Manipud Managbasatayo

Panangkayaw Agyamanak iti kasta unay maipaay iti artikulo a “No Agtignayka a Simamaag, Papatayenka.” (Nobiembre 22, 1991) Nakaluaak pay. Diak pay pulos napadpadasan ti kas iti napadasan ni Lisa Davenport, ngem gapu ta malidlidayak no maminsan, no dadduma mariknak a tarigagayakon ti matay. Ti artikulo, nupay kasta, pinagpanunotnak iti nauneg maipapan iti nabileg a panangsaranay ni Jehova a Dios ken no kasano a kanayon a tumulong no kasapulan.

N. O., Japan

Pampamilia Agbalin a Nasinged Maragsakanak unay maipapan iti serie dagiti artikulo a “Pampamilia—Agbalin a Nasinged Sakbay a Naladawen.” (Setiembre 22, 1991) Agarubos ti luak idi nakitak ti nagpintasan nga akkub. Kasta met, tunggal sao ken grupo dagiti sasao ket siaannad a napili ken naisurat a buyogen iti kinaalumamay! Agyamanak iti panangipalagipyo kadakami iti kinapateg ti kaadda iti nasinged a pamilia.

K. E., Estados Unidos

Dagiti artikulo mairamanda kadagiti makasair unay a nabasak pay laeng. Patien ti adu kadatayo a no basta iyadalantay ti Biblia dagiti annaktayo, itugottayo ida kadagiti Nakristianuan a gimgimong, ken makipasettayo nga agkakadua iti trabaho a panangasaba, mabalin nga agballigitayo kas nagannak. Nasarakak, nupay kasta, a dagiti naballigi a nagannak addaanda met iti nasinged a personal a relasion iti anakda—maysa a singgalut a mangipanamnama iti ayat dagiti nagannak iti ubing. Naiparangen daytoy a punto kadagiti napalabas nga artikulo, ngem dakdakkel pay laeng ti epekto daytoy kaniak ita.

T. H., Estados Unidos

Sakbay ti panagasawak, maysaak a tenidor de libros. Tinagiragsakko unay ti trabahok. Idi addan annakko, inkeddengko ti agsardengen nga agtrabaho ket agtalinaed iti pagtaengan a kadua dagiti annakko. No dadduma, nupay kasta, mariknak a kasla awan mamaayko ket tarigagayak ti agsubli nga agtrabaho. Kalpasan ti panangbasak iti artikuloyo, mariknak ti napabaro a rebbengek kadagiti annakko.

S. M., Estados Unidos

Panagsugal Agyamanak iti artikulo nga “Agimtuod dagiti Agtutubo . . . Dakes Unay Aya ti Panagsugal?” (Nobiembre 8, 1991) Iti eskuelaanmi, ti panagsugal nalatak unay. Maysa a panagay-ayam mangipaay iti 20 a yen iti nangabak; dadduma a kaklasek ti mangitugot iti 2,000 yen idiay eskuelaan! Naminsan naawisak a makiraman. Nangrugi a pinanunotko no dakes aya unay ti panagsugal, ket nasulisogak a mangpadas iti naminsan laeng. Ngem kalpasan ti panangbasak iti artikulo, ammokon a saan a nasayaat ti panagsugal ket no padasem iti maminsan laeng, mabalin a tarigagayamto nga ulit-uliten dayta.

N. N., Japan

Napudno Agsursuratak maipapan iti artikulo a “Makagunggona Aya ti Panagbalin a Napudno?” (Oktubre 22, 1991) Yantangay upayen dagiti Saksi ni Jehova dagiti panagay-ayam kalpasan ti klase, mariknak a daytoy nga artikulo mangipaay iti makariro a mensahe.

C. P., Estados Unidos

Ti artikulo insalaysayna no kasano a ti maysa nga agtutubo a lalaki nga agay-ay-ayam iti baseball ket nagunggonaan gapu iti kinapudnona. Nupay kasta, ti kapadasan ket napadayawan iti magasin nga “Sports Illustrated.” Ti agtutubo a nairaman ngarud ket saan a maysa a Saksi ni Jehova. Iti aniaman a pamay-an, naipablaak ti artikulo, saan a tapno itandudo ti pannakipaset iti panagay-ayam, no di ket tapno iyilustrar ti pateg ti kinapudno.—ED.

Manipud Managbasatayo Kankanayon a padpadaanak ti panangbasa iti paset a “Manipud Managbasatayo.” Masmasdaawak laeng iti ipakitayo a kinataktika kadagiti sungbatyo. No adda ti biddut iti panagiprenta wenno kamali, sipapakumbaba nga aminenyo dayta. Kaskasdi, kasano man ti pannakaupay ti managbasa, pulos a dikay sumiasi iti kinapudno ti Sao ti Dios. Ket managpakatawakayo pay! Kasta unay ti panagkatawak iti sungbatyo iti sidong ti “Biddut a Pannakabigbig” iti Pebrero 22, 1991, a bilang.

C. W., Estados Unidos