Manipud Managbasatayo

Annak ti Diborsio Tallo a tawenen a nagsinakami ken baketko, ket mailiwak unay iti anakko. Ngem dagiti annak ti agsagaba, ket dakami a nagannak ti rumbeng nga agpanunot a naimbag maipapan iti daytoy. No nabasak koman ti serie a “Tulong Agpaay kadagiti Annak ti Diborsio” (Abril 22, 1991) idi agdinnakami pay, sigurado a pinanunotko koma a naimbag ti maipapan iti panagsina.

S. C. M. F., Brazil

Barrier Reef Idiay eskuelaan natudinganak a mangsirarak maipapan kadagiti korales. Nupay kasta, diak ammo no sadinot’ pangalaak iti detaliado ken ababa nga impormasion. Nasdaawak iti kasta unay iti pannakakitak iti artikulo nga “Ibibisita iti Great Barrier Reef.” (Hunio 8, 1991) Naaddaanak iti apag-isu a kasapulak! Inusarko dayta nga impormasion ket nagun-odak ti kangatuan a grado. Agyamanak unay iti nakapatpateg a tulongyo.

M. M. T., Argentina

Panangtaripato ti Pamilia Ti artikulo a “Panangtaripato ti Pamilia iti Sangalubongan—Panangpadakkel a Buyogen ti Ayat, Disiplina, Ulidan, ken Naespirituan a Pagalagadan” (Setiembre 22, 1991) ket dakkel a pammaregta kaniak kas baro nga estudiante iti Biblia. Idi rinugianmi ti timmabuno kadagiti Nakristianuan a gimgimong, agtignay ken agsangit ti barok a kas maysa a mauyong. Ngem babaen ti tulong ti Kristiano a babai a mangiyad-adal kadakami, ken ti pammaregta dagiti magasin nga ipabpablaakyo, agap-apitakon kadagiti bunga. Ti dua ket kagudua a tawen a barok agtugawen a siuulimek bayat dagiti gimong ket agkumento payen iti ababa.

M. T., Japan

Panangidanondanon Napeklanak a manangidanondanon. Ngem maysa nga aldaw nagawidak manipud eskuelaan ket binasak ti serie a “Panangidanondanon—No Kasanot’ Panangliklik iti Pannakadangran.” (Hunio 8, 1991) Babaen iti tulongyo naikkatko dayta dakes nga ugali. Pudno a diak ammo a ti panangidanondanon ket napeggad ken dadaelenna ti pakasarsaritaan ti maysa a tao. Agyamanak unay maipaay itoy nga impormasion.

F. B., Estados Unidos

Literal nga inispal dagiti artikulo ti trabahok. Inulitko ti saosao a maidandanon a serraandan ti paktoria a pagtartrabahuak. Sakbay a naturpos ti aldaw, inayabandak iti opisina ti superbisorko. Imbagana kaniak nga agidanondanonak ken mangisaksaknap kadagiti bambanag a mamutbuteng laeng kadagiti tao ta nakisang ti trabaho. Maikikkat dagiti tao iti pagtartrabahuak, ket napanunotko a daytoy ti pamay-anda a mangikkat kaniak. Idi naawatko ti Agriingkayo! maipapan iti panangidanondanon, imbilangko dayta a balakad a naggaput’ langit. Impakitak dayta iti superbisorko ket imbagak kenkuana ti nasursurok ket aramidekto ti aniaman a kabaelak a di mairaman iti panangidanondanon. Nagyaman kaniak—ket adda pay laeng trabahok.

L. G., Estados Unidos

“Estrogen Replacement” Agyamanak iti artikulo nga “‘Estrogen Replacement Therapy’—Agpaay Aya Kadakayo?” (Setiembre 22, 1991) Nasdaawak iti kinalawagna. Maag-agasanak itan iti osteoporosis ken umaw-awatak iti estrogen replacement therapy iti uppat a tawenen. Ngem ad-adda a kabaelakon a kasarita ti doktorko maipapan kadagiti bambanag ken mangsaranget kadagiti parikutko a buyogen ti pananginanama. Agyamanak unay kadakayo.

R. C. S. M., Brazil

Panagadal nga Agtokar kadagiti Instrumento Pudno a kayatko ti agyaman kadakayo maipaay iti artikulo a “No Makapagtokarak Laeng a Kasta!” iti Setiembre 8, 1991, a bilang. Addaakon iti umuna a tawen iti junior high school ket agad-adalak nga agtokar iti electric organ. Dua a tawenen ti napalabas, ket nupay rumbengen a makaipakitaak iti rinang-ayan, saan pay laeng. Iti recital itoy a tawen, nagadu ti biddut ti panagtokarko. Makaupay. Daytoy nga artikulo naasi ken naintiempuan a balakad para kaniak.

M. O., Japan