Manipud Managbasatayo

Tulong Agpaay kadagiti Dandanin Matay Agyamanak kadagiti serie dagiti artikulo maipapan iti “Tulong Agpaay kadagiti Dandanin Matay.” (Oktubre 22, 1991) Simmangpet iti apag-isu a tiempo. Maysaak a nars, ket inaldaw a tamtamingek dagiti dandanin matay a pasiente. Kas maysa a Kristiano, pampanunotek no nasken a lapdan ti ipapatay babaen iti isuamin a pamay-an a mabalin nga aramiden. Dagiti artikulo tinulongandak a makaawat iti panangmatmat ti Dios iti banag.

C. C., Italia

Ni nanangko addaan kanser. Idi imbaga ti doktor kaniak, ‘Naladaw unayen ti panangtulong kenkuana ita,’ naglidayak iti kasta unay ket pinanunotko ti agbekkel! Ngem maysa kadagiti Saksi ni Jehova ti nangparegta kaniak a mangituloy iti panagadalko iti Biblia. Nakagun-odak met iti maysa a kopia kadagiti artikulo maipapan iti “Tulong Agpaay kadagiti Dandanin Matay.” Itan pudno a maawatakon ti kasuratan nga agkuna, a ‘saan a gapu ta inayattayo ti Dios no di ket gapu ta inayatnatayo.’ (1 Juan 4:10) Itan ikagumaakon ti agbalin a maysa nga adipen ni Jehova.

S. M., Japan

Wara Napalaus a panagyamanko iti nagpintasan nga artikulo a “No Di Matengngel dagiti Wara.” (Agosto 8, 1991) Bayat ti 12 a tawen a panagasawak, nakidangadangak iti nakapuspusek, napnapno a kloset a di masarakan dagiti biruken! (Pagay-ayatko ti aguronong kadagiti bambanag.) Kalpasan ti panangbasak iti artikuloyo, nakaurnongak kadagiti nabunton nga ibabasura a bag. Maragsakan kaniak ti nadalusan a klosetko a mammano a mapasamak idi. Ipuestokto ti artikulo a makitkita iti klosetko tapno malapdan ti panagbalinna manen a nagulo!

L. W., Netherlands

Ni nanangko, ti kabsatko a babai, ken siak intultuloymi ti kampania ti panangikkat iti wara. Sinukimatmi dagiti kawkawesmi ket impadawatmi ti nagad-adu a kawkawes. Naimpusuan ti panagyamanko iti artikulo.

Z. M., Jamaica

Kumpirma Agyamanak iti artikulo a “Ti Panangmatmat iti Biblia . . . Kumpirma—Kasapulan Aya ti Kristiano?” (Agosto 8, 1991) Narugiakon ti agadal iti Kasuratan iti nabiit pay, ngem adda pay laeng salsaludsodko maipapan iti buniag. Adda anakko a babai a dua a bulan, ket babaen iti tulong dayta nga artikulo, maawatakon kamaudiananna nga awan ti anamong ti Kasuratan iti panangbuniag iti ubing.

J. M. S., Brazil

Pagpaagneb Palubosandak nga agkomento maipapan iti damag a “Parparikut kadagiti Pagpaagneb” a nagparang iti “Panangmatmat iti Lubong.” (Setiembre 22, 1991) Nakalkaldaang ta diyo imbaga a dagitoy a saksakit ket iyakar laeng dagiti pagpaagneb a mangus-usar kadagiti sagatan.

S. G., Alemania

Dagiti “demineralizing filters” pudno a pabassitenda dagiti peggad iti panangmulit iti angin kadagiti babassit a partikulo iti mineral, kas iti aluminum, buli, wenno asbestos. Uray pay no kasta, irekomendar dagiti eksperto a masapul a masukatan a kanyon dagiti filter ket ti makina a mismo ti naynay a madalusan a naan-anay.—ED.

“Estrogen Replacement Agyamanak iti artikulo nga “Estrogen Replacement Therapy—Agpaay Aya Kadakayo?” (Setiembre 22, 1991) Simmangpet iti umiso a tiempo. Insingasing ti doktorko a maagasanak iti estrogen. Anian a ragsakko a makabasa a detaliado maipapan itoy a tema iti sumaganad nga aldaw.

M. R. S., Estados Unidos

Iti napalabas a dua a tawen, naaddaanak iti nakaro a hot flashes (panagbara ti bagi) ken dadduma pay a sintomas. Inresitaannak ti doktorko kadagiti agas ngem adda nakaro a dakes nga epektona, kas kadagiti sakit ti ulo. Pinadasko ti nagsirarak ket kamaudiananna inkeddengkon ti agsurat kadakayo ken nangisingasing ti maysa nga artikulo maipapan itoy a tema. Iti sumaganad a lawas, inukagko ti Agriingkayo!, ket adda sadiay ti maysa a nalawag ken maawatan a panangilawlawag iti estrogen replacement therapy. Siguradoak a ti artikulo tulongannanto dagiti adu a babbai.

B. S., Estados Unidos