Maysa a Nagpateg a Lawas

NAKIGTOT ti lubong idi Lunes, Agosto 19, 1991, idi nga inagaw dagiti panguluen ti panagpadise ti poder idiay Union Soviet, ket naaresto ni Presidente Mikhail Gorbachev iti mismo a pagtaenganna idiay Crimea. Iti saan unay nga adayo, iti napintas nga Odessa, maar-aramid dagiti maudi a panagsagana maipaay iti kumbension dagiti Saksi ni Jehova iti ngudo ti lawas iti dayta a siudad. Nakalkaldaang, kinanselar dagiti lokal nga opisial ti kumbension sadi Odessa.

Kaskasdi, saan a naupay dagiti Saksi. Intuloyda ti nagsagana maipaay iti kumbension ken nakipakpakaasida iti maysa nga opisial ti siudad nga ikagumaanna koma a maibabawi ti pannakakanselar. Naibaga kadagiti pannakabagi dagiti Saksi ni Jehova nga agsublida iti Huebes, Agosto 22. Iti kamalemanna, kalpasan ti maysa a taripnong ti konseho ti siudad, naiyawat kadagiti Saksi ti naisurat a pammalubos maipaay iti kumbension ken nakablaawanda. Idiay Moscow, napilitan dagiti panguluen ti panagpadise a simmuko iti dayta met laeng nga aldaw!

Nagpartak dagiti pasamak! Ket anian a nakaskasdaaw a maimatangan ti nasurok a 12,000 a naguummong iti dayta a ngudot’ lawas! Idi Agosto 27, dua nga aldaw kalpasan ti kumbension idiay Odessa, napan dagiti pannakabagi dagiti Saksi ni Jehova ken Mr. V. K. Simonenko, tsirman ti Executive Committee ti Siudad ti Odessa, nagyamananda kenkuana gaput’ panangipalubosna a maangay ti kumbension, ken inikkanda iti kopia ti baro a libro a Ti Katan-okan a Tao a Nagbiag Pay Laeng iti pagsasao a Ruso.

Inapresiar ni Mr. Simonenko ti sagut ken kinunana: “Awanak idiay kumbension, ngem ammok amin ti napasamak sadiay. Nanipud addaak ditoy Odessa, awan pay nakitak a nasaysayat ngem daytoy . . . Ikarik kadakayo a kaanoman a kasapulanyo ti pammalubos nga agtataripnong, sibubulosak a kanayon a mangipaay iti dayta.”

[Tsart iti panid 31]

DAGITI KUMBENSION SADI UNION SOVIET IDI 1991

Petsa Siudad Kangatuan a Bautismo Timmabuno

Hulio 13, 14 Tallinn, Estonia 4,808 447

Hulio 20, 21 Usolye-Sibirskoye, 4,205 543

Siberia

Agosto 2, 3 Kiev, Ukraine 14,654 1,843

Agosto 3, 4 Lvov, Ukraine 17,531 1,316

Agosto 24, 25 Odessa, Ukraine 12,115 1,943

Agosto 31– Chernovtsy, 14,137 1,126

Setiembre 1 Ukraine

Setiembre 7, 8 Alma-Ata, 6,802 602

Kazakhstan

74,252 7,820