Manipud Managbasatayo

Panangidanondanon Pagyamanan kadagiti naintiempuan nga artikuloyo maipapan iti panangidanondanon. (Hunio 8, 1991) Nabiit pay a siak ti puntiria iti malisiuso a panangidanondanon, ket babaen ti panangiyaplikar iti Nainkasuratan a prinsipio idiay Mateo 18:15-17, nabaelak a rinisot dagiti bambanag a kadua ti nagbasol.

B. C., Australia

Pagarupek a dagiti artikulo aduanda ti impormasion ken nagsayaatan ti pannakaisuratda. Nasdaawak, nupay kasta, kadagiti ladawan nga inusaryo. Uppat kadakuada ti mangipakita kadagiti babbai nga agidanondanon. Ti di naisao a mensahe ket ti panangidanondanon ket kababalin dagiti babbai.

H. W., Estados Unidos

Dikam inranta a tandaan dagiti babbai wenno lallaki iti negatibo a pamay-an. Dua kadagiti ladawan iramanna dagiti agidanondanon a lallaki. Ti sabali a ladawan ipakitana ti dua a babbai nga agsarsarita iti di makapabileg a panagsasarita. Maysa a babai ti naipakita met nga agkedked pay a dumngeg iti panangidanondanon.—ED.

Dagiti Gang Kaaw-awatko pay laeng ti Hunio 8, 1991, a bilang iti artikulo nga “Agimtuod dagiti Agtutubo . . . Makikaduaak Aya iti Gang?” No dadduma ti asawak ken siak pudno a madanagankami maipapan iti inaudi nga anakmi, a maawis kadagiti gang. Rinugianna ti agkawes a kas kadakuada ket tinuladna ti make-up ken estilo ti buokda. Dikam nadnadlaw ti mapaspasamak agingga a dandani naladawen. Nagasat ta, nabaelanmi ti nangiyadayo kenkuana iti dakes nga impluensia. Inanamaek a ti artikuloyo nakaipaay iti pagimbagan. Planoyo kadi ti mangiruarto ti ad-adu pay maipapan itoy a tema?

D. N., Estados Unidos

Kitaenyo ti bilangtayo a Hulio 22, 1991.—ED.

Ti Bara Kalkalpasko pay laeng a nagyaman iti artikulo a “Ti bara—Pagsidsiddaawan a Disenio.” (Hunio 8, 1991) Tinignay dayta ti panagsiddaawko maipapan kadagiti nakaskasdaaw nga ar-aramid ni Jehova a Dios. Ti artikulo ket nagsayaatan ti pannakaisuratna ket tinulongannak iti di nakapapati ti kinasimplena a pamay-an a mangawat kadagiti nakarikrikut a bambanag.

B. T. A., Brazil

Gatel iti Paripa Dagiti artikuloyo maipapan iti ‘Gatel iti Paripa’ (Mayo 8, 1991) pinalagipannak no kasano a sakbay a nagbalinak a Kristiano, addaanak kadagiti gagayyem a nagsugsugal. Maysa ti naibalud gapu iti panangpalsipikar gapu iti panagsugal. Ti sabali ket minalmalo dagiti nabuklis a managpautang ket binaybay-anda a paralisado gapu iti dina panagbayad iti utang. Pudno a ti panagsugal dadaelenna ti biag dagiti tao.

R. B., Estados Unidos

Dagiti Kamera Di pay nabayag gimmatangak iti maysa a kamera a mangipalubos iti panangbaliw iti panaglukat ken panangbaliw iti kapartakna, ngem marigatanak a mangawat iti libro a pagsurotan ti panangusar. Ti artikuloyo a “Dagiti Pakalaglagipan—Babaen ti Panangitalmeg iti Buton!” (Hulio 8, 1991) sinungbatanna dagiti saludsodko. Pagyamanan iti panangilawlawagyo kadagiti teknikal a bambanag iti nalaka a maawatan a pamay-an.

S. H., Japan

Kinamanagpadagos ti Hapones Tinagiragsakko ti artikulo a “Maysa a Rabii iti Pagtaengan a Hapones.” (Abril 22, 1991) Maamakak iti kasta unay iti panagtayab isu a manglapped kaniak nga agbiahe. Ngem ti artikuloyo pudno unay ken makaparagsak ta pinalubosannak nga agbiahe babaen iti isipko—a di kasapulanen ti agtayab.

K. R., Estados Unidos

Banda a Rock Daytoy ket maipapan iti artikuloyo a “Rugit iti Musika.” (Marso 8, 1991) Ti umuna a sasao iti artikulo saritaenna ‘ti sagrado a mision iti banda a rock—a mangrurod kadagiti nagannak.’ Mapanunotko dagiti adu a popular a banda ti rock a mangpataud iti nasayaat, positibo a musika. Mabalin a sarsaritaenyo ti “dadduma” a banda ti rock.

L. H., Estados Unidos

Dikam konkondenaren dagiti amin a moderno a musika. Dagiti sasao a masupsupiat ket direkta a naadaw manipud iti magasin a “U.S.News & World Report.” Kamaudiananna kinuna ti artikulo a dagiti partikular a banda a masarsarita ket “naidumduma kadagiti agus-uso a musika.” Imbagami met a “dadduma” kadagiti musika itatta—saan nga amin—ket di maawat.—ED.