ti pammakired, ikeddengyo a salimetmetan ti pannakigayyemyo iti Dios. Makapagtalekkayo kenkuana maipaay iti pammakired.—Idilig ti Salmo 119:16.

[Dagiti Footnote]

[Ladawan iti panid 19]

Mabalindakay a badangan dagiti natataenganen a miembro ti kongregasion babaen ti pannakaseknanda kadakayo