Manipud Managbasatayo

Panagurot ti Buok Ti artikulo nga “Alopecia—Panangibtur a Siulimek iti Panagurot ti Buok” (Abril 22, 1991) ket nangnangruna a makapainteres kaniak. Nangrugi a nagurot ti buokko idi agtawenak iti innem ket kagudua. Nakababain idi damo, ngem dagiti gagayyemko ken ti kaaduan a tattao naasi ken managayatda. Itan 64 añosakon ket pudno a diak naawatan a pulos no ania ti gapu iti panagurot ti buokko agingga a nabasak ti artikuloyo. Agyamanak iti kasta unay.

R. W., Estados Unidos

Maysaak nga ubing a babai nga agtawen iti 16-años, ket nagsagabaak iti alopecia nanipud pay iti agedadak iti 10. Sinursurondak dagiti kaeskuelaak babaen ti panangbirngasda ken panangiguyodda iti pelukak. Daytoy pagladingitennak ken pinaglidaynak. Ngem ti artikuloyo impakitana kaniak no kasano ti panangsaranget iti dayta babaen iti panagpannuray ken ni Jehova. Inanamaek met ti panagtubo ti buokko iti baro a lubongna.

C. B., Estados Unidos

Panangidanondanon Agyamanak iti bilang a “Panangidanondanon—No Kasanot’ Panangliklik iti Pannakadangran.” (Hunio 8, 1991) Dimteng dayta iti tiempo a pannakasapulko unay. Adda parikutko iti maysa nga ubing a babai a maysa idi a nasayaat a gayyemko, ket isut’ mangisaksaknap iti makadangran a panangidanondanon maipapan kaniak. Ti artikuloyo pudno a tinulongannak a mangawat ken mangsaranget iti dayta.

M. P., Estados Unidos

Panagal-alembong Umaw-awatak a kanayon iti Agriingkayo! Ngem iti artikuloyo nga “Agimtuod dagiti Agtutubo . . . Aniat’ Peggad ti Panagal-alembong?” (Mayo 8, 1991) mariknak a saankay unay a naasi. Pudno nga awan dakesna ti panangdawat ti ubing a lalaki ken ni Sarah a makikatugaw iti dinnana. Ken gapu iti kinaimbag, apay a dakes ti umisem iti kasungani a sekso? Maiparbeng kadi nga ipakitayo ti rurodyo iti ‘panangpaadayo kenkuana’?

W. T., Estados Unidos

Ti pasamak maipapan ken agtutubo a Sarah ket nalawag a ramanenna ti inaldaw a pannakaipasangona iti di tartarigagayan nga atension. Maawatan ngarud, a mariribukan iti daytoy. No maipapan iti panagisem, inlawlawag ti artikulo nga “awan ti pagdaksan ti panagbalin a mannakigayyem.” Kinapudnona, adda dakkel a nagdumaan ti nainggayyeman nga isem ken ti “manggargari nga isem” a tinukoy ti artikulo.—ED.

Crossword Puzzles Pagyamanan iti crossword puzzle iti bilang a Hunio 8, 1991. Bayat ti isasarungkarko kadagiti appok a lakay ken baket, rinugiak a sinungbatan ti puzzle. Ngem idi rugiak a sungbatanen, inimtuod ti apok a lakay no mabalin a mangipaay iti tulong. Nakigtotak! Pulos a di interesado iti Biblia ti apok a lakay. Nupay kasta, basaenna ti kasuratan, ket basaek dagiti pangripiripan. Agarup sangapulo a minutos kalpasanna, simmangpet ti ikitko ket inimtuodna no isut’ makaipaay met iti tulong iti puzzle. Ti Biblia ket maysa idi a maiparparit a pagsasaritaan iti pagtaengan dagiti appok a lakay ken baket—ngem saanen itatta!

A. J., Inglatera

Ti Bara Natignayak nga agsurat kalpasan ti panangbask iti artikulo a “Ti Bara—Pagsidsiddaawan a Disenio.” (Hunio 8, 1991) Maysa nga aldaw laeng sakbayna, napukawko ti ikitko gapu iti kanser iti bara. Ti artikulo pinaaduna ti panangapresiarko iti pagsidsiddaawan iti bagi. Nalaka met dayta a maawatan ken tinulongannak a makakita ti pannakasapul iti panangaywan iti bara ket saan a mulmulitan ida kadagiti bambanag a [kas iti tabako].

C. G., Estados Unidos

Panangaywan iti Lallakayen Ay-aywanak ni tatangko, isu a masakit unay. Saan a nakatulong dagiti kakabsatko no di ti panangibagada iti, ‘Napigsaka. Kabaelam a tamingen dayta’ wenno, ‘Pinanunotmo koma ti posibilidad a mangipan kenkuana iti balay a pagtaraknan adu a tawtawen ti napalabasen.’ Maladingitanak iti bagik, ta mabigbigko a ti gundawayko a makiasawa ken maaddaan kadagiti annak napalabasen. Naaddaanak payen kadagiti emosional a parparikut. Ngem ti serie a “Dayawenyo Kadi dagiti Nataengan?” (Marso 22, 1991) liniwliwanak ken pinabilegnak nga agibtur.

S. B., Estados Unidos